ពួកជំនុំត្រូវការអ្នក
ដោយAlistair Begg
July 1, 2026
«ហើយទ្រង់ប្រទានឲ្យព្រះវិញ្ញាណសំដែងមកក្នុងគ្រប់គ្នា ដើម្បីឲ្យបានកើតផល» ។ ១កូរិនថូស ១២:៧
បើអ្នកបាត់មុន លែងមានវត្តមានក្នុងពួកជំនុំរបស់អ្នកទៀត តើមាននរណាកត់សំគាល់ទេ? បើអ្នកមិនបានចូលរួមជាមួយពួកគេ មួយរយៈពេល តើពួកជំនុំរបស់អ្នកនឹកអ្នកទេ?
យ៉ាងហោចណាស់ ព្រះទ្រង់បានប្រទានដល់អ្នកជឿម្នាក់ៗ នូវអំណោយទានមួយ ដើម្បីប្រើជាប្រយោជន៍ដល់ពួកជំនុំ ជារូបកាយរបស់ព្រះអង្គ ។ ហើយគ្មាននរណាម្នាក់ ដែលគេមិនអាចជំនួសបានក្នុងពួកជំនុំ ក្នុងន័យ ថា ពួកជំនុំមិនអាចដំណើរការដោយគ្មានពួកគេនោះទេ ប៉ុន្តែ គេគួរតែនឹកយើង បើយើងអវត្តមាន ព្រោះព្រះទ្រង់បានប្រទានអំណោយទានមកយើង តាមរបៀបជាក់លាក់ ក្នុងពេលច្បាស់លាស់ ដើម្បីឲ្យយើងមានប្រយោជន៍ខុសៗគ្នា ក្នុងក្រុមមនុស្សណាមួយ ។
ប៉ុន្តែ តើមានពេលប៉ុន្មានដងហើយ ដែលយើងអង្គុយចាំឲ្យគេបម្រើយើង ខណៈពេលដែលព្រះគម្ពីរប៊ីបបានបង្រៀនថា ព្រះទ្រង់ធ្វើការបម្រើដល់អ្នកដទៃតាមរយៈយើង? ជាការពិតណាស់ យើងម្នាក់ៗ ត្រូវតែត្រៀមខ្លួនជាស្រេច ដើម្បីទទួលការបម្រើពីអ្នកដទៃ ខណៈពេលដែលពួកគេប្រើអំណោយទាន ដែលព្រះទ្រង់ប្រទានមកពួកគេ ដើម្បីជាប្រយោជន៍យើងរាល់គ្នា ។ ប៉ុន្តែ យើងគួរតែផ្តល់ឲ្យការបម្រើដល់គេ គឺមិនត្រូវទទួលតែមួយមុខឡើយ ។ ពួកជំនុំមិនសូវមានកន្លែងទំនេរ សម្រាប់អ្នកអង្គុយទស្សនានោះទេ ។ សូម្បីតែមនុស្សក្មេងជាងគេក្នុងចំណោមយើង ទោះក្នុងជំនឿ ឬអាយុក្តី សុទ្ធតែមានអ្វីសម្រាប់រួមចំណែក ។
ព្រះវិញ្ញាណធ្វើការ និងបញ្ចេញព្រះចេស្តា នៅពេលណាយើងប្រើអំណោយទាន ដើម្បីប្រយោជន៍រួម ។ ការនេះក៏រាប់បញ្ចូលការកែតម្រង់បងប្អូនរួមជំនឿ ក្នុងពួកជំនុំ ប៉ុន្តែ ក៏រាប់បញ្ចូលការធ្វើបន្ទាល់ដល់មិត្តភក្តិ និងអ្នកជិតខាងយើង នៅក្រៅព្រះវិហារផងដែរ ។ ពួកគេអាចភាន់ច្រឡំ និងមិនយល់ អំពី «អំណោយទានខាងវិញ្ញាណ» ប៉ុន្តែ ពួកគេអាចយល់អំពីចិត្តដែលមានក្តីអាណិត ។ ពួកគេនឹងឆ្លើយតបចំពោះភាពចៅរ៉ៅ ។ ពួកគេនឹងបើកចិត្តទទួលពាក្យសម្តីដែលយកចិត្តទុកដាក់ ឬលើកទឹកចិត្តពួកគេ ។
អ្នកមានអ្វីមួយសម្រាប់រួមចំណែក ដោយលក្ខណៈផ្សេងៗគ្នា ។ តែសមត្ថភាពរបស់យើង ក្នុងការចូលរួមក្នុងព្រះរាជកិច្ចរបស់ព្រះ មិនគួរធ្វើឲ្យយើងមានអំនួតនោះទេ ព្រោះវាជាអំណោយទានដែលព្រះវិញ្ញាណនៃព្រះប្រទាន ហើយមានតែព្រះដែលព្រះទានអំណោយទានទេ ដែលសក្ដិសមនឹងទទួលការសរសើរ ខណៈពេលដែលយើងប្រើអំណោយទាន បម្រើរាស្រ្តរបស់ទ្រង់ និងពិភពលោក ។
ដូចនេះ យើងត្រូវដឹងច្បាស់ថា ព្រះទ្រង់ប្រទានអំណោយទានដល់យើងម្នាក់ៗ ដោយព្រះវិញ្ញាណទ្រង់ ដើម្បីប្រយោជន៍រួម ហើយការនេះគួរតែបានលើកទឹកចិត្តយើងឲ្យលះបង់ប្រយោជន៍ផ្ទាល់ខ្លួន ជាជាងគិតប្រយោជន៍ខ្លួនឯង ។ ពួកជំនុំរបស់អ្នកត្រូវការអ្វីដែលអ្នកអាចផ្តល់ឲ្យបាន តាមរយៈព្រះវិញ្ញាណរបស់ព្រះអង្គ ។ គឺដូចដែលបទចម្រៀងកុមារមួយបានច្រៀងថា «មានការងារមួយសម្រាប់ធ្វើថ្វាយព្រះយេស៊ូវ ដែលក្រៅពីអ្នក គ្មាននរណាអាចធ្វើបានទេ» ។51 តើព្រះអង្គកំពុងបណ្តាលចិត្តអ្នកឲ្យធ្វើអ្វី?
ខគម្ពីរជញ្ជឹងគិត៖ ១កូរិនថូស ១២:១២-៣១
គម្រោងអានព្រះគម្ពីររយៈពេល១ឆ្នាំ៖ ចោទិយកថា ១៣-១៥ និង កិច្ចការ ៤:១-២២