ស្វែងរកចៀមដែលបាត់បង់
ដោយAlistair Begg
June 26, 2026
«ព្រះយេស៊ូវទ្រង់ឮថា គេបានបណ្ដេញគាត់ហើយ រួចកាលទ្រង់បានឃើញគាត់ នោះក៏មានបន្ទូលទៅថា តើអ្នកជឿដល់ព្រះរាជបុត្រានៃព្រះឬទេ?» យ៉ូហាន ៩:៣៥
ជំនួបរវាងព្រះយេស៊ូវ និងជនពិការភ្នែកម្នាក់ ក្នុងបទគម្ពីរជំពូក៩ គឺជាផ្នែកមួយនៃផែនការដ៏ធំនៃសេចក្តីសង្គ្រោះរបស់ព្រះ តាំងពីអស់កល្បជានិច្ច ។ ការបង្អាក់ដំណើររបស់ព្រះអង្គ ពាក់កណ្តាលថ្ងៃ នៅពេលនោះ គឺជាផ្នែកមួយការសម្រេចសេចក្តីសន្យា ដែលក្នុងនោះព្រះអង្គបានប្រទានលោក អ័ប្រាហាំថា «គ្រប់ទាំងសាសន៍នៅផែនដីនឹងបានពរដោយសារពូជឯង» (លោកុប្បត្តិ ២២:១៨) ។ ហើយក៏ជាផ្នែកមួយនៃគោលបំណងដ៏ធំ ដែលកំពុងបន្ត និងបើកបង្ហាញ ដើម្បីប្រមូលមនុស្សមានចំនួនដែលគេមិនអាចរាប់បាន មកពីគ្រប់ជាតិសាសន៍ ពូជអំបូង និងភាសា (វិវរណៈ ៧:៩) ។
ការប្រោសបុរសនោះឲ្យជា ក៏ដូចជារឿងដែលកើតឡើងបន្ទាប់ មានលក្ខណៈពិតជាគួរឲ្យកត់សំគាល់ណាស់ ។ បានជាគេអាចចោទសួរថា : តើព្រះយេស៊ូវបានជួបបុរសនោះ ដោយរបៀបណា? តើព្រះអង្គបានកែប្រែជីវិតគាត់យ៉ាងដូចម្តេចខ្លះ? ក្នុងការឆ្លើយសំណួរទាំងនេះ យើងមានការយល់ដឹងកាន់តែច្បាស់ អំពីរបៀបដែលព្រះយេស៊ូវរកឃើញបុរស និងស្ត្រីទាំងឡាយដែលកំពុងបាត់បង់ ហើយកែប្រែពួកគេ ឲ្យក្លាយជាចៀមដែលព្រះអង្គបានរកឃើញ ។
រឿងនេះមិនគ្រាន់តែបានបកស្រាយ អំពីសេចក្តីជំនឿដែលនាំឲ្យបានសង្គ្រោះ តែក៏ជា «គំរូនៃការអ្វីដែលអ្នកអាចធ្វើបាន ក្នុងការព្យាយាមនាំវិញ្ញាណមនុស្សជាច្រើន ឲ្យទទួលជឿព្រះយេស៊ូវ» ។ លោកគ្រូ ស៊ី អេច ស្ព័រជិន (C.H. Spurgeon) បានមានប្រសាសន៍ថា បើអ្នកចង់ដើរតាមគំរូរបស់ព្រះយេស៊ូវ ក្នុងការឈោងចាប់អ្នកដទៃ រឿងទីមួយដែលអ្នកត្រូវធ្វើនូវគឺ «ស្វែងរកមនុស្សដែលគេសង្កត់សង្កិន ... អ្នកជំងឺ មនុស្សមានទុក្ខព្រួយ មនុស្សនឿយព្រួយ អ្នកក្រ និងមនុស្សខូចចិត្ត និងជាពិសេសមនុស្សដែលគេបណ្តេញចេញពីសាលាប្រជុំ» ។50
ចំពោះមនុស្សដែលគ្មាននរណាចង់បាន និងគ្មាននរណាស្វាគមន៍ ព្រះយេស៊ូវសព្វព្រះទ័យនឹងទទួលពួកគេ ។ ព្រះយេស៊ូវមានហេតុផលគ្រប់យ៉ាង ដែលត្រូវរំពឹងថា អ្នកដើរតាមព្រះអង្គក៏នឹងធ្វើដូចព្រះអង្គដែរ ។ ទាល់តែយើងបានដឹងថា យើងជាមនុស្សបាត់បង់កាលពីមុន ទើបយើងអាចយល់ថា ការដែលព្រះយេស៊ូវរកឃើញយើង មានអត្ថន័យយ៉ាងណា ។ ព្រះយេស៊ូវបានតាមរក ហើយក៏រកឃើញអ្នក ហើយព្រះអង្គក៏ស្វែងរកអ្នកផ្សេងទៀតផងដែរ ។ យើងច្រើនតែចង់ចំណាយពេលជាមួយមនុស្សដែលមានលក្ខណៈដូចយើង ។ ប៉ុន្តែ ព្រះរាជបុត្រានៃព្រះមិនធ្វើដូចនេះទេ ពុំនោះទេ ព្រះអង្គក៏មិនបានយាងមកយកកំណើតជាមនុស្សដែរ ដើម្បីស្វែងរក និងជួយសង្គ្រោះមនុស្សមានបាប ដូចយើង ។ តើព្រះអម្ចាស់កំពុងត្រាស់ហៅអ្នកឲ្យទៅឈោងចាប់ «មនុស្សបាត់បង់» ណាខ្លះ ដោយដំណឹងល្អនៃកូនមនុស្ស? ដោយជំនួយមកពីព្រះអង្គ ចូរចេញទៅ ហើយប្រាប់ពួកគេថា ព្រះយេស៊ូវមានព្រះជន្មរស់ ហើយព្រះអង្គស្វែងរក និងជួយសង្គ្រោះមនុស្សបាត់បង់ ។
ខគម្ពីរជញ្ជឹងគិត៖ លូកា ១៥:១-៧
គម្រោងអានព្រះគម្ពីររយៈពេល១ឆ្នាំ៖ យ៉ូអែល និង ភីលីព ៤