មិនតែងតែមានរបៀបរៀបរយ
ដោយAlistair Begg
July 24, 2026
«គេក៏នាំអេសធើរចូលទៅថ្វាយស្ដេចអ័ហាស៊ូរុស នៅក្នុងព្រះរាជ ... ស្ដេចទ្រង់ក៏ស្រឡាញ់អេសធើរលើសជាងស្ត្រីឯទៀត ហើយនាងទទួលបានព្រះគុណ នឹងសេចក្ដីប្រោសប្រាណ នៅចំពោះទ្រង់ លើសជាងពួកស្រីក្រមុំទាំងប៉ុន្មាន ដល់ម្ល៉េះបានជាទ្រង់បំពាក់មកុដរាជ តាំងនាងឡើងជាអគ្គមហេសីជំនួសវ៉ាសធី» ។ នាងអេសធើរ ២:១៦-១៧
នាង ហាដាសា គឺជានារីជនជាតិយូដា ដែលបានក្លាយជាអគ្គមហេសី នៃចក្រភពពើស៊ី ដែលយើងបានស្គាល់ឈ្មោះនាងថាជា អេសធើរ មានន័យថា «ផ្កាយ» ។ នាងគឺជាក្មេងកំព្រា ដែលបងប្រុសជីដូចមួយបានចិញ្ចឹម ហើយនាងមានរូបសម្រស់គួរឲ្យទាក់ទាញយ៉ាងពិសេស (នាងអេសធើរ ២:៧) ។ នៅពេលដែលស្តេចបើកកម្មវិធីស្វែងរកបវរកញ្ញា ធ្វើជាមហេសីថ្មី «គេក៏នាំយកអេសធើរទៅក្នុងដំណាក់ស្ដេច ប្រគល់ក្រោមអំណាចហេកាយ ជាអ្នករក្សាពួកស្រីៗដែរ» (ខ.៨) ។ គិតមកត្រឹមចំណុចនេះ នាងបានលាក់អត្តសញ្ញាណរបស់នាង ជាជនជាតិយូដា (ខ.១០) ។
លោក ហេកាយ ជាមហាតលិក មានតួនាទីមើលការខុសត្រូវស្រ្តីទាំងអស់នោះ ក៏មានការពេញចិត្តចំពោះនាង អេសធើរផងដែរ ដោយជួយជ្រោមជ្រែងនាង ហើយពេលនាងដល់វេនដែលត្រូវចូលគាល់ស្តេច គាត់ក៏បានបង្រៀននាងពីរបៀបរបបក្នុងរាជវាំង (នាងអេសធើរ ២:៩,១៥) ។ អ្វីៗមានដំណើរការល្អ ដោយនាងបានជាប់លេខមួយ ហើយក៏បានទទួលការតែងតាំងធ្វើជាមហេសីស្តេច ។ នាង អេសធើរ មានមុខនាទី ដែលអាចជួយសាសន៍របស់នាងបាន ប៉ុន្តែ មិនមានការលើកឡើងណាមួយថា នាងមានគោលដៅ ដែលធំជាងការពាក់មកុដនោះឡើយ ។
រឿងនេះមានធាតុផ្សំ ដែលហាក់ដូចជាមិនទំនង និងពិបាកផង ។ ស្ត្រីជាម្តាយជនជាតិយូដា ជាទូទៅ មិនរំភើបចិត្តទេ នៅពេលដែលបានដឹងថា កូនស្រីរបស់ខ្លួន កំពុងតែរួមដំណេកជាមួយស្តេចសាសន៍ដទៃ ដែលមិនកាត់ស្បែក ។ បុរសជាឪពុកសាសន៍យូដា ក៏មិនរំភើបចិត្តដែល នៅពេលបានដឹងថា កូនស្រីខ្លួនបានលាក់ការសម្ងាត់ ក្នុងចក្រភពពើស៊ី ដោយមិនព្រមឲ្យនរណាដឹង អំពីសាច់ញាតិ ប្រវត្តិ ឬអត្តសញ្ញាណរបស់ខ្លួន ។ នាងគឺជាវីរនារីក្នុងរឿងនេះ ប៉ុន្តែ គឺជាវីរនារី ដែល «គេអាចចោទសួរអំពីក្រមសីលធម៌ និងវិន័យចាស់របស់នាង ដោយការសង្ស័យបាន» ។60
ទោះជាយ៉ាងណាក៏ដោយ យើងមិនចាំបាច់ត្រូវយល់ស្រប ចំពោះការសម្រេចចិត្តនីមួយៗរបស់នាង អេសធើរនោះទេ ។ យើងទទួលស្គាល់ថា ព្រះទ្រង់មានអំណាចគ្រប់គ្រងលើដំណើររឿង កំពុងកើតឡើងក្នុងជីវិតនាង តែយើងមិនចាំបាច់ត្រូវនិយាយថា នាងបានធ្វើការសម្រេចចិត្តបានល្អ គ្រប់ជំហានឡើយ ។ ព្រះទ្រង់បានឲ្យនាងមានចំណែកបន្តិចបន្តួច ក្នុងរឿងធំជាង ដែលត្រូវបើកបង្ហាញ ។ ប៉ុន្តែ យើងត្រូវមើលបង្ហួសនាង អេសធើរ និងការសម្រេចចិត្តរបស់នាង ហើយមើលទៅឲ្យដល់វីរបុរសពិតនៃរឿងនោះ គឺព្រះអម្ចាស់ ដែលប្ដេជ្ញាព្រះទ័យថា នឹងប្រើគ្រប់មធ្យោបាយ ដើម្បីសុខុមាលភាពរបស់រាស្រ្តទ្រង់ ។
ហេតុការណ៍ក្នុងរឿងនាង អេសធើរ មិនមានរបៀបរៀបរយ ដូចដែលយើងចង់បាននោះទេ ។ ជាការពិតណាស់ វាមិនមែនជាការយកលេស ដើម្បីធ្វើការសម្រេចចិត្តដោយចេតនា ដើម្បីធ្វើអ្វីដែលព្រះមិនសព្វព្រះទ័យនោះទេ ។ ប៉ុន្តែ នេះជាហេតុផលដែលយើងត្រូវមានការលើកទឹកចិត្ត ព្រោះហេតុការណ៍ដែលកើតឡើងតាមផែនការព្រះ ក្នុងជីវិតយើង ក៏មិនមានរបៀបរៀបរយ ដូចដែលយើងចង់បានដែរ ។ ចូរពិនិត្យមើលជីវិតអ្នកឡើងវិញ ហើយដឹងថា ទោះការសម្រេចចិត្តរបស់អ្នកមិនល្អទាំងអស់ ផែនការរបស់អ្នកមិនសុទ្ធតែគ្មានភាពអាត្មានិយមក៏ដោយ ក៏ព្រះទ្រង់បាននាំអ្នកមកដល់ចំណុចនេះ នៅថ្ងៃនេះ ដោយអំណាចគ្រប់គ្រងរបស់ទ្រង់ ។ ខណៈពេលដែលអ្នកចែកចាយរឿងរបស់អ្នក អ្នកត្រូវប្រាកដថា អ្នកចែកចាយរឿងនោះ អំពីព្រះដែលជាវីរបុរសពិតប្រាកដ ជាដើម ហើយជាចុង ដែលកំពុងសម្រេចគោលបំណងទ្រង់ក្នុងជីវិតអ្នក ។
ខគម្ពីរជញ្ជឹងគិត៖ ពួកចៅហ្វាយ ១៣:១-៤ ១៦:២៣-៣០
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៣៥-៣៦ និង កិច្ចការ ១៧:១-១៥