បម្រើ នៅកន្លែងដែលព្រះអង្គដាក់អ្នក
ដោយAlistair Begg
August 1, 2026
«កុំឲ្យគិតស្មានថាព្រះនាងនឹងរួចជីវិត នៅក្នុងដំណាក់ស្ដេច ជាជាងពួកសាសន៍យូដាឯទៀតនោះឡើយ ដ្បិតបើព្រះនាងនឹងស្ងៀមនៅក្នុងវេលានេះ នោះនឹងកើតមានសេចក្ដីសង្គ្រោះ នឹងសេចក្ដីប្រោសឲ្យរួច ដល់ពួកយូដាពីកន្លែងផ្សេងទៀត តែព្រះនាង នឹងញាតិវង្សរបស់បិតានៃព្រះនាង នឹងត្រូវវិនាសវិញ ហើយប្រហែលជាព្រះនាង បានតាំងឡើងក្នុងរាជ្យ សំរាប់ពេលនេះឯងទេដឹង» ។ នាងអេសធើរ ៤:១៣-១៤
នៅពេលដែលព្រះនាងអេសធើរមានការស្ទាក់ស្ទើរ ក្នុងការចូលគាល់ស្តេច អ័ហាស៊ូរ៉ុស អំពីផែនការរបស់ហាម៉ានទាស់ប្រឆាំងមកលើជនជាតិយូដា លោក ម៉ាដេកាយក៏បានឆ្លើយតប ផ្អែកទៅលើទិដ្ឋភាពពិតជាក់ស្តែង និងភាពចាំបាច់នៃការធ្វើអន្តរាគមន៍របស់ព្រះ ។62 គាត់ដឹងថា ព្រះទ្រង់នឹងធ្វើតាមសេចក្តីសញ្ញាដែលទ្រង់បានតាំងនឹងរាស្រ្តទ្រង់ ហើយអាចជ្រើសរើសអ្នកផ្សេង បើសិនជាព្រះនាងអេសធើរនៅតែស្ងៀម មិនព្រមនិយាយអ្វីមួយ ។ ប៉ុន្តែ លោក ម៉ាដេកាយក៏បានសូមឲ្យព្រះនាងព្រះតម្រិះ អំពីការដែលព្រះទ្រង់បានដាក់ព្រះនាង ចំពេល និងចំទីកន្លែង ដើម្បីជួយសង្គ្រោះសាសន៍របស់ព្រះនាង ។ ព្រះនាងបានឈ្នះការប្រកួតបវរកញ្ញា ហើយបានក្លាយជាអគ្គមហេសី ប៉ុន្តែ ព្រះនាងមិនមែនជាអ្នកបង្កើតរូបរាងសម្រស់របស់ខ្លួនឯងនោះទេ ។ ព្រះនាងមិនបានកំណត់ថាច្រមុះរបស់ខ្លួនត្រូវនៅលើមុខយ៉ាងដូចម្តេច ប្រស្រីភ្នែកត្រូវមានពណ៌អ្វី ឬជើងត្រូវវែងប៉ុណ្ណានោះទេ ។ ព្រះទ្រង់ជាអ្នកប្រទានរូបសម្រស់នេះមក ។ លោក ម៉ាដេកាយមិនបានអះអាងថា គាត់មានការយល់ដឹងជាក់លាក់ណាមួយ អំពីបំណងព្រះទ័យព្រះនោះទេ តែគាត់ដឹងថា ព្រះទ្រង់បានដាក់ព្រះនាងអេសធើរ ឲ្យមានកន្លែងពិសេស ដើម្បីបំពេញគោលបំណងពិសេសមួយ ។
យើងមិនតែងតែមានការយល់ឃើញដូចនេះទេ តែទោះជាយ៉ាងណាក៏ដោយ ព្រះទ្រង់បានដាក់យើងម្នាក់ៗ ក្នុងកន្លែងពិសេស ដើម្បីបំពេញគោលបំណងពិសេសមួយ ។ ព្រះអង្គដាក់យើងចំកន្លែង ដែលព្រះអង្គសព្វព្រះទ័យឲ្យយើងនៅ ដើម្បីធ្វើការល្អ ដែលព្រះអង្គបានរៀបចំជាមុន ឲ្យយើងរាល់គ្នាធ្វើ (អេភេសូរ ២:១០) ។ ដូចនេះ ជាជាងប្រាថ្នារកការងារថ្មី ទីកន្លែងថ្មី ឬលទ្ធភាពដើម្បីសម្រេចផែនការដ៏ធំរបស់យើង ចូរយើងទទួលស្គាល់ថា ផែនការរបស់ព្រះអាចរាប់បញ្ចូលការធ្វើការអ្វីដែលយើងកំពុងធ្វើ ដើម្បីថ្វាយសិរីល្អដល់ព្រះអង្គ ។
គ្មានកន្លែងណាដែលល្អឥតខ្ចោះ សម្រាប់បម្រើព្រះ ក្រៅពីកន្លែងដែលព្រះអង្គបានដាក់អ្នកឲ្យនៅនោះទេ ទោះកន្លែងនោះនៅទីណាក៏ដោយ ។ ការយល់ឃើញដូចនេះ អាចកែប្រែការងារបោសសម្អាតអាគារ ឲ្យក្លាយទៅជាការងារបម្រើព្រះ ។ អ្នកមិនមែនជាអគ្គមហេសីដូចព្រះនាងអេសធើរទេ តែតួនាទីរបស់អ្នកក៏សំខាន់ដែរ ។ សេចក្តីពិតនេះជួយអ្នកឲ្យរួចផុតពីការភ័យខ្លាចខ្លួនឯងកំពុងនៅកន្លែងខុស ហើយក៏ជាការជំរុញចិត្តយើងយ៉ាងខ្លាំង ឲ្យបន្តស្តាប់បង្គាប់ព្រះជាម្ចាស់ នៅទីកន្លែងដែលយើងកំពុងនៅ និងក្នុងពេលឥឡូវនេះ ។ ទោះព្រះអង្គដាក់អ្នកនៅកន្លែងណាក៏ដោយ ចូរឆ្លើយតប នៅថ្ងៃនេះ ដោយការស្តាប់បង្គាប់ ចំពោះគោលបំណងដែលព្រះអង្គបានកំណត់ទុកជាមុនសម្រាប់អ្នក ។ នៅពេលដែលអ្នកទៅកន្លែងធ្វើការ ឬទៅសាលារៀន នៅក្នុងទីក្រុង ឬតំបន់ដែលអ្នករស់នៅ ចូរអធិស្ឋានតាមលំនាំបទទំនុកសកលខាងក្រោមនេះ :
ឱព្រះអម្ចាស់ ទូលបង្គំ សូមទៅក្នុងព្រះនាមព្រះអង្គ
ដោយខិតខំធ្វើការងារប្រចាំថ្ងៃ
ទូលបង្គំខិតខំស្គាល់ព្រះអង្គ
ក្នុងការគិត ការនិយាយ ឬការប្រព្រឹត្ត ។
កិច្ចការដែលប្រាជ្ញារបស់ព្រះអង្គបានចាត់តាំង
សូមឲ្យទូលបង្គំសម្រេច ដោយចិត្តក្លៀវក្លា
សូមព្រះវត្តមានព្រះអង្គ នៅក្នុងកិច្ចការទាំងអស់ដែលទូលបង្គំធ្វើ
ហើយបង្ហាញបំណងព្រះទ័យដ៏ល្អ និងឥតខ្ចោះរបស់ព្រះអង្គ ។63
ខគម្ពីរជញ្ជឹងគិត ៖ ១កូរិនថូស ៧:២៥-៣៥
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៥៧-៥៩ និង កិច្ចការ ២១:១៨-៤០