មានជីវិតថ្មី ដែលរស់នៅខុសពីលោកិយ
ដោយAlistair Begg
July 2, 2026
«ពួកបណ្ដាជនមិនព្រមស្ដាប់តាមសាំយូអែលឡើយ ដោយប្រកែកថា ទេ ត្រូវតែមានស្ដេចលើយើងរាល់គ្នាវិញ ។ ដើម្បីឲ្យយើងបានដូចសាសន៍ឯទៀតដែរ ហើយឲ្យស្ដេចនៃយើងបានគ្រប់គ្រងលើយើង ព្រមទាំងនាំមុខយើងចេញទៅច្បាំងក្នុងចំបាំងយើងផង» ។ ១សាំយូអែល ៨:១៩-២០
ការដែលពួកអ៊ីស្រាអែលចង់មានស្តេចគ្រប់គ្រងពីលើពួកគេ គឺមិនមានអ្វីខុសទេ ។ ការដែលពួកគេស្នើហោរាសាំយូអែល ឲ្យផ្តល់ឲ្យពួកគេនូវអ្នកដឹកនាំដូចនេះ មិនមែនជាអំពើបាបទេ ។ តាមពិត កាលប៉ុន្មានសតវត្សរ៍មុន លោក ម៉ូសេក៏បានរំពឹងទុកជាមុន អំពីថ្ងៃនេះដែរ ហើយព្រះទ្រង់ក៏បានប្រទានក្បួនសម្រាប់ជ្រើសរើសស្តេចឲ្យគ្រប់គ្រងរាស្រ្តទ្រង់ (ចោទិយកថា ១៧:១៤-២០) ។ បញ្ហាមិនស្ថិតនៅលើការស្នើសុំនោះទេ តែស្ថិតនៅលើបំណងចិត្តរបស់ពួកបណ្តាជន ដែលចង់ឲ្យបាន «ដូចសាសន៍ឯទៀត» នៅជិតខាងពួកគេ ។ ហើយនេះគឺជាបញ្ហា ព្រោះពួកគេមិនដូចប្រជាជាតិទាំងអស់នោះទេ ។ ពួកគេគឺជារាស្រ្តរបស់ព្រះ គឺជាកម្មសិទ្ធរបស់ផងទ្រង់ លើសជាងអស់ទាំងសាសន៍ ... ជានគរនៃពួកសង្ឃរបស់ទ្រង់ ហើយជាសាសន៍បរិសុទ្ធរបស់ព្រះអង្គ (និក្ខមនំ ១៩:៥-៦) ។ ការដែលពួកគេចង់បានដូចសាសន៍នៅជុំវិញពួកគេ គឺមានន័យថា ពួកគេកំពុងបដិសេធ មិនព្រមធ្វើជារាស្រ្តរបស់ព្រះអង្គ ។
ការដាស់តឿនអំពីសំណូមរបស់ពួកអ៊ីស្រាអែលឲ្យមានស្តេច ឲ្យបានដូចសាសន៍ដទៃ គឺមានលក្ខណៈមិនខុសពីការដាស់តឿនដែលសាវ័កប៉ុលមានចំពោះពួកជំនុំនៅទីក្រុងរ៉ូមឡើយ ។ សាវ័កប៉ុលបានសរសេរសំបុត្រផ្ញើទៅពួកគេ ដោយលើកឡើងអំពីគ្រោះថ្នាក់នៃការលេបត្របាក់ដោយវប្បធម៌ដែលនៅជុំវិញពួកគេ គឺដូចដែលគាត់មានប្រសាសន៍ថា «កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង» (រ៉ូម ១២:២) ។
សាវ័កប៉ុលបានដាស់តឿនពួកជំនុំឲ្យមានការប្រុងប្រយ័ត្ន យ៉ាងដូចនេះ ព្រោះគាត់បានយល់អំពីសំពាធ ដែលអ្នកជឿព្រះនៅទីក្រុងរ៉ូម នៅសតវត្សរ៍ទី១ កំពុងទទួលរង ដែលជំរុញពួកគេឲ្យសម្របខ្លួននឹងរបៀបនៃការរស់នៅ និងទស្សនៈរបស់លោកិយ នៅជុំវិញពួកគេ ។ យើងក៏កំពុងតែជួបបញ្ហាប្រឈមដូចនេះ ក្នុងសម័យយើងផងដែរ ។ ដូចនេះ យើងមិនគួរមានការភ្ញាក់ផ្អើលទេ នៅពេលដែលពួកអ៊ីស្រាអែលកំពុងជួបបញ្ហាប្រឈមដូចនេះ នៅសតវត្សរ៍ទី១១មុនគ្រីស្ទសករាជ ហើយពួកគេក៏ទទួលការដាស់តឿនដូចគ្នា ។
ចុះចំណែកយើងវិញ? តើយើងមានភស្តុតាងបញ្ជាក់ថា យើងមានជីវិតថ្មីឬទេ? តើយើងរំពឹងថា យើងនឹងមានលក្ខណៈខុសពីលោកិយ នៅជុំវិញយើង ក្នុងរបៀបដែលយើងគិត និងការអ្វីដែលយើងនិយាយ ហើយរបៀបដែលយើងរស់នៅ ឬយើងកំពុងរវល់ព្យាយាមចូលចំណោមគេឲ្យចុះ? តើព្រះវិហាររបស់យើងកំពុងតែចម្លងប្រពៃណី ការរំពឹងគិត និងអាកប្បកិរិយារបស់មនុស្សនៅជុំវិញយើងឬទេ ឬពួកគេកំពុងតែពេញទៅដោយពន្លឺដ៏ចែងចាំង ដែលកើតឡើង ដោយសារព្រះរាជកិច្ចនៃព្រះវិញ្ញាណបរិសុទ្ធ និងការបណ្តាលចិត្ត?
តើអ្នកបានជួបការល្បួងឲ្យត្រាប់តាមវប្បធម៌នៅជុំវិញអ្នក ត្រង់ចំណុចណាខ្លាំងជាងគេ? ត្រង់ចំណុចនេះ អ្នកមានឱកាសអនុញ្ញាតឲ្យព្រះទ្រង់កែច្នៃអ្នក ឲ្យត្រូវបំណងព្រះទ័យទ្រង់ ហើយរស់នៅតាមរបៀបដែលខុសពីគេ ដោយបញ្ចេញពន្លឺ ។
ខគម្ពីរជញ្ជឹងគិត៖ ១ពេត្រុស ២:៩-១៧
គម្រោងអានព្រះគម្ពីររយៈពេល១ឆ្នាំ៖ ចោទិយកថា ១៦-១៨ និង កិច្ចការ ៤:២៣-៣៧