គ្មានជ័យជម្នះធំជាងនេះទៀត
ដោយAlistair Begg
September 4, 2026
«ហេតុនោះ នៅជាន់នេះ អ្នកណាដែលនៅក្នុងព្រះគ្រីស្ទយេស៊ូវ នោះគ្មានទោសសោះ» ។ រ៉ូម ៨:១
មានការយល់ច្រឡំជាទូទៅមួយ អំពីជំនឿលើព្រះគ្រីស្ទ ដែលគេយល់ឃើញថា ព្រះទ្រង់ទតឃើញមនុស្សម្នាក់ៗជាតារាងពិន្ទុ ដែលចែកចេញជាពីរ ។ ម្ខាងកត់ត្រាអំពីអំពើបាប និងបរាជ័យក្នុងការតយុទ្ធនឹងអំពើបាប ហើយម្ខាងទៀត កត់ទុកការល្អ និងជ័យជម្នះដែលយើងមានមកលើបាប ។ គេសន្និដ្ឋានថា ដរាបណា អំពើល្អរបស់យើង មានច្រើនជាងអំពើអាក្រក់ នោះគឺគ្រប់គ្រាន់ល្មមនឹងឲ្យព្រះទ្រង់ទទួលយកយើង ចូលស្ថានសួគ៌ហើយ ប៉ុន្តែ តើនេះជាការពិតទេ? ប៉ុន្តែ តាមពិត បើយើងរាប់បាបរបស់យើង ធៀបនឹងចំនួនការស្តាប់បង្គាប់របស់យើង យើងតែងតែគ្មានសង្ឃឹមថានឹងរួចពីបាបឡើយ ។ គឺមិនអាចប្រកួតគ្នាបានទេ ។ គឺដូចជាក្រុមកីឡាករអាជីពប្រកួតជាមួយក្រុមកីឡាករកុមារយ៉ាងដូច្នោះដែរ ។ ទោះជាយ៉ាងណាក៏ដោយ មានមនុស្សជាច្រើនបានបោកខ្លួនឯង ឲ្យគិតថា យើងមានពេលវេលា សម្រាប់ធ្វើល្អឡើងវិញ មុនពេលយើងស្លាប់ ឬខិតខំធ្វើអំពើល្អ ឲ្យបានគ្រប់គ្រាន់ ដើម្បីមានជ័យជម្នះលើបាប ។ ការគិតឃើញដូចនេះ មិនបានស្របតាមដំណឹងល្អនោះទេ ។ ហើយបានមើលរំលងព្រះគុណព្រះទាំងស្រុង ។
យើងអាចឈរនៅចំពោះព្រះបាន មិនមែនដោយសារពិន្ទុ នៃការប្រព្រឹត្តល្អនោះទេ ។ តែគឺដោយសារការអ្វីដែលព្រះគ្រីស្ទបានធ្វើសម្រាប់យើង ។ ក្នុងសំបុត្រដែលសាវ័កប៉ុលបានសរសេរផ្ញើពួកជំនុំ នៅទីក្រុងអេភេសូរ គាត់បានបញ្ជាក់ថា សេចក្តីសង្គ្រោះ «មិនមែនកើតពីអ្នករាល់គ្នាដែរ គឺជាអំណោយទានរបស់ព្រះវិញ» (អេភេសូរ ២:៨)។ ព្រះគ្រីស្ទមានពិន្ទុល្អឥតខ្ចោះ ដែលបានជំនួសឲ្យពិន្ទុរបស់យើង គឺជាអំណោយឥតគិតថ្លៃ ។ យើងមិនអាចខំធ្វើការល្អ ឲ្យមានសេចក្តីសុចរិតដែលឥតខ្ចោះ ដូចព្រះអង្គបានឡើយ ។
នៅពេលដែលអ្នកចាប់ផ្តើមយល់អត្ថន័យរបស់ដំណឹងល្អ អ្នកប្រហែលជាគិតថា ដំណឹងល្អហាក់ដូចជាផ្តល់ភាពងាយស្រួលពេក អ្នកមិនអាចជឿបានទេ ។ តើនរណាសក្តិសមនឹងទទួលព្រះគុណដ៏លើសលប់ដូចនេះ? ប៉ុន្តែ នោះហើយជាអត្ថន័យនៃព្រះគុណព្រះ ។ សេចក្តីសង្គ្រោះរបស់យើងគឺជាអំណោយ ដែលយើងមិនសមនឹងទទួលទាល់តែសោះ ។ យើងមិនសមនឹងទទួលនៅពេលឥឡូវនេះ ហើយក៏មិនអាចទទួល ដោយសមត្ថភាពខ្លួនឯងបានដែរ ។ ប៉ុន្តែ ទោះជាយ៉ាងណាក៏ដោយ ព្រះទ្រង់ប្រទានសេចក្តីមេត្តាដល់យើង ។ ព្រះអង្គប្រកាសថា យើងមានជ័យជម្នះ មិនមែនការដាក់ទោសទេ! គឺដោយសារព្រះយេស៊ូវគ្រីស្ទតែប៉ុណ្ណោះ ។
ក្នុងការរស់នៅជាគ្រីស្ទបរិស័ទ យើងចេះតែចង់ដាក់ពិន្ទុឲ្យខ្លួនឯងឡើយ ។ ក្នុងសំបុត្រដែលសាវ័កប៉ុលសរសេរផ្ញើទៅពួកជំនុំនៅទីក្រុងកាឡាទី គាត់បានជំរុញពួកគេមិនឲ្យបោះបង់ចោលព្រះគុណព្រះឡើយ ។ យើងតែងតែចាំបាច់ត្រូវតយុទ្ធ ដើម្បីឲ្យនឹកចាំថា គឺដោយសារព្រះគ្រីស្ទ ហើយទាល់តែនៅក្នុងព្រះគ្រីស្ទ មិនមែនក្នុងការប្រព្រឹត្តរបស់យើងទេ ទើបយើងអាចអរសប្បាយ ដោយដឹងថា យើង «មិនមានទោស» ។ តើអ្នកបានបាត់បង់អំណរចំពោះសេចក្តីសង្គ្រោះហើយឬ? អ្នកបាត់បង់អំណរ ទំនងដោយសារអ្នកមើលទៅខ្លួនឯងខ្លាំងពេក ហើយមើលទៅព្រះយេស៊ូវតិចពេក ។ ក្នុងការរស់នៅជាគ្រីស្ទាន អ្នកមិនចាំបាច់ត្រូវអស់សង្ឃឹម ហើយក៏មិនត្រូវមានអំនួតឡើយ ព្រោះអ្នកមិនមែនជាចំណុចស្នូលនៃសេចក្តីសង្គ្រោះទេ តែព្រះយេស៊ូវទេ ដែលជាចំណុចស្នូល ។
ក្នុងព្រះយេស៊ូវគ្រីស្ទ ព្រះទ្រង់ប្រទានជ័យជម្នះ ។ គ្មានអំណោយល្អជាង គ្មានជ័យជម្នះធំជាង និងគ្មានអំណរប្រសើរជាងនេះឡើយ ។
ខគម្ពីរជញ្ជឹងគិត៖ កាឡាទី ៤:២១-៥:១
គម្រោងអានព្រះគម្ពីររយៈពេល១ឆ្នាំ៖ ទំនុកដំកើង ១៤៣-១៤៥ និង ២កូរិនថូស ១៣