ឯកសិទ្ធិដែលបានទទួលព្រះបន្ទូលទ្រង់
ដោយAlistair Begg
September 21, 2026
«ដ្បិតព្រះចេស្ដានៃព្រះបានផ្ដល់ឲ្យយើងរាល់គ្នាមានគ្រប់ទាំងអស់ ខាងឯជីវិត នឹងសេចក្ដីគោរពប្រតិបត្តិដល់ព្រះ ដោយយើងបានស្គាល់ព្រះអង្គ ដែលទ្រង់ហៅយើងរាល់គ្នាមក ដោយសារសិរីល្អ នឹងសគុណរបស់ទ្រង់» ។ ២ពេត្រុស ១:៣
តើអ្នកធ្លាប់បានឈប់បង្អង់ ដើម្បីពិចារណា អំពីឯកសិទ្ធិ ដែលអ្នកមាន ក្នុងការអានព្រះបន្ទូលព្រះ ស្ទើរតែគ្មានដែនកំណត់ឬទេ? សព្វថ្ងៃនេះ យើងអាចដាក់ព្រះគម្ពីរតាមខ្លួន ក្នុងហោប៉ៅ ហើយបើកមើលជំពូក និងខណាមួយ ឬថែមទាំងស្វែងរកពាក្យណាមួយ ក្នុងព្រះគម្ពីរទាំងមូល ក្នុងរយៈពេលតែពីរបីវិនាទីប៉ុណ្ណោះ ។
សម័យនេះ ការដែលយើងអាចបើកមើលព្រះគម្ពីរនៅពេលណាក៏បាន មិនមែនជារឿងចម្លែកទេ ។ ប៉ុន្តែ យើងគួរតែចាត់ទុកថា យើងមានកិត្តិយសណាស់ដែលអាចធ្វើដូចនេះបាន! ព្រះដែលជាអ្នកនិពន្ធកណ្ឌគម្ពីរទាំងអស់ ទ្រង់បានបង្កើតស្ថានសួគ៌ ដោយប្រើអង្គុលីរបស់ទ្រង់ (ទំនុកដំកើង ៨:៣)។ ព្រះអង្គបានបណ្តាលចិត្តគេឲ្យនិពន្ធព្រះគម្ពីរ (២ធីម៉ូថេ ៣:១៦)។ ពាក្យពេចន៍ក្នុងព្រះគម្ពីរប៊ីប មានតម្លៃលើសមាសដែលសុទ្ធបំផុត (ទំនុកដំកើង ១៩:១០)ហើយសេចក្តីពិតក្នុងព្រះគម្ពីរប៊ីបក៏ស្ថិតស្ថេរជារៀងរហូត (១ពេត្រុស ១:២៤)។ ព្រះគម្ពីរប៊ីបមានអ្វីៗគ្រប់យ៉ាង ដែលយើងត្រូវការ សម្រាប់ជីវិត និងការគោរពប្រតិបត្តិព្រះ ហើយគ្មានអ្វីដែលយើងមិនត្រូវការនោះឡើយ ។ កថាខណ្ឌនីមួយៗមានលក្ខណៈពិសេសផ្សេងគ្នា ក្នុងការរួមផ្សំជាព្រះគម្ពីរទាំងមូល តែផ្នែកនីមួយៗរួមចំណែក ក្នុងការសរសេររឿងធំបំផុតមួយ ។ ដែលសំខាន់បំផុតនោះគឺ ព្រះគម្ពីរប៊ីបគឺជាមធ្យោបាយដែលព្រះវិញ្ញាណប្រើ ដើម្បីនាំយើងយល់កាន់តែស៊ីជម្រៅអំពីព្រះ ដែលជាការប្រកបជិតស្និទ្ធនឹងព្រះអង្គ ។ ដោយសារពាក្យជាភាសាក្រិក ដែលសាវ័កពេត្រុសប្រើ គឺពាក្យ epignosis មានន័យថា ការស្គាល់ដោយមានទំនាក់ទំនង គឺមិនគ្រាន់តែជាការស្គាល់ក្នុងផ្លូវបញ្ញាប៉ុណ្ណោះទេ ។ តាមរយៈព្រះបន្ទូលព្រះ យើងស្គាល់ព្រះអាទិកររបស់យើង ដោយភាពជិតស្និទ្ធកាន់តែខ្លាំង ដែលព្រះអង្គជាអ្នកបង្កើតយើងមក ដើម្បីថ្វាយសិរីល្អ និងអរសប្បាយក្នុងព្រះអង្គជារៀងរហូត ។73
ក្នុងការអធិស្ឋានវែងបំផុតរបស់ព្រះអម្ចាស់យេស៊ូវ ដែលព្រះគម្ពីរបានកត់ទុក ព្រះអង្គបានអធិស្ឋានឲ្យរាស្រ្តទ្រង់ ដោយចំណាយពេលជាច្រើនម៉ោង ។ ក្នុងការទូលសូមមួយនោះ ព្រះអង្គបានអធិស្ឋានថា «សូមញែកគេចេញជាបរិសុទ្ធ ដោយសារសេចក្ដីពិតរបស់ទ្រង់ ឯសេចក្ដីពិត គឺជាព្រះបន្ទូលរបស់ទ្រង់» (យ៉ូហាន ១៧:១៧)។ ព្រះយេស៊ូវជ្រាបអំពីអំណាចនៃព្រះបន្ទូលព្រះ ។ កាលទ្រង់ត្រូវអារក្សល្បួង នៅវាលរហោស្ថាន ព្រះអង្គបានឆ្លើយតប ដោយប្រើសេចក្តីពិតក្នុងព្រះគម្ពីរ ។ នៅពេលមួយនោះ ព្រះអង្គបានដកស្រង់សម្តីរបស់លោក ម៉ូសេ ក្នុងបទគម្ពីរចោទិយកថា ៨:៣ ហើយបានបញ្ជាក់ដល់យើងម្តងទៀតថា «មនុស្សមិនមែនរស់ ដោយសារតែនំប៉័ងប៉ុណ្ណោះទេ គឺរស់ដោយសារគ្រប់ទាំងព្រះបន្ទូល ដែលចេញពីព្រះឱស្ឋព្រះមកដែរ» (ម៉ាថាយ ៤:៤)។ បើព្រះយេស៊ូវគ្រីស្ទពឹងផ្អែកលើព្រះបន្ទូលព្រះ ដើម្បីកម្លាំងខាងវិញ្ញាណ ក្នុងព្រះជន្មព្រះអង្គជាមនុស្ស តើយើងត្រូវការព្រះបន្ទូលជាងអម្បាលម៉ានទៀត?
ជួនកាល ការមានភាពងាយស្រួល ក្នុងការទទួលបានអ្វីមួយ បណ្តាលឲ្យយើងមើលរំលងឯកសិទ្ធិ ក្នុងការមានវា ដូចជាទឹក ឬអគ្គិសនីជាដើម ។ នៅពេលដែលយើងមានទឹកងូត និងអគ្គិសនីប្រើប្រាស់ស្រួល យើងស្ទើរតែមិនដែលខ្វល់អំពីពួកវា ។ ប៉ុន្តែ យើងពិតជាមានការកត់សំគាល់ នៅពេលដែលយើងខ្វះពួកវា! ចូរយើងកុំប្រព្រឹត្តចំពោះព្រះបន្ទូលព្រះយ៉ាងដូចនេះឡើយ ។ ព្រះទ្រង់បានប្រទានអំណោយដល់យើង ឲ្យមានផ្លូវចូលទៅរកសេចក្តីពិតរបស់ព្រះអង្គ យ៉ាងងាយស្រួល ក្នុងពេលសព្វថ្ងៃ ។ ហេតុអ្វីយើងមិនចាប់កាន់ព្រះគម្ពីរអាន? តើអ្នកនឹងជ្រួតជ្រាបក្នុងព្រះគម្ពីរ ហើយទទួលពន្លឺនៃសេចក្តីពិត ដែលមានអ្វីៗទាំងអស់ដែលអ្នកត្រូវការ សម្រាប់ការរស់នៅ និងការគោរពប្រតិបត្តិ យ៉ាងដូចម្តេចខ្លះ?
ខគម្ពីរជញ្ជឹងគិត៖ ទំនុកដំកើង ១១៩:៣៣-៤០
គម្រោងអានព្រះគម្ពីររយៈពេល១ឆ្នាំ៖ អេសេគាល ៣-៤ និង យ៉ូហាន ៩:១-២៣