ការផ្លាស់ប្ដូរដ៏ធំ
ដោយAlistair Begg
June 17, 2026
«ចូរជឿដល់ព្រះអម្ចាស់យេស៊ូវគ្រីស្ទទៅ នោះនឹងបានសង្គ្រោះហើយ» ។ កិច្ចការ ១៦:៣១
ព្រះគម្ពីរប៊ីបប្រើពាក្យ «ជឿ» មិនគ្រាន់តែសំដៅទៅលើការយល់ដឹងផ្លូវបញ្ញាប៉ុណ្ណោះទេ ។
ការជឿ គឺមិនគ្រាន់តែជាយល់ស្របចំពោះមតិ គំនិត ឬគោលលទ្ធិអ្វីមួយប៉ុណ្ណោះទេ ។ តាមន័យព្រះគម្ពីរប៊ីប សេចក្តីជំនឿមិនគ្រាន់តែរាប់បញ្ចូលការផ្លាស់ប្តូរជំនឿលើខ្លួនឯង ទៅជាជំនឿលើព្រះគ្រីស្ទប៉ុណ្ណោះទេ ។ គឺប្រៀបដូចជាយើងដកទ្រព្យសម្បត្តិទាំងអស់ដែលយើងសន្សំទុកក្នុងធនាគារអាត្មាខ្លួនឯង ហើយយកទៅដាក់នៅក្នុងធនាគាររបស់ព្រះគ្រីស្ទវិញ ។
មានពេលញឹកញាប់ពេកហើយ ដែលយើងឮគេនិយាយ (ឬយើងធ្លាប់គិតខ្លួនឯង)ថា «ខ្ញុំបានរស់នៅធ្វើជាមនុស្សល្អ ។ ខ្ញុំជឿជាក់ថា ព្រះនឹងមានសេចក្តីមេត្តាចំពោះខ្ញុំ ហើយបំពេញចំណុចខ្វះខាតរបស់ខ្ញុំ ។ ខ្ញុំនឹងមិនធ្លាក់នរកទេ» ។ យើងរាល់គ្នាជួបការល្បួងឲ្យគិតថា បើយើងធ្វើអ្វីមួយ ហើយជៀសវាងការធ្វើអ្វីផ្សេងទៀត នោះព្រះទ្រង់នឹងធ្វើនៅក្នុងផ្នែករបស់ទ្រង់ដើម្បីយើង ។ ប៉ុន្តែ ការយល់ឃើញដូចនេះ បានបង្ហាញអំពីការពឹងផ្អែកលើខ្លួនឯង ហើយទោះក្នុងផ្លូវសាសនា ឬអត់ គឺមិនបានសមស្របនឹងព្រះគម្ពីរប៊ីបទេ ។
ព្រះគម្ពីរប៊ីបបានបង្រៀនថា ជំនឿពិតគឺមានតែការពឹងផ្អែកលើព្រះគ្រីស្ទ និងទុកចិត្តព្រះអង្គប៉ុណ្ណោះ ។ គឺដូចដែលសាវ័ក ប៉ុលបានពិពណ៌នាម្តងហើយម្តងទៀត អំពីសេចក្តីជំនឿ ។ គាត់ចង់ឲ្យគេបានឃើញគាត់នៅក្នុងទ្រង់ ដោយសេចក្ដីសុចរិតដែលមកពីសេចក្ដីជំនឿដល់ព្រះគ្រីស្ទ មិនមែនដោយសេចក្ដីសុចរិតរបស់ខ្លួនគាត់ ដែលមកពីក្រិត្យវិន័យនោះទេ «គឺជាសេចក្ដីសុចរិតដែលមកពីព្រះ ដោយសេចក្ដីជំនឿវិញ» (ភីលីព ៣:៩) ។
លោកគ្រូ មាទីន លូស័រ (Martin Luther) ជាអ្នកកំណែទម្រង់ដ៏ល្បីល្បាញ ដែលទីបំផុត គាត់បានដឹងថា សេចក្តីជំនឿ គឺជាការទទួលជឿព្រះគ្រីស្ទតែម្យ៉ាង ដើម្បីទទួលបានសេចក្តីសុចរិត គឺដូចដែលគាត់បានលើកឡើងថា «នៅពេលនោះ ខ្ញុំមានអារម្មណ៍ថា ខ្ញុំហាក់ដូចជាបានកើតជាថ្មី ហើយបានចូលទៅក្នុងនគរស្ថានសួគ៌ តាមទ្វារចំហភ្លាមៗ ។49 ទ្វារនោះបើកចំហសម្រាប់តែអ្នកដែលបានងាកមកជឿលើព្រះយេស៊ូវគ្រីស្ទប៉ុណ្ណោះ ។ គឺដូចកណ្ឌគម្ពីរវិវរណៈបានចែងថា «មានពរហើយ អស់អ្នកណាដែលលាងអាវខ្លួន ដើម្បីឲ្យបានច្បាប់ដល់ដើមជីវិត ហើយឲ្យបានចូលទៅក្នុងក្រុងតាមទ្វារ» (វិវរណៈ ២២:១៤) ។ មនុស្សដែលមានពរនោះមិនទាន់បានលាងសម្អាតខ្លួនឯងទេ តែបាន «បោកអាវ ហើយធ្វើឲ្យឡើងសក្នុងឈាមរបស់កូនចៀម» (៧:១៤) ។
ព្រះទ្រង់ទទួលយកអ្នកដែលថ្វាយជីវិតទាំងស្រុងដល់ដល់ព្រះយេស៊ូវគ្រីស្ទ ហើយនាំពួកគេចូលទៅក្នុងនគរស្ថានសួគ៌ ។ បើអ្នកជឿព្រះគ្រីស្ទក្នុងពេលសព្វថ្ងៃ នោះអ្នកក៏នឹងបានទទួល «ហើយយើងបានសេចក្ដីប្រោសលោះនៅក្នុងព្រះរាជបុត្រានោះ ដោយសារព្រះលោហិតទ្រង់» (អេភេសូរ ១:៧) ។ បើអ្នកបានដាក់ជំនឿ និងក្តីសង្ឃឹមទាំងអស់លើព្រះយេស៊ូវ និយាយរួម បើអ្នកជឿព្រះអង្គ នោះជីវិត និងក្តីអំណរដ៏អស់កល្ប ដែលជាទ្រព្យដ៏ស្ថិតស្ថេរកំពុងរង់ចាំអ្នកហើយ ។ ចូរប្រាកដថា អ្នកបានថ្វាយអ្វីទាំងអស់ដល់ព្រះអង្គ ហើយមិនឲ្យទៅអ្វីមួយ ឬនរណាផ្សេងទៀតឡើយ ។
ខគម្ពីរជញ្ជឹងគិត៖ រ៉ូម ៣:២១-៣១
គម្រោងអានព្រះគម្ពីររយៈពេល១ឆ្នាំ៖ យេរេមា ៣២-៣៣ និង ម៉ាថាយ ២៦:២៦-៤៦