សូមព្រះអង្គគង់នៅជាមួយទូលបង្គំ
ដោយAlistair Begg
July 4, 2026
«នោះក៏ជិតដល់ភូមិដែលគេគិតទៅ ហើយទ្រង់ធ្វើដូចជាចង់យាងបង្ហួស ។ តែគេឃាត់ទ្រង់ ដោយពាក្យថា សូមនៅជាមួយនឹងយើងខ្ញុំសិន ពីព្រោះល្ងាច ថ្ងៃទាបណាស់ហើយ ដូច្នេះ ទ្រង់ក៏យាងចូលទៅគង់ជាមួយនឹងគេ» ។ លូកា ២៤:២៨-២៩
ជំនួបរវាងព្រះយេស៊ូវ និងបុរសពីរនាក់ នៅតាមផ្លូវទៅភូមិអេម៉ោស បានចាប់ផ្តើមតាមរបៀបដ៏ចម្លែក ។ ព្រះអង្គបានបង្ហាញអង្គទ្រង់ភ្លាមៗ ។ ព្រះអង្គបានលាក់បាំងអត្តសញ្ញាណមិនឲ្យពួកគេស្គាល់ព្រះអង្គ ។ ព្រះអង្គបានសួរសំណួរទៅកាន់ពួកគេ ។ ព្រះអង្គក៏បានប្រាប់ពួកគេថា ពួកគេគឺជា «មនុស្សឥតពិចារណា ហើយក្រនឹងជឿ» (លូកា ២៤:២៥) ។ ប៉ុន្តែ ព្រះអង្គក៏បានមានបន្ទូលសង្ខេបអំពីព្រះគម្ពីរសញ្ញាចាស់ដោយ «ស្រាយន័យសេចក្ដី ដែលតំរូវដល់ទ្រង់ ពីក្នុងគម្ពីរទាំងឡាយ ឲ្យគេស្ដាប់ ចាប់តាំងពីគម្ពីរលោក ម៉ូសេ នឹងគម្ពីរពួកហោរារៀងមក» (ខ.២៧) ហើយចិត្តរបស់ពួកគេក៏បានបញ្ឆេះឡើយ (ខ.៣២) ។
ការរៀនព្រះគម្ពីរដោយមិនបានគ្រោងទុក នៅថ្ងៃនោះ ក៏បានបញ្ចប់តែប៉ុណ្ណេះ ប្រហែលមកពីបុរសទាំងនោះ បានទៅដល់គោលដៅរបស់ពួកគេ ។ មេឃជិតងងឹតហើយ ប៉ុន្តែ ព្រះអង្គហាក់ដូចជាកំពុងបន្តការធ្វើដំណើរ ។ ប៉ុន្តែ សិស្សទាំងពីរនាក់នេះ មិនចង់បែកពីព្រះអង្គទេ ។ ពួកគេចង់ឲ្យព្រះអង្គគង់នៅជាមួយពួកគេបន្តទៀត ។
ហេតុនេះហើយ ពួកគេក៏បានអញ្ជើញព្រះអង្គ ។ ជាការពិតណាស់ ពួកគេបាន «ឃាត់»ព្រះអង្គឲ្យនៅជាមួយពួកគេ ។ បើគ្មានការអញ្ជើញនេះទេ ព្រះអង្គប្រាកដជាបន្តដំណើរទៅមុខទៀត ។ ហើយបើព្រះយេស៊ូវបន្តដំណើរទៅមុខទៀត នោះពួកសិស្សទាំងនោះប្រាកដជាខកខានមិនបានដឹងថា គ្រូរបស់ពួកគេដែលបានយាងមកជាមួយពួកគេ ដោយពួកគេមិនបានស្គាល់ទ្រង់ ព្រះអង្គគឺគ្មាននរណាក្រៅពីព្រះអម្ចាស់យេស៊ូវទេ (លូកា ២៤:៣១) ។
តើមានពេលប៉ុន្មានដងហើយ ដែលយើងបានជួបព្រះយេស៊ូវ តាមផ្លូវជីវិតរបស់យើង ហើយយើងមិនបានអញ្ជើញព្រះអង្គ? តើមានពេលប៉ុន្មានដងហើយ ដែលយើងព្យាយាមរស់នៅពីរមួយថ្ងៃទៅមួយថ្ងៃ ដោយពឹងអាងការប្រឹងប្រែងដោយខ្លួនឯង ហើយគេងមិនលក់ ដោយសារការថប់បារម្ភ? តើអ្នកបានអញ្ជើញព្រះអង្គលើកចុងក្រោយបំផុត នៅពេលណា? ព្រះអង្គជ្រាបអំពីបញ្ហា ការឈឺចាប់ និងទុក្ខលំបាកទាំងអស់ ដែលអ្នកមាន ហើយអ្នកដទៃមិនអាចយល់ និងដោះស្រាយឲ្យបាន? ព្រះគ្រីស្ទដែលមានព្រះជន្មរស់ឡើងវិញ ទ្រង់បានមកឈរនៅមាត់ទ្វារទាំងគោះ (វិវរណៈ ៣:២០) ។ តើអ្នកនឹងអញ្ជើញព្រះអង្គចូលគង់ខាងក្នុងឬទេ? តើអ្នកនឹងនិយាយថា «ព្រះយេស៊ូវ សូមព្រះអង្គគង់នៅជាមួយទូលបង្គំ ។ ទូលបង្គំមិនអាចជួយខ្លួនឯងបានទេ»? នៅពេលដែលអ្នកធ្វើការអញ្ជើញដូចនេះ អ្នកនឹងបានឃើញព្រះយេស៊ូវ និងសេចក្តីស្រឡាញ់ដែលព្រះអង្គមានចំពោះអ្នក គឺឃើញជាថ្មីឡើងវិញ ដោយចិត្តដែលឆេះឆួល ។
ខគម្ពីរជញ្ជឹងគិត៖ លូកា ២៤:២៥-៣៥
គម្រោងអានព្រះគម្ពីររយៈពេល១ឆ្នាំ៖ ចោទិយកថា ២២-២៤ និង កិច្ចការ ៥:២១ខ-៤២