គ្រាន់តែជាស្រមោល ដែលគ្មានអំណាច
ដោយAlistair Begg
July 13, 2026
«សេចក្ដីជ័យជំនះបានលេបសេចក្ដីស្លាប់បាត់ហើយ» ។ «ឱសេចក្ដីស្លាប់អើយ ទ្រនិចឯងនៅឯណា សេចក្ដីស្លាប់អើយ ជ័យជំនះរបស់ឯងនៅឯណា» ។ រីឯទ្រនិចនៃសេចក្ដីស្លាប់ គឺជាអំពើបាប ហើយអំណាចរបស់បាប គឺជាក្រិត្យវិន័យ ។ តែអរព្រះគុណដល់ព្រះអង្គ ពីព្រោះទ្រង់ប្រទានឲ្យយើងរាល់គ្នាមានជ័យជំនះ ដោយសារព្រះយេស៊ូវគ្រីស្ទ ជាព្រះអម្ចាស់នៃយើង» ។ ១កូរិនថូស ១៥:៥៤-៥៧
ក្នុងខគម្ពីរទាំងនេះ សាវ័កប៉ុលកំពុងតែប្រមាថសេចក្តីស្លាប់ ដោយបើកចំហ ។ ហេតុអ្វីគាត់អាចធ្វើដូចនេះបាន? សេចក្តីស្លាប់មានលក្ខណៈគួរឲ្យភ័យខ្លាច ។ សេចក្តីស្លាប់ពិតជាសោកសៅណាស់ ហើយហាក់ដូចជាចំណុចចុងក្រោយ ។ តើសាវ័កប៉ុលបានដឹងអំពីអ្វីខ្លះ បានជាគាត់អាចប្រមាថអំណាចដ៏គួរឲ្យខ្លាចរបស់វា ដោយទំនុកចិត្តយ៉ាងដូចនេះបាន?
គឺដោយសារសេចក្តីស្លាប់បានបាត់ទ្រនិចរបស់វាហើយ ។
ដើម្បីបកស្រាយការបង្រៀនរបស់សាវ័កប៉ុលត្រង់ចំណុចនេះ យើងអាចស្រមៃអំពីក្មេងស្រីម្នាក់ ដែលកំពុងលេងជាមួយឪពុករបស់គាត់ ក្នុងទីធ្លាក្រោយផ្ទះ ។ មានសត្វឃ្មុំមួយក្បាលចាប់ផ្តើមហោះហើរនៅក្បែរពួកគេ ។ នៅពេលដែលនាងឃើញវា នាងក៏បានស្រែកប្រាប់ឪពុករបស់នាង ឲ្យដេញវាចេញឲ្យឆ្ងាយ ដើម្បីកុំឲ្យវាទិចនាង ។ នៅពេលដែលវាចូលកាន់តែកៀក ឪពុករបស់នាងក៏បានចាប់ផ្តើមយកដៃគ្រវីដេញវា ហើយវាក៏បានទិចដៃគាត់ ។ គាត់ក៏បានដកទ្រនិចនោះចេញ ហើយបង្ហាញការឈឺចាប់របស់គាត់ ។ ក្មេងតូចនោះក៏បានរួចពីគ្រោះថ្នាក់ ។
ព្រះយេស៊ូវគ្រីស្ទបានទទួលរងទ្រនិចនៃសេចក្តីស្លាប់ ជំនួសយើង នៅលើឈើឆ្កាង ។ បាបនាំទៅរកសេចក្តីស្លាប់ ហើយសេចក្តីស្លាប់ទិចមនុស្ស ដោយសារបាបរបស់ពួកគេ ព្រោះបាបត្រូវតែនាំទៅរកការជំនុំជម្រះ ។ ប៉ុន្តែ ព្រះគ្រីស្ទបានទទួលទោស នៅលើព្រះកាយទ្រង់ នៅលើឈើឆ្កាង ដើម្បីឲ្យអស់អ្នកដែលទុកចិត្តព្រះអង្គ នឹងមិនត្រូវជួបការជំនុំជម្រះឡើយ (កាឡាទី ៣:១៣) ។ យើងប្រហែលនៅតែដើរ កាត់ «ជ្រលងម្លប់នៃសេចក្តីស្លាប់» (ទំនុកដំកើង ២៣:៤) ប៉ុន្តែ ដោយសារការអ្វីដែលព្រះគ្រីស្ទបានធ្វើ នោះសេចក្តីស្លាប់គ្រាន់តែជាស្រមោល ដែលគ្មានអំណាចអ្វីឡើយ ។ នេះជាមូលហេតុដែលព្រះយេស៊ូវបានយកកំណើតជាមនុស្ស ។ ទ្រង់ក៏ទទួលចំណែកជាសាច់ឈាមដូច្នោះដែរ «ដើម្បីឲ្យទ្រង់បានបំផ្លាញអានោះ ដែលមានអំណាចលើសេចក្ដីស្លាប់ គឺជាអារក្ស ដោយទ្រង់សុគត ហើយឲ្យបានប្រោសដល់ពួកអ្នកនោះ ដែលជាប់ជាបាវបំរើគ្រប់១ជីវិត ដោយខ្លាចស្លាប់ ឲ្យបានរួចចេញវិញ» (ហេព្រើរ ២:១៤-១៥) ។
អ្នកមិនចាំបាច់ត្រូវរស់នៅ ក្នុងភាពជាទាសករប្រភេទនេះ ឬដើរនៅក្នុងការភ័យខ្លាចទៀតទេ ។ ព្រះយេស៊ូវបានលប់បំបាត់អំណាចរបស់សេចក្តីស្លាប់ជារៀងរហូត តាមរយៈការសុគត និងការមានព្រះជន្មឡើងវិញរបស់ព្រះអង្គ ។ ព្រះអង្គទទួលយកទ្រនិចរបស់សេចក្តីស្លាប់ ដើម្បីកុំឲ្យអ្នកប្រឈមមុខដាក់អំណាច ដែលវាមានមកលើបាបរបស់យើងឡើយ ។ ផ្ទុយទៅវិញ អ្នកអាចដើរដោយសេរីភាព នៅថ្ងៃនេះ និងជារៀងរាល់ថ្ងៃ ដោយដឹងថា ព្រះទ្រង់បានប្រទានអ្នកនូវជ័យជម្នះលើបាប និងសេចក្តីស្លាប់ តាមរយៈព្រះអម្ចាស់យេស៊ូវគ្រីស្ទហើយ ។ បានជាអ្នកអាចមើលទៅសេចក្តីស្លាប់ហើយនិយាយថា «ទោះឯងមានលក្ខណៈគួរឲ្យភ័យខ្លាច និងគួរឲ្យសោកសៅយ៉ាងណាក៏ដោយ ក៏ឯងបានបាត់ទ្រនិចរបស់ឯងហើយ» ។ ហើយអ្នកអាចមើលព្រះ ដែលបានទទួលទ្រនិចជំនួសអ្នក ហើយនិយាយថា សិរីល្អ គឺជារបស់ផងព្រះរាជបុត្រា ដែលមានព្រះជន្មរស់ឡើងវិញ ដោយជ័យជម្នះ ព្រះអង្គបានឈ្នះសេចក្តីស្លាប់ ជារៀងរហូត!56
ខគម្ពីរជញ្ជឹងគិត៖ ហេព្រើរ ២:១០-១៨
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៧-៩ និង កិច្ចការ ១០:១-២៣