ការបម្រើព្រះមានអំណាចគ្រប់គ្រងអ្វីៗទាំងអស់
ដោយAlistair Begg
August 5, 2026
«ដូច្នេះ តើអ្នករាល់គ្នានឹងធៀបផ្ទឹមព្រះ ដូចជាអ្នកណា ឬប្រៀបទ្រង់នឹងភាពអ្វី? ... គឺព្រះដែលគង់ពីលើរង្វង់ផែនដី ហើយមនុស្សនៅផែនដីប្រៀបដូចជាកណ្ដូបវិញ គឺទ្រង់ដែលលាតផ្ទៃមេឃ ដូចជាលាតបារាំ ហើយសន្ធឹងទៅ ដូចជាត្រសាលសំរាប់អាស្រ័យនៅ ។ ទ្រង់ទំលាក់ងារពួកអ្នកគ្រប់គ្រងឲ្យសូន្យទៅ ក៏ធ្វើឲ្យពួកចៅក្រមនៅផែនដីទៅជាឥតប្រយោជន៍ដែរ» ។ អេសាយ ៤០:១៨,២២-២៣
តើគ្រីស្ទានគួរតែមានទំនាក់ទំនងដូចម្តេចខ្លះ ចំពោះរដ្ឋអំណាច?
យើងមិនគួរស្អប់ខ្ពើមអំណាចរបស់មនុស្សទេ ព្រោះយើងទទួលស្គាល់ថា ព្រះទ្រង់នៅពីក្រោយការរៀបចំប្រទេសឲ្យមានអ្នកដឹកនាំ ។ បើយើងយល់ឃើញថា ព្រះគម្ពីរប៊ីបគឺជាសៀវភៅបដិវត្តន៍សម្រាប់ផ្តួលរំលំរដ្ឋាភិបាល នោះយើងត្រូវដកខគម្ពីរមួយផ្នែកធំ ចេញពីព្រះគម្ពីរប៊ីប ។ ប៉ុន្តែ ម្យ៉ាងទៀត យើងក៏ដឹងផងដែរថា គ្មានមនុស្សណា ដែលមានអំណាចធំបណ្តាច់ ឬអចិន្ត្រៃយ៍នោះទេ ។ ព្រះទ្រង់ជាអ្នកជ្រើសតាំងអ្នកដឹកនាំ តែព្រះអង្គក៏បានរៀបផែនការឲ្យពួកគេធ្លាក់ចុះផងដែរ ។ ទោះពួកគេហាក់ដូចជាមានអំណាចយ៉ាងណាក៏ដោយ នៅពេលណាមួយ រដូវកាលណាមួយ ឬថែមទាំងក្នុងពេលមួយជីវិតក៏ដោយ ក៏ក្នុងរយៈពេលដ៏ខ្លី ពួកគេនឹងបាត់បង់អំណាច ហើយក្នុងករណីភាគច្រើន ពិភពលោកនឹងមិននឹកចាំពួកគេទៀតទេ ។
យើងត្រូវតែចាំថា យើងកំពុងបម្រើនរណា គឺបម្រើព្រះមានអំណាចគ្រប់គ្រងទាំងស្រុង ហើយបើប្រៀបធៀបជាមួយព្រះអង្គ អ្នកដឹកនាំដទៃទៀត គឺជា «សត្វកណ្តូប» ។ ដូចនេះ ពេលណាអំណាចរបស់មនុស្ស ព្យាយាមប្រឆាំងអំណាចរបស់ព្រះ យើងត្រូវតែសួរដូចពួកសាវ័កថា «បើគួរគប្បីនៅចំពោះព្រះ ឲ្យយើងខ្ញុំស្ដាប់តាមលោករាល់គ្នា ជាជាងស្ដាប់តាមព្រះ នោះសូមពិចារណាចុះ» (កិច្ចការ ៤:១៩) ហើយយើងក៏ត្រូវឆ្លើយតប តាមគំរូរបស់ពួកគេផងដែរ ។
ក្នុងបទគម្ពីរកិច្ចការ ជំពូក៤ ពួកសាវ័កបានជាប់គុករយៈពេលមួយយប់ បន្ទាប់ពីគាត់ប្រោសមនុស្សខ្វិនឲ្យជា ។ នៅពេលគេដោះលែងពួកគេ ពួកគេក៏បានជួបជុំគ្នាជាមួយអ្នកជឿដទៃទៀត ហើយក៏មានទស្សនៈត្រឹមត្រូវជាថ្មីទៀត ដោយនឹកចាំថា ពួកគេបម្រើព្រះអម្ចាស់ដែលមានអធិបតេយ្យភាព ព្រះអាទិករនៃផែនដី និងសមុទ្រ និងអ្វីៗគ្រប់យ៉ាង នៅលើផែនដី (កិច្ចការ ៤:២៤-២៦) ។ ក្នុងការអនុវត្តតាមសេចក្តីពិតនេះ ពួកគេទទួលស្គាល់ថា ទោះពួកគេស្ថិតនៅក្រោមអំណាចរបស់ចក្រភពរ៉ូម៉ាំង ហើយប្រឈមមុខដាក់ការបៀតបៀនរបស់អ្នកដឹកនាំសាសនាយូដា អ្នកដឹកនាំទាំងអស់នេះ គ្រាន់តែកំពុងធ្វើការអ្វី ដែលព្រះហស្ត និងផែនការទ្រង់បានតម្រូវទុកជាមុន ឲ្យពួកគេធ្វើ» (ខ.២៨) ខណៈពេលដែលព្រះយេស៊ូវ ដ៏ជាក្សត្រ បានបង្គាប់ពួកគេឲ្យផ្សាយដំណឹងល្អ ដល់ចុងបំផុតនៃផែនដី ។ ពួកគេបន្តផ្សាយដំណឹងល្អ ដោយចិត្តក្លាហាន និងបើកចំហ ដោយទស្សនៈយ៉ាងដូចនេះឯង ។
តើយើងអាចធ្វើដូចនេះ ក្នុងសម័យរបស់យើងដែរឬទេ? តើយើងនឹងស្តាប់បង្គាប់ព្រះ ហើយចែកចាយអំពីព្រះគ្រីស្ទ ទោះមនុស្សដែលមានអំណាចមកលើយើងនៅលើផែនដី កំពុងបង្ខំយើងឲ្យបិទមាត់ ឬមានការបន្ថែមបន្ថយឬ? តើមានអ្វីធ្វើឲ្យយើងបិទមាត់? ចម្លើយនោះគឺ ដោយសារយើងភ្លេចថា ព្រះទ្រង់មានអំណាចគ្រប់គ្រងទាំងស្រុង ហើយប្រជាជាតិ និងអ្នកដឹកនាំពិភពលោក ស្ថិតនៅក្រោមអំណាចរបស់ព្រះអង្គ ។ ពេលណាយើងភ្លេចរឿងនេះ យើងចុះចូលច្បាប់របស់មនុស្ស ដែលធ្វើឲ្យយើងមានការភ័យខ្លាច មិនហ៊ានប្រាប់នរណាម្នាក់ថា មានតែព្រះយេស៊ូវទេ ដែលជាព្រះអង្គសង្គ្រោះ ។ តើអ្នកបានភ្លេចថា ព្រះយេស៊ូវមានអំណាចគ្រប់គ្រង ជាក្សត្រហើយឬ? តើមនុស្សដែលប្រៀបដូចជាសត្វកណ្តូបនៅចំពោះព្រះ បានក្លាយជាមានអំណាចធំពេក នៅចំពោះអ្នក បានជាអ្នកស្តាប់តាមពាក្យសម្តីរបស់ពួកគេឬ? ពុំនោះទេ ចូរយើងចូលរួមជាមួយអ្នកជឿសម័យដើម ដោយចងចាំ ទទួលស្គាល់ និងប្រកាសសេចក្តីពិត ដែលថា ព្រះទ្រង់គឺជាព្រះអាទិករដែលមិនអាចប្រៀបផ្ទឹមបាន ហើយព្រះអង្គមានអំណាចលើអ្វីៗទាំងអស់ ។
ខគម្ពីរជញ្ជឹងគិត ៖ ដានីយ៉ែល ៦:១-២៨
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ៦៨-៦៩ និង កិច្ចការ ២៤