ពឹងផ្អែកលើព្រះបន្ទូលព្រះអង្គ
ដោយAlistair Begg
June 19, 2026
«ទាំងលះចោលអស់ទាំងសេចក្ដីស្មោកគ្រោកចេញ នឹងសេចក្ដីគំរក់ដ៏មានច្រើនម្ល៉េះចេញផង ដ្បិតព្រះបន្ទូលនោះអាចនឹងជួយសង្គ្រោះព្រលឹងអ្នករាល់គ្នាបាន» ។ យ៉ាកុប ១:២១
ជាញឹកញាប់ គេសួរខ្ញុំថា «តើអ្នកបានផ្អែកទៅលើអ្វី?» ពេលដែលខ្ញុំមើលអាវរបស់ខ្ញុំ ខ្ញុំក៏បានដឹងច្បាស់ថា មានស្នាមប្រឡាក់នៅលើអាវរបស់ខ្ញុំ ដោយសារខ្ញុំបានផ្អែកទៅលើអ្វីមួយ ដែលធ្វើឲ្យអាវប្រឡាក់ ។ នៅពេលនោះ ខ្ញុំតាំងចិត្តថា ខ្ញុំនឹងមានការប្រុងប្រយ័ត្នជាងមុន ពេលខ្ញុំផ្អែកទៅលើអ្វីមួយ ។
តាមន័យខាងវិញ្ញាណ យើងត្រូវតែមានការប្រុងប្រយ័ត្ន ចំពោះអ្វីដែលយើងផ្អែកពីលើផងដែរ ។ ដែលយើងងាយនឹងប្រឡាក់អាវ ដោយសារយើងផ្អែកទៅលើក្តារខៀនដែលគេសរសេរនឹងដីសជាយ៉ាងណា នោះយើងក៏ងាយនឹងមានការប្រឡាក់ខាងវិញ្ញាណ ដោយសារយើងផ្អែកទៅលើបាបផងដែរ ។ យើងមិនគួរព្រងើយកន្តើយ ចំពោះការអាក្រក់ដែលកំពុងកើនឡើងនៅជុំវិញ និងនៅក្នុងយើងនោះទេ ។ យើងពិតជាងាយនឹងប្រព្រឹត្តអំពើបាប តាមរយៈភ្នែក និងគំនិតរបស់យើង តែទំរាំយើងដឹងខ្លួន បាបបានបន្សល់ទុកស្លាកស្នាមរបស់វាហើយ ។
អាកប្បកិរិយាដែលយើងមានចំពោះបាប ក្នុងសប្តាហ៍បន្ទាប់ នឹងមានផលប៉ះពាល់មកលើរបៀបដែលយើងស្តាប់ព្រះបន្ទូលព្រះ ដែលបានចែកចាយមកកាន់យើង នៅថ្ងៃអាទិត្យ ។ ស្នាមប្រឡាក់ខាងវិញ្ញាណ គឺជាឧបសគ្គរារាំងមិនឲ្យយើងស្តាប់ និងទទួលប្រយោជន៍ពីព្រះគម្ពីរប៊ីប ។ សណ្ឋាននៃចិត្តរបស់យើង ក្នុងការផ្សាយព្រះបន្ទូលព្រះ ក៏សំខាន់ណាស់ដែរ ។ អ្នកខ្លះចូលមករកព្រះបន្ទូលព្រះ ដោយមានស្នាមប្រឡាក់នៃការបត់បែនតាមលោកិយ ដែលមានការអាក្រក់ និងភាពស្មោកគ្រោក ឬមានស្នាមសំឡាកនៃការមិនស្តាប់បង្គាប់ ។ យើងមិនអាចប្រព្រឹត្ត ដោយភាពមិននឹងនរយ៉ាងដូចនេះ ហើយរំពឹងថា យើងនឹងទទួលបានអ្វីមួយពីព្រះអម្ចាស់នោះឡើយ (យ៉ាកុប ១:៧-៨) ។ នៅពេលដែលគ្រូគង្វាលអធិប្បាយព្រះបន្ទូល ពីថ្ងៃអាទិត្យមួយទៅថ្ងៃអាទិត្យមួយទៀត ហើយអ្នកខ្លះ ក្នុងពួកជំនុំរីកលូតលាស់ ហើយមានភាពពេញវ័យ តែអ្នកដទៃទៀតមិនបានលូតលាស់ គឺបណ្តាលមកពីចិត្តដែលជាដី មិនមែនដោយសារព្រះបន្ទូលដែលជាគ្រាប់ពូជនោះទេ ។
ចូរយើងកត់សំគាល់ថា លោក យ៉ាកុបមិនបានប្រាប់យើង ឲ្យគ្រាន់តែអធិស្ឋាន អំពីស្នាមប្រឡាក់នោះទេ តែក៏បានប្រាប់យើងឲ្យលប់បំបាត់វាផងដែរ ។ តើដោយរបៀបណា? គឺដោយជំនួយពីអំណាចនៃព្រះវិញ្ញាណបរិសុទ្ធ តាមរយៈព្រះបន្ទូលទ្រង់ ។ គឺដូចដែលអ្នកនិពន្ធបទគម្ពីរទំនុកដំកើងបានពោលថា «មនុស្សកំឡោះនឹងសំអាតផ្លូវដែលខ្លួនប្រព្រឹត្តដោយសារអ្វី គឺដោយប្រយ័ត្ននឹងប្រព្រឹត្តតាមព្រះបន្ទូលនៃទ្រង់» (ទំនុកដំកើង ១១៩:៩) ។ ព្រះគម្ពីរប៊ីបមានតួនាទីប្រៀបដូចជាឧបករណ៍ចម្រោះទឹក ។ ពីមួយថ្ងៃទៅមួយថ្ងៃ យើងត្រូវប្ដេជ្ញាចិត្តដើរចេញពីបាប ដែលយើងបានផ្អែកទៅលើជាញឹកញាប់ពេក ហើយយើងត្រូវ «បន្ទាបខ្លួនទទួលព្រះបន្ទូលចាក់ឬសនៅក្នុងចិត្តយើង» ។ យើងប្រហែលមិនយល់អំពីអ្វីៗទាំងអស់ទេ តែយើងទទួលយក និងអនុវត្តតាមអ្វីដែលយើងយល់ ដោយការបន្ទាបខ្លួន ។
នៅពេលដែលអ្នកទទួលព្រះបន្ទូលព្រះ ដោយការបន្ទាបខ្លួន អ្នកក៏ទទួលបានសេចក្តីសង្គ្រោះ នៅថ្ងៃនេះ ថ្ងៃស្អែក និងអស់កល្បជានិច្ច ។ ព្រះបន្ទូលទ្រង់សង្គ្រោះអ្នក ឲ្យរួចពីការមានពុត ដែលជាឃាតករលាក់មុខ ខាងវិញ្ញាណ ។ ព្រះបន្ទូលទ្រង់ក្រើនរំឭកអ្នកថា ព្រះអង្គបានរំដោះអ្នកឲ្យរួចពីទោសរបស់បាប តាមរយៈការសុគតរបស់ព្រះរាជបុត្រាទ្រង់ ។ ព្រះបន្ទូលព្រះអង្គធានាដល់អ្នកថា អ្នកបានរួចពីអំណាចរបស់បាប និងអាចជ្រើសរើសយកសេចក្តីសុចរិតវិញ ។ តើអ្នកកំពុងផ្អែកទៅលើអ្វី? តើមានបាបដែលលោកិយកំពុងទទួលយក និងលើកដំកើង តែអ្នកចាំបាច់ត្រូវដើរចេញពីវាដែរឬទេ? ចូរចូលមកនៅចំពោះព្រះបន្ទូលព្រះអង្គនៅថ្ងៃនេះ ។ ចូរពឹងផ្អែកព្រះវិញ្ញាណព្រះអង្គ ដើម្បីឲ្យបានស្អាងឡើងវិញ និងមានការចាប់ផ្តើមជាថ្មី ។ ចូរទទួលព្រះបន្ទូលព្រះអង្គ ហើយអរសប្បាយ ចំពោះព្រះបន្ទូលទ្រង់ ដែលមានអំណាចលាងសម្អាត!
ខគម្ពីរជញ្ជឹងគិត៖ ម៉ាកុស ៩:៤២-៥០
គម្រោងអានព្រះគម្ពីររយៈពេល១ឆ្នាំ៖ យេរេមា ៣៧-៣៩ និង ម៉ាថាយ ២៧:១-២៦