គិតដល់សុខុមាលភាពអ្នកដទៃ
ដោយAlistair Begg
September 20, 2026
«រីឯអស់ទាំងកិច្ចការនៃព្រះចេស្ដា នឹងឥទ្ធិឫទ្ធិរបស់ទ្រង់ ព្រមទាំងរឿងសព្វគ្រប់ពីសក្តិយសរបស់ម៉ាដេកាយ ដែលស្ដេចបានតាំងលោកឡើងដល់ថ្នាក់ណា នោះសុទ្ធតែបានកត់ទុក ក្នុងសៀវភៅរបាក្សត្ររបស់ពួកស្ដេចសាសន៍មេឌី នឹងសាសន៍ពើស៊ីហើយ ដ្បិតម៉ាដេកាយ ជាសាសន៍យូដា លោកជាអ្នកបន្ទាប់នឹងស្ដេចអ័ហាស៊ូរុសនោះឯង ហើយក៏ជាអ្នកធំក្នុងពួកសាសន៍យូដា ព្រមទាំងមានពួកបងប្អូនលោកយ៉ាងសន្ធឹករាប់អានផង ដោយលោករកតែសេចក្ដីល្អដល់សាសន៍របស់ខ្លួន ហើយនិយាយជាពាក្យស្រគត់ស្រគំដល់ជាតិផង» ។ នាងអេសធើរ ១០:២-៣
នៅពេលខ្លះ ក្នុងប្រវត្តិសាស្រ្ត មានមនុស្សម្នាក់លេចមុខឡើង ហើយបើគ្មានវត្តមានរបស់គាត់ទេ អ្វីៗនឹងមានភាពខុសប្លែកពីអ្វីដែលយើងមើលឃើញក្នុងពេលសព្វថ្ងៃ ។ ក្នុងចំណោមអ្នកទាំងនោះ គឺមានលោក វីនស្តុន ឈើឈីល (Winston Churchill)ជាអតីតនាយករដ្ឋមន្ត្រីអង់គ្លេស ជារដ្ឋបុរស និងអ្នកការពារសេរីភាព ។ គ្មានសិស្សប្រវត្តិសាស្រ្តណា ដែលអាចបដិសេធ តួនាទីដ៏សំខាន់របស់លោកឈើឈីល ក្នុងការនាំមកនូវការផ្លាស់ប្តូរ ក្នុងប្រវត្តិសាស្រ្តសង្គ្រាមលោកលើកទី២ និងផលវិបាកនៃសង្គ្រាមនេះនោះឡើយ ។ ប៉ុន្តែ ជាញឹកញាប់ ជំនោរនៃប្រវត្តិសាស្រ្តហាក់ដូចជាឡើងចុះ ដោយសារសកម្មភាពរបស់មនុស្សណាម្នាក់ មិនអាចរារាំងបានដំណើរទៅមុខនៃប្រវត្តិសាស្រ្តបានទេ ប៉ុន្តែ អ្នកនៅតែអាចគិត អំពីសកម្មភាពរបស់បុគ្គលណាម្នាក់ ក្នុងប្រទេសជាតិ និងសង្គមរបស់អ្នក ដែលបានធ្វើឲ្យប្រវត្តិសាស្រ្តផ្លាស់ប្តូរទិសដៅ តាមរបៀបច្បាស់លាស់ណាមួយ ។
កាលពីសតវត្សរ៍ទី៥មុនគ្រីស្ទសករាជ លោក ម៉ាដេកាយ គឺជាបុគ្គលដែលមានលក្ខណៈសម្បត្តិដូចនេះឯង ។ ព្រឹត្តិការណ៍នៃជីវិតគាត់ ត្រូវបានកត់ទុកក្នុងពង្សាវតារនៃជនជាតិមីឌី និងពើស៊ី ព្រោះបើគាត់មិនបានលេចមុខចេញមកទេ អ្វីៗប្រាកដជាកើតឡើងខុសពីនេះ ។
លោក ម៉ាដេកាយ មិនមែនជាជនជាតិពើស៊ីទេ ។ គាត់ជាជនជាតិយូដា និងបានរស់នៅជាជនជាតិយូដាដោយថ្វាយព្រះកិត្តិនាមដល់ព្រះ (ព្រះពិតតែមួយ)ដោយរស់នៅតាមរបៀបខុសពីគាត់ និងប្រកាន់ខ្ជាប់ប្រពៃណីខុសពីសាសន៍ពើស៊ី ។ ទោះគាត់មានភាពខុសប្លែកយ៉ាងខ្លាំងពីគេក៏ដោយ ក៏គាត់បានទទួលកិត្តិយសពីជនជាតិពើស៊ី មិនមែនដោយសារគាត់ចាក់ខ្សែ ឬព្យាយាមផ្គាប់ព្រះទ័យស្តេចអ័ហាស៊ូរុស តែដោយសារគាត់មានភាពទៀងត្រង់ និងមានក្រមសីលធម៌ដ៏នឹងនរ ។ លោក ម៉ាដេកាយ មិនបានព្យាយាមធ្វើឲ្យគេចូលចិត្តគាត់ទេ ។ តែគាត់ព្យាយាមធ្វើអ្វីដែលត្រឹមត្រូវ គឺអ្វីដែលព្រះទ្រង់បានឲ្យគាត់ធ្វើ ។
នៅពេលដែលនរណាម្នាក់បានទទួលមុខតំណែងមានឥទ្ធិពល ពួកគេច្រើនតែមានគេមិនចូលចិត្ត ដោយសារការច្រណែន ។ ប្រជាប្រិយភាពដ៏ស្ថិតស្ថេរដែលលោក ម៉ាដេកាយមាន ក្នុងចំណោមជនរួមជាតិយូដា មិនមែនជារឿងចម្លែកទេ ។ អាចមកពីគាត់យកចិត្តទុកដាក់ចំពោះពួកគេ ។ គាត់មិនបានកាត់ផ្តាច់ខ្លួនចេញ ឬលែងមានចំណាប់អារម្មណ៍ចំពោះប្រជាជនរបស់គាត់នោះទេ ប៉ុន្តែ ផ្ទុយទៅវិញគាត់បានប្រើមុខតំណែងរបស់គាត់ ដើម្បីសុខុមាលភាពរបស់អ្នកដទៃ ជាជាងធ្វើឲ្យខ្លួនឯងមានបាប និងដើម្បីនិយាយ «ពាក្យសន្តិភាពទៅកាន់ប្រជាជនរបស់គាត់» ។72 ចូរយើងរៀនសូត្រពីលោក ម៉ាដេកាយ ។ ចូរដាក់គោលដៅធ្វើអ្វីដែលត្រឹមត្រូវ អ្វីដែលព្រះទ្រង់ឲ្យអ្នកធ្វើ នៅកន្លែង និងពេលវេលា ដែលព្រះអង្គបានកំណត់ឲ្យអ្នក ។ ចូរយកគំរូតាមគាត់ ហើយតាមរយៈកេរដំណែលរបស់អ្នក គេនឹងបានដឹងថា ដោយសារអ្នកមានគំនិតដែលចង់ផ្គាប់ព្រះទ័យព្រះ អ្នកក៏មានគំនិតដែលគិតដល់អ្នកដទៃ ធ្វើអ្វីៗដែលអ្នកអាចធ្វើបាន ដើម្បីនាំឲ្យពួកគេទទួលបានការសម្រាក សុខុមាលភាព សន្តិភាព និងការរីកចម្រើន ។ ការប្រព្រឹត្តរបស់អ្នកប្រហែលមិនទំនងជាត្រូវគេកត់ទុកក្នុងសៀវភៅប្រវត្តិសាស្រ្តពិភពលោកនោះទេ ប៉ុន្តែ ព្រះទ្រង់នឹងកត់ទុក ហើយឲ្យតម្លៃអស់កល្បជានិច្ច ។
ខគម្ពីរជញ្ជឹងគិត៖ នាងអេសធើរ ១០:១-៣
គម្រោងអានព្រះគម្ពីររយៈពេល១ឆ្នាំ៖ អេសេគាល ១-២ និង យ៉ូហាន ៨:៣០-៥៩