តើអ្នកនឹងធ្វើដូចម្តេច ចំពោះព្រះយេស៊ូវ?
ដោយAlistair Begg
June 20, 2026
«លោកមានប្រសាសន៍ទៅគេជាគំរប់៣ដងថា តើមនុស្សនេះបានធ្វើអាក្រក់អ្វី ខ្ញុំមិនឃើញជាមានហេតុអ្វីគួរឲ្យស្លាប់ទេ ដូច្នេះ ខ្ញុំនឹងវាយប្រដៅ រួចលែងវាទៅ ។ តែគេស្រែកទទូចជាខ្លាំង ទាំងសូមឲ្យឆ្កាងទ្រង់វិញ ហើយសំរែករបស់ជនទាំងនោះ នឹងពួកសង្គ្រាជ ក៏បានឈ្នះ» ។ លូកា ២៣:២២-២៣
ក្នុងនាមលោក ប៉ុនទាស ពីឡាត់ ជាអភិបាលនៃទឹកដីយូដា គាត់មានការទទួលខុសត្រូវ ក្នុងការរក្សាសណ្ដាប់ធ្នាប់ និងបង្ក្រាបការប៉ះបោរណាមួយ ក្នុងតំបន់ដែលគាត់គ្រប់គ្រង ។ គាត់ធ្លាប់តែប្រើអំណាច និងឥទ្ធិពលរបស់គាត់ ដើម្បីសម្រេចទោសជនជាប់ចោទ ដែលកំពុងរង់ចាំការកាត់ទោស ។ ប៉ុន្តែ ព្រះយេស៊ូវបានយាងចូលទៅក្នុងកន្លែងប្រជុំរបស់គាត់ ដោយប្រឈមមុខដាក់គាត់ ដែលធ្វើឲ្យគាត់មានការពិបាកខ្លាំងបំផុត ក្នុងការសម្រេចចិត្ត ក្នុងជីវិតគាត់ ។ ពួកអ្នកដឹកនាំសាសនា និងមនុស្សមួយហ្វូងបានបញ្ជូនព្រះយេស៊ូវ ឲ្យលោក ពីឡាត់កាត់ទោស ។ នៅពេលដែលលោក ពីឡាត់បានសួរដេញដោលហ្វូងមនុស្ស ច្បាស់ៗថា «តើមនុស្សនេះបានធ្វើអាក្រក់អ្វី?» ពួកគេហាក់ដូចជាមិនអាចនិយាយអ្វី ក្រៅពីស្រែកកាន់តែខ្លាំងឡើង ។ (ការដំឡើងសម្លេងច្រើនតែជាសញ្ញាបង្ហាញពីការប្រកែកដ៏ទន់ខ្សោយ) ។ លោក ពីឡាត់ដឹងថា ព្រះយេស៊ូវមិនមានទោសអ្វីទេ ហេតុនេះហើយ គាត់ក៏បានប្រកាសទៅកាន់ពួកគេថា «ខ្ញុំមិនឃើញជាមានហេតុអ្វីគួរឲ្យស្លាប់ទេ» ។ ប៉ុន្តែ សម្រែករបស់ហ្វូងមនុស្សមានការទាមទារកាន់តែខ្លាំង ដោយមិនងាករេ ហើយលោក ពីឡាត់ប្រាកដជាបានចាប់ផ្តើមសួរខ្លួនឯងថា តើខ្ញុំត្រូវធ្វើដូចម្តេច ចំពោះបុគ្គលឈ្មោះយេស៊ូវ មកពីស្រុកណាសារ៉ែតនេះ?
លោក ពីឡាត់ចង់ដោះលែងព្រះយេស៊ូវ ។ គាត់ដឹងថា គាត់គួរតែដោះលែងព្រះអង្គ ប៉ុន្តែ គាត់បានបោះបង់ចោលគំនិតនេះ ដោយសារគាត់ចង់ផ្គាប់ចិត្តហ្វូងមនុស្ស និងអ្នកដឹកនាំសាសនាទាំងនោះ ហើយសម្លេងរបស់ហ្វូងមនុស្សដ៏វឹកវរក៏បានឈ្នះចិត្តគាត់ ។
ការពិបាកដែលលោក ពីឡាត់មាន ក្នុងការសម្រេចចិត្តនេះ គឺយើងមិនពិបាកយល់ទេ ។ តាមពិត វាក៏ជាការពិបាក ដែលបុរស និងស្រ្តីទាំងឡាយមាន ក្នុងការសម្រេចចិត្តថា តើត្រូវធ្វើចំពោះបុគ្គលនាមយេស៊ូវ មកពីស្រុកណាសារ៉ែតនេះ ដូចម្តេច ។ លោក ពីឡាត់បានជួបព្រះរាជបុត្រានៃព្រះមុខទល់នឹងមុខ ហើយក៏បានឮព្រះអង្គធ្វើបន្ទាល់ដោយផ្ទាល់ តែគាត់នៅតែសម្រេចចិត្តធ្វើតាមលោកិយ និងសម្លេងស្រែករបស់ហ្វូងមនុស្ស ជាជាងលត់ជង្គង់នៅចំពោះក្សត្រលើអស់ទាំងក្សត្រ ។
ក្នុងការកាត់ទោសព្រះយេស៊ូវ ផែនការរបស់ព្រះ ក្នុងការសង្គ្រោះមនុស្សជាតិ ក៏ត្រូវបានបើកបង្ហាញ ក្នុងពេលនោះ ។ គេបានចោទប្រកាន់ និងកាត់ទោសព្រះយេស៊ូវ មិនមែនដោយសារបាបរបស់ព្រះអង្គទេ ។ ព្រះអង្គក៏មិនបានសុគត ដោយសារខ្លួនឯងដែរ ។ ព្រះអង្គសុគត ដើម្បីយើងរាល់គ្នា ។ ព្រះអង្គដែលគ្មានទោសសោះ បានប្រែក្លាយជាមានទោសទាំងស្រុង ដើម្បីយើងដែលមានទោសគ្រប់យ៉ាង បានប្រែជាគ្មានទោសវិញ ។
លោក ពីឡាត់បានលាងដៃ ដើម្បីកុំឲ្យខ្លួនគាត់មានកំហុស ក្នុងការកាត់ទោសនេះ ជាមួយពួកអ្នកដឹកនាំសាសនា ប៉ុន្តែ គាត់នៅតែមិនរួចទោស ។ យើងក៏មានទោសដែរ ។ យើងអាចមានសង្ឃឹមថា រួចពីបាបក្នុងការរស់នៅ និងសេចក្តីស្លាប់បាន ទាល់តែយើងបានឆ្លើយតប អស់ពីចិត្ត ចំពោះសិរីល្អនៃការអ្វីដែលបានកើតឡើង នៅលើឈើឆ្កាង ។ យើងមិនខុសពីលោក ពីឡាត់ទេ ព្រោះយើងត្រូវធ្វើការសម្រេចចិត្ត លត់ជង្គង់នៅចំពោះព្រះគ្រីស្ទ និងភាពជាព្រះអម្ចាស់របស់ព្រះអង្គ ឬយើងចុះចាញ់សំពាធនៃវប្បធម៌ដែលនៅជុំវិញយើង ។ នេះជាការសម្រេចចិត្តដែលយើងធ្វើនៅក្នុងចិត្តយើង តែគេអាចដឹងអំពីការសម្រេចចិត្តនេះ នៅក្នុងពាក្យសម្តីរបស់យើង នៅពេលដែលមនុស្សនៅក្បែរយើងជំរុញយើងឲ្យបដិសេធការគ្រប់គ្រង ឬសេចក្តីល្អរបស់ព្រះគ្រីស្ទ គឺមិនខុសពីលោក ពីឡាត់ទេ ។ ទោះសម្លេងនោះបានលាន់ឮយ៉ាងណាក៏ដោយ បើអ្នកជាកម្មសិទ្ធិរបស់ព្រះអង្គហើយ ចូរត្រៀមជាសម្រេចដើម្បីធ្វើបន្ទាល់ពីព្រះអង្គ ។
ខគម្ពីរជញ្ជឹងគិត៖ ២ធីម៉ូថេ ៤:៩-១៨
គម្រោងអានព្រះគម្ពីររយៈពេល១ឆ្នាំ៖ យេរេមា ៤០-៤២ និង ម៉ាថាយ ២៧:២៧-៥០