តើព្រះអង្គកំពុងធ្វើអ្វី?
ដោយAlistair Begg
July 25, 2026
«រីឯនៅគ្រានោះ កាលម៉ាដេកាយកំពុងតែអង្គុយនៅមាត់ទ្វារព្រះរាជវាំង នោះមានភ្នាក់ងាររបស់ស្ដេច២នាក់ ឈ្មោះប៊ីកថាន និងថេរែស ក្នុងពួកអ្នកចាំយាមនៅមាត់ទ្វារព្រះរាជវាំង គេមានសេចក្ដីកំហឹង ហើយរកឱកាសដល់ព្រះជន្មស្ដេចអ័ហាស៊ូរុស ... លុះកាលគេស៊ើបសួររកពីរឿងនោះទៅ ក៏ឃើញពិតដូច្នោះមែន រួចគេចងកអ្នកទាំង២ព្យួរនៅដើមឈើ...ក្រោយនោះមក ស្ដេចអ័ហាស៊ូរុសទ្រង់លើកដំកើងហាម៉ាន កូនហាំម្ដាថា ជាសាសន៍អ័កាក់ ទាំងលើកលោកឡើង» ។ នាងអេសធើរ ២:២១-៣:១
តើអ្នកធ្លាប់បានសម្រេចកិច្ចការធំនៅសាលារៀន នៅកន្លែងធ្វើការ ឬប្រហែលជានៅព្រះវិហារ ប៉ុន្តែ អ្នកដទៃបានទទួលការសរសើរឬទេ?
នេះជាបញ្ហាដែលលោក ម៉ាដេកាយបានជួបផងដែរ ។ គាត់បានរកឃើញគេមានគម្រោងធ្វើឃាតស្តេចអ័ហាស៊ូរុស ហើយក៏បានរាយការណ៍ដល់ស្តេច ហើយស្តេចក៏បានលើកដំកើងហាម៉ានទៅវិញ ដោយឲ្យដំណែងគាត់ខ្ពស់ជាងគេ ក្នុងរាជការ ដើម្បីឲ្យមន្ត្រីទាំងអស់ស្ថិតក្រោមបង្គាប់គាត់ ។ អ្វីដែលលោក ម៉ាដេកាយទទួលបាន គឺមានតែពាក្យពីរបីបន្ទាត់ ដែលបានកត់ទុកក្នុងបញ្ជីពង្សាវតាររបស់ចក្រភពពើស៊ី ។ ប៉ុន្តែ លោក ម៉ាដេកាយមិនបានដឹងថា ការកត់ទុកអំពីសកម្មភាពរបស់គាត់ មានសារៈសំខាន់ប៉ុណ្ណាទេ គឺមិនគ្រាន់តែក្នុងជីវិតគាត់ តែសម្រាប់ប្រជាជនយូដាទាំងអស់ ហើយក៏សម្រាប់ពិភពលោកទាំងមូលផងដែរ ។ ៥ឆ្នាំក្រោយមក នៅពេលដែលរាស្រ្តរបស់ព្រះប្រឈមមុខនឹងអំពើប្រល័យពូជសាសន៍ នៅក្រោមបង្គាប់របស់ហាម៉ាន នៅពេលយប់មួយនោះ ស្តេចមិនអាចផ្ទំលក់ «ដូច្នេះ ទ្រង់បង្គាប់ឲ្យគេយកសៀវភៅ ដែលកត់អស់ទាំងរឿងទុកសំរាប់ពង្សាវតារមក រួចគេក៏អានមើលថ្វាយស្ដេច នោះឃើញមានសេចក្ដីកត់ទុក ពីម៉ាដេកាយបានប្ដឹងពីប៊ីកថាន និងថេរែស ... ដែលបានរកឱកាសដល់ព្រះជន្មនៃស្ដេចអ័ហាស៊ូរុស» (នាងអេសធើរ ៦:១-២) ។ ពិភពលោកអាចនិយាយថា នេះជារឿងចៃដន្យ ។ អ្នកជឿព្រះបានដឹងថា នេះជាការរៀបចំរបស់ព្រះ ។
យើងមិនត្រូវកាត់ស្រាយព្រឹត្តិការណ៍នៃជីវិតយើង ផ្អែកទៅលើរបៀបដែលពួកវាមានផលប៉ះពាល់មកលើជីវិតរបស់យើង ក្នុងពេលបច្ចុប្បន្នប៉ុណ្ណោះទេ តែក៏ផ្អែកទៅលើសារៈសំខាន់របស់ពួកវាផងដែរ ។ ការរៀបចំរបស់ព្រះ មិនតែងតែងាយស្រួលយល់ ពេលយើងមើលមួយភ្លែតនោះទេ ។ បើយើងព្យាយាមពន្យល់អ្វីៗទាំងអស់ តាមសម្ពាធ និងអារម្មណ៍ដែលយើងមាន ក្នុងពេលណាមួយ យើងច្រើនតែយល់ច្រឡំអំពីការអ្វីដែលព្រះទ្រង់កំពុងធ្វើ ។ យើងចង់បានចម្លើយ ដែលច្បាស់លាស់ និងឆាប់រហ័ស និងចង់បានដំណោះស្រាយនៅពេលនេះ ប៉ុន្តែ ព្រះទ្រង់ត្រាស់ហៅយើងឲ្យមើលទៅព្រះអង្គ ដោយទុកចិត្តលើផែនការរបស់ព្រះអង្គដែលកំពុងបើកសម្ដែង ដោយគ្រប់គ្រងពីលើអ្វីៗទាំងអស់ នៅពេលអតីតកាល បច្ចុប្បន្ន និងពេលអនាគត ។ យើងត្រូវរស់នៅ និងស្លាប់ ដោយជំនឿ ដោយជឿថា ព្រះទ្រង់នឹងសម្រេចគោលបំណងទ្រង់ ក្នុងព្រឹត្តិការណ៍នីមួយៗ ទាំងតូចទាំងធំ ដែលយើងបានស្រមៃ ក៏ដូចជាព្រឹត្តិការណ៍ដែលប្រៀបដូចជាសុបិន្ដអាក្រក់ ។
យើងប្រហែលជាឆ្ងល់ថា ព្រះទ្រង់កំពុងធ្វើអ្វី ក្នុងជីវិតយើង និងក្នុងលោកិយ ។ ការឆ្ងល់ដូចនេះ មិនមែនជារឿងចម្លែកទេ ។ អ្នកប្រហែលមិនអាចយល់ភ្លាមៗ បើអ្នកគ្រាន់តែមើលទៅស្ថានភាពក្នុងពេលបច្ចុប្បន្ន ផ្អែកទៅលើអារម្មណ៍ដែលអ្នកមានភ្លាមៗ ។ កិច្ចការដែលព្រះទ្រង់ធ្វើនៅក្នុង តាមរយៈ ជាមួយ និងសម្រាប់អ្នក មានភាពធំធេងជាងអ្វីដែលអ្នកមើលឃើញក្នុងពេលឥឡូវនេះ ។ ព្រះអង្គគឺជាព្រះដែលស្មោះត្រង់ ដែលរក្សាព្រះបន្ទូលសន្យាតាមសេចក្តីសញ្ញារបស់ព្រះអង្គ ហើយព្រះអង្គគ្រប់គ្រងលើផ្នែកលម្អិតបំផុតនៃជីវិតអ្នក ។ អ្នកត្រូវផ្អែកទៅលើសេចក្តីពិតនេះ ។
ខគម្ពីរជញ្ជឹងគិត៖ សុភាសិត ១៦:១-៩
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៣៧-៣៩ និង កិច្ចការ ១៧:១៦-៣៤