អំណាចពិតប្រាកដ នៅក្នុងព្រះវិញ្ញាណបរិសុទ្ធ
ដោយAlistair Begg
August 23, 2026
«មិនមែនដោយឥទ្ធិឫទ្ធិ ឬដោយអំណាចទេ គឺដោយសារវិញ្ញាណរបស់អញវិញ» ។ សាការី ៤:៦
នៅពេលណាមួយក្នុងជីវិត យើងប្រឈមមុខដាក់បញ្ហាក្នុងជីវិត ដែលធ្វើឲ្យយើងចង់សួរថា តើការលំបាកទាំងអស់នេះមានប្រយោជន៍អ្វីសម្រាប់ខ្ញុំ? ហេតុអ្វីខ្ញុំចាំបាច់ត្រូវខិតខំបន្តទៀត? ហេតុអ្វីខ្ញុំចាំបាច់ត្រូវប្រឈមមុខដាក់ទុក្ខលំបាក និងការប្រឆាំងទាំងអស់នេះ? ជួនកាលពួកជំនុំ និងគ្រីស្ទាននៅសតវត្សរ៍ទី២១ កំពុងតែរស់នៅ និងមានដំណើរជីវិត ធ្វើមើលតែពួកគេកំពុងជួបការបាក់ទឹកចិត្ត ជាជាងមានចិត្តរីករាយ និងអរសប្បាយ ចំពោះថ្ងៃដែលព្រះអង្គបានបង្កើត (ទំនុកដំកើង ១១៨:២៤) ។
ការបាក់ទឹកចិត្តខ្លះមានលក្ខណៈដែលយើងអាចយល់បាន ។ ប៉ុន្តែ យើងមិនចង់រស់នៅ ជាមួយបញ្ហាទាំងនោះគ្រប់ពេលវេលាទេ ហើយយើងក៏មិនចាំបាច់ត្រូវរស់នៅបែបនេះដែរ ។ ការបាក់ទឹកចិត្តរបស់យើង មិនគួរបណ្តាលចិត្តយើងឲ្យជឿថា ព្រះទ្រង់ឈប់ធ្វើការក្នុងជីវិតយើងនោះទេ ។ តាមពិត ជួនកាល ព្រះទ្រង់ធ្វើការ តាមរបៀបដែលគួរឲ្យស្ញប់ស្ញែង ឬមិនដូចដែលយើងចង់បាននោះទេ ។ ប៉ុន្តែ «អ្នកខ្លះពឹងនឹងរទេះចំបាំង ខ្លះទៀតពឹងនឹងសេះ តែយើងខ្ញុំនឹងនឹកចាំពីព្រះនាមព្រះយេហូវ៉ា ជាព្រះនៃយើងខ្ញុំវិញ» (ទំនុកដំកើង ២០:៧) ។ ក្នុងសមរភូមិដ៏ក្តៅគគុក សព្វាវុធដូចជារទេះចម្បាំង និងសេះ ពិតជាធ្វើឲ្យគេមានការភ័យខ្លាច ។ កងទ័ពខាងណាដែលមានកម្លាំងទ័ព និងអាវុធខ្លាំងជាង ហាក់ដូចជាមានឱកាសឈ្នះច្រើនជាង តែយើងមិនត្រូវភ្លេចទេថា ព្រះទ្រង់តែងតែធ្វើការក្នុងចំណោមរាស្រ្តទ្រង់ ហើយព្រះអង្គនឹងប្រទានជ័យជម្នះ មិនមែនដោយអំណាច ឬដោយឥទ្ធិឫទ្ធិនោះទេ តែដោយព្រះវិញ្ញាណរបស់ព្រះអង្គ ។
គ្មានអ្វីអាចជំនួសកិច្ចការនៃព្រះវិញ្ញាណបរិសុទ្ធក្នុងជីវិតយើង និងពួកជំនុំរបស់យើងឡើយ ទោះទ្រព្យសម្បត្តិ ឥទ្ធិពល យុទ្ធសាស្រ្ត ឬសមត្ថភាពអ្វីក៏ដោយ ។ ឧទាហរណ៍ ចូរយើងគិតអំពីការដឹកនាំរបស់ពួកជំនុំនៅគ្រាសញ្ញាចាស់ ។ អ្នកដឹកនាំរបស់ពួកគេជាបុរសដែលក្លាហាន និងសកម្ម ភាគច្រើនគឺដោយសារពួកគេចំណាយពេលច្រើនជាមួយព្រះយេស៊ូវ ។ ប៉ុន្តែ ហើយនៅពេលដែលពួកគេត្រូវផ្សាយដំណឹងល្អ តើព្រះយេស៊ូវបានធ្វើអ្វី? គឺព្រះអង្គ «ហាមមិនឲ្យគេចេញពីក្រុងយេរូសាឡិមឡើយ ដោយបន្ទូលថា ត្រូវឲ្យនៅចាំសេចក្ដីសន្យានៃព្រះវរបិតា ដែលអ្នករាល់គ្នាបានឮខ្ញុំថ្លែងប្រាប់ហើយ» (កិច្ចការ ១:៤) គឺព្រះបន្ទូលសន្យា អំពីការយាងចុះមកនៃព្រះវិញ្ញាណបរិសុទ្ធ ។ បើគ្មានអំណាចនៃព្រះវិញ្ញាណបរិសុទ្ធទេ នោះពួកសាវ័កមិនអាចធ្វើការងារបម្រើព្រះបានទេ ទោះពួកគេមានសមត្ថភាព ឬមានការប្ដេជ្ញាចិត្តខ្លាំងប៉ុណ្ណាក៏ដោយ ។ ដោយមានការដឹកនាំពីព្រះវិញ្ញាណបរិសុទ្ធ ពួកគេក៏បានចាប់ផ្តើមចលនា ដែលនាំមកនូវការផ្លាស់ប្តូរ ក្នុងពិភពលោក ។
ក្នុងសម័យរបស់យើង យើងចាំបាច់ត្រូវចាំថា សមិទ្ធផលដែលយើងអាចសម្រេចបានសម្រាប់នគរព្រះ មិនដែលកើតមាន គ្រាន់តែដោយសារយើងមានមុខដំណែងខ្ពង់ខ្ពស់ក្នុងសង្គម មានកុងធនាគារដែលធំជាង ឬមានអំណាចដែលខ្លាំងជាង ក្នុងលោកិយនោះទេ ។ ផ្ទុយទៅវិញ យើងពឹងផ្អែកលើព្រះវិញ្ញាណព្រះធ្វើការ នៅកន្លែងណាដែលព្រះអង្គសព្វព្រះទ័យ តាមរបៀបរបស់ទ្រង់ ។ និយាយរួម គំនិតរបស់ព្រះ មិនដូចគំនិតយើងទេ ហើយផ្លូវយើងក៏មិនដូចផ្លូវព្រះអង្គដែរ ។ ប្រាជ្ញារបស់ព្រះអង្គខ្ពង់ខ្ពស់ជាងយើង ដូចផ្ទៃមេឃដែលខ្ពស់លើផែនដីយ៉ាងដូច្នោះដែរ (អេសាយ ៥៥:៨-៩) ។ បើក្នុងជម្រៅចិត្តអ្នក អ្នកមានការពឹងផ្អែកលើខ្លួនឯង ចូរចាំថា នគរព្រះនឹងមិនចម្រើនឡើង ក្នុងជីវិតអ្នក ឬតាមរយៈការធ្វើបន្ទាល់ និងការងារបម្រើព្រះ ដែលអ្នកកំពុងធ្វើឡើយ បើសិនជាព្រះវិញ្ញាណមិនធ្វើការទេនោះ ។ បើក្នុងជម្រៅចិត្តអ្នក មានការបាក់ទឹកចិត្ត ចូរចាំថា នគរព្រះនឹងចម្រើនឡើង ក្នុងជីវិតអ្នក និងតាមរយៈការធ្វើបន្ទាល់របស់អ្នក ព្រោះព្រះវិញ្ញាណបរិសុទ្ធកំពុងធ្វើការ ។ ចូរកុំទុកចិត្តលើរទេះចម្បាំង ឬសេះឡើយ តែទុកចិត្តលើព្រះអម្ចាស់របស់អ្នកវិញ ។
ខគម្ពីរជញ្ជឹងគិត ៖ ទំនុកដំកើង ១១៥
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ១១៣-១១៥ និង ២កូរិនថូស ២