ពេលណាការសង្ស័យ និងការភ័យខ្លាចវាយប្រហារ
ដោយAlistair Begg
July 3, 2026
«ដ្បិតខ្ញុំជឿជាក់ថា ទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី ។ ទីមានកំពស់ ទីជំរៅ ឬរបស់អ្វីដែលកើតមកឯទៀតក្ដី នោះពុំអាចនឹងពង្រាត់យើង ចេញពីសេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅ បានឡើយ» ។ រ៉ូម ៨:៣៨-៣៩
គ្រីស្ទបរិស័ទស្ទើរតែទាំងអស់ មានពេលដែលពួកគេជួបការល្បួងឲ្យអស់សង្ឃឹម ដោយមិនដឹងថា នឹងបានទៅស្ថានសួគ៌ឬអត់ទេ ឬអាចបន្តទុកចិត្តព្រះគ្រីស្ទនៅថ្ងៃបន្ទាប់ ឬយើងអាចបន្តរស់នៅដោយជំនឿ ក្នុងការវង្វេងចេញ និងបាបរបស់យើងដែរឬទេ ។ ហើយស្ថិតក្នុងពេលបែបនេះ យើងត្រូវតែប្រកាន់ខ្ជាប់នូវព្រះបន្ទូលសន្យាដែលថា ព្រះទ្រង់ស៊ូទ្រាំ ព្រះអង្គជាអ្នកថែរក្សា និងការពារយើង ជារាស្រ្តទ្រង់ ។
នៅពេលដែលយើងនិយាយអំពីគោលលទ្ធិកំណែទម្រង់ដ៏ល្បីល្បាញ អំពី «ការស៊ូទ្រាំរបស់ពួកបរិសុទ្ធ» គឺយើងកំពុងនិយាយអំពីការស៊ូទ្រាំរបស់ព្រះអង្គ ដោយផ្ទាល់ ។ ក្នុងបទគម្ពីររ៉ូម ៨:៣៦-៣៦ សាវ័កប៉ុលបានចោទជាសំណួរជាបន្តបន្ទាប់ ដើម្បីសង្កត់ធ្ងន់ថា គ្មានអ្វីអាចបំបែកកូនរបស់ព្រះ ចេញពីសេចក្តីស្រឡាញ់របស់ព្រះគ្រីស្ទ ហើយគាត់ក៏បានបញ្ជាក់ការពិតដែលថា ពេលណាយើងបានស្ថិតនៅក្រោមការថែរក្សារបស់ព្រះ ដែលជាអ្នកគង្វាលល្អ ដែលបាន «លះបង់ជីវិតដើម្បីចៀម»ទ្រង់ (យ៉ូហាន ១០:១១) គឺយើងបាននៅ ក្នុងការឃុំគ្រងរបស់ព្រះអង្គជារៀងរហូត ។ គឺដូចដែលសាវ័កប៉ុលបានមានប្រសាសន៍ថា គ្មានអ្វី «អាចនឹងពង្រាត់យើង ចេញពីសេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅបានឡើយ» ។ បើអ្នកនៅជាប់ក្នុងព្រះគ្រីស្ទហើយ អ្នកមិនអាចបាត់បង់ឡើយ ។ ដូចនេះ តើយើងត្រូវធ្វើដូចម្តេច ចំពោះការសង្ស័យ និងការភ័យខ្លាចដែលវាយប្រហារមកលើយើង? គឺយើងត្រូវតែផ្ចង់ភ្នែករបស់យើង មើលទៅព្រះអម្ចាស់យេស៊ូវ ។ ពេលណាយើងមើលមកខ្លួនឯង យើងមានហេតុផលដែលត្រូវបាក់ទឹកចិត្ត និងខ្វល់ខ្វាយ ។ គឺមានតែមើលទៅព្រះយេស៊ូវទេ ទើបយើងអាចរត់ក្នុងទីប្រណាំង នៅចំពោះមុខយើង ។ ព្រះអង្គបានរងទ្រាំការឈឺចាប់ និងក្តីអាម៉ាសនៅលើឈើឆ្កាង ហើយបានគង់នៅខាងស្តាំបល្ល័ង្ករបស់ព្រះ (ហេព្រើរ ១២:២) ដើម្បីឲ្យយើងអាចទទួលការអត់ទោសបាប និងបន្តរស់នៅថ្វាយព្រះអង្គ ។
ជំនឿរបស់យើងមិនបាត់បង់ទេ ព្រោះព្រះអង្គទ្រទ្រង់ជំនឿរបស់យើង ។ អ្នកដែលបានរត់ប្រណាំង ដល់ទីផ្តាច់ព្រាត់ ហើយចូលទៅក្នុងអំណររបស់ព្រះអម្ចាស់ កំពុងតែមានចិត្តសប្បាយរីករាយជាង តែក៏នៅជាប់ព្រះគ្រីស្ទ ដូចអ្នកជឿដែលកំពុងរស់នៅ ដោយការជំពប់ដួល ការតយុទ្ធ ការទុកចិត្ត ការចម្រើនឡើង និងការស៊ូទ្រាំ ។ គ្មានអំណាច ឬកលឧបាយអ្វីដែលអាចពង្រាត់អ្នកជឿព្រះគ្រីស្ទ ចេញពីក្តីស្រឡាញ់របស់ព្រះបានទេ ។ ព្រះអង្គស្រឡាញ់អ្នកខ្លាំងបំផុត ហើយអ្នកក៏នៅជាប់ព្រះអង្គ យ៉ាងរឹងមាំបំផុតផងដែរ ។
កិច្ចការដែលសេចក្តីល្អរបស់ព្រះអង្គបានចាប់ផ្តើម
ព្រះហស្តដ៏មានអំណាចរបស់ទ្រង់ នឹងសម្រេច
ព្រះបន្ទូលសន្យារបស់ព្រះអង្គ មានតែបាទ និងអាម៉ែន
ហើយមិនដែលខកខានឡើយ ។
គ្មានការអ្វីក្នុងពេលអនាគត ឬការអ្វីក្នុងពេលសព្វថ្ងៃ
គ្មានអ្វីនៅស្ថានក្រោម ឬស្ថានលើក្តី
ដែលអាចរារាំងគោលបំណងទ្រង់
ឬកាត់ផ្តាច់វិញ្ញាណខ្ញុំចេញពីសេចក្តីស្រឡាញ់របស់ព្រះអង្គឡើយ ។ 52
ខគម្ពីរជញ្ជឹងគិត៖ ភីលីព ១:១-៦
គម្រោងអានព្រះគម្ពីររយៈពេល១ឆ្នាំ៖ ចោទិយកថា ១៩-២១ និង កិច្ចការ ៥:១-២១ក