គំរូនៃភាពពេញវ័យរបស់គ្រីស្ទាន
ដោយAlistair Begg
October 4, 2026
«ត្រូវទូន្មានឲ្យពួកចាស់ៗដឹងខ្នាត មានចិត្តនឹងធឹង ហើយធ្ងន់ធ្ងរ ឲ្យមានសេចក្ដីជំនឿ សេចក្ដីស្រឡាញ់ នឹងសេចក្ដីខ្ជាប់ខ្ជួនដ៏ត្រឹមត្រូវផង ឲ្យពួកស្ត្រីចាស់ៗបានបែបដូចគ្នា ទាំងប្រព្រឹត្តបែបគួរនឹងពួកស្ត្រីបរិសុទ្ធ មិនត្រូវនិយាយដើមគេ ឬជាប់ស្រាទំពាំងបាយជូរឡើយ ត្រូវខំបង្រៀនសេចក្ដីត្រឹមត្រូវវិញ ដើម្បីនឹងបង្ហាត់ដល់ពួកស្ត្រីក្មេងៗ ឲ្យគេស្រឡាញ់ប្ដីនឹងកូនខ្លួន ឲ្យមានចិត្តធ្ងន់ធ្ងរ ហើយបរិសុទ្ធ ជាអ្នករវល់តែនឹងការនៅផ្ទះខ្លួន ហើយមានចិត្តល្អ នឹងចុះចូលចំពោះប្ដី ដើម្បីកុំឲ្យមានអ្នកណាប្រមាថដល់ព្រះបន្ទូលបានឡើយ» ។ ទីតុស ២:២-៥
នៅពេលណាជីវិតមានការលំបាក សៀវភៅលើកទឹកចិត្ត និងបង្រៀនអ្នកឲ្យជួយខ្លួនឯង នឹងមិនមានប្រសិទ្ធភាព ដូចការលើកទឹកចិត្តរបស់មនុស្ស ដែលមានក្តីស្រឡាញ់ពិតប្រាកដនោះទេ ។ អ្នកត្រូវការគ្រីស្ទានម្នាក់ ដែលមានភ្នែកស្រទន់ មានវ័យចាស់ជាងអ្នក ដែលយល់ចិត្តអ្នក ។ អ្នកត្រូវការក្តីអាណិត ។ ការងារបម្រើព្រះប្រភេទនេះ ក្នុងពួកជំនុំមិនមែនសម្រាប់ធ្វើតាមតម្រូវការជាក់ស្តែងប៉ុណ្ណោះទេ តែជាទំនាក់ទំនង ។ វាកើតចេញពីការស្គាល់គ្នា ។ វាកើតចេញពីការចំហចិត្ត សម្រាប់អ្នកដទៃ ។
ហេតុនេះហើយ ពួកជំនុំនីមួយៗត្រូវការបុរសស្ត្រីដែលមានវ័យចាស់ជាង ដែលមានភាពពេញវ័យខាងវិញ្ញាណ ដែលមិននៅក្រិន តែបន្តលូតលាស់ក្នុងជំនឿលើព្រះ ក្នុងការស្រឡាញ់អ្នកដទៃ និងមានការស៊ូទ្រាំ នៅចំពោះមុខនៃទុក្ខលំបាក ។
តួនាទីរបស់លោក ទីតុសក្នុងពួកជំនុំ ដែលគាត់កំពុងបម្រើ មិនគ្រាន់តែជាការលើកទឹកចិត្តបុរសដែលមានវ័យចាស់ជាង ឲ្យដឹងខ្នាត មានចិត្តនឹងធឹង ហើយធ្ងន់ធ្ងរ ឲ្យមានសេចក្ដីជំនឿដែលរឹងមាំប៉ុណ្ណោះទេ ។ ហើយគាត់ក៏មានការយកចិត្តទុកដាក់ដូចគ្នា ចំពោះសុខភាពខាងវិញ្ញាណរបស់ស្ត្រីដែលមានវ័យចាស់ជាង ក្នុងពួកជំនុំ ។ ដែលបុរសវ័យចាស់ជាង មានតួនាទីសំខាន់ក្នុងការថែបំប៉នពួកជំនុំជាយ៉ាងណា នោះស្ត្រីដែលមានវ័យចាស់ជាង ក៏មានតួនាទីដ៏សំខាន់ណាស់ដែរ ។ ពួកជំនុំត្រូវការបុរស និងស្ត្រីដែលបានរត់ប្រណាំង ហើយរក្សាសេចក្តីជំនឿ ធ្វើជាគំរូដល់មនុស្សជំនាន់ក្រោយ ឲ្យបានដឹងអំពីរបៀបរស់នៅថ្វាយព្រះគ្រីស្ទ ។
ពួកជំនុំត្រូវការបុរស និងស្ត្រីមានវ័យចាស់ជាង ព្រោះពួកគេអាច «បង្រៀនសេចក្ដីត្រឹមត្រូវ» ដល់មនុស្សវ័យក្មេងជាង ។ គឺបង្រៀនរបៀបរស់នៅ មុននឹងបង្រៀនអ្វីផ្សេងទៀត ។ កាលសាវ័កប៉ុលសរសេរសំបុត្រនេះ គាត់មិនបានរំពឹងថា នឹងមានថ្នាក់រៀន ដែលមានសៀវភៅមេរៀនជាច្រើននោះទេ ។ គេអាចប្រើការបង្រៀនប្រភេទនេះ ក្នុងការសន្ទនាយូរៗម្តង ដោយការយកចិត្តទុកដាក់ ក៏ដូចជាក្នុងការជួបជុំដែលមានការព្រៀងទុក ព្រមទាំងការកម្សាន្តចិត្តគ្នា ក្នុងការរស់នៅប្រចាំថ្ងៃ ។
តើអ្នកនឹងទៅរកជំនួយនៅទីណា ពេលដែលទំនាក់ទំនងប្តីប្រពន្ធរបស់អ្នកមានការលំបាក? តើអ្នកនឹងជជែកជាមួយនរណា នៅពេលដែលកូនក្នុងវ័យជំទង់ មិនចង់ស្តាប់អ្នកនិយាយទៀត? តើអ្នកនឹងទៅកន្លែងណា នៅពេលដែលអ្នកមិនដឹងថា ត្រូវទៅកន្លែងណា? អ្នកអាចទៅជួបគ្រូគង្វាលរបស់អ្នក ដែលអាចអធិស្ឋានជាមួយអ្នក ហើយផ្តល់ឲ្យអ្នកនូវការណែនាំខ្លះៗ តែអ្នកក៏ត្រូវការបុរស ឬស្ត្រីដែលមានវ័យចាស់ជាងអ្នក ដែលធ្លាប់បានឆ្លងកាត់បញ្ហាដូចអ្នកដែរ ហើយអាចនិយាយប្រាប់អ្នក ពីរបៀបដែលគាត់បានឆ្លងកាត់បញ្ហានោះ អំពីការអ្វីខ្លះដែលគាត់បានធ្វើ អំពីរបៀបដែលគាត់អធិស្ឋាន ហើយនិយាយប្រាប់អ្នក អំពីព្រះគុណព្រះ ហើយលើកទឹកចិត្តអ្នក ។
មនុស្សភាគច្រើនអាចធ្វើជា បុរស ឬស្ត្រីដែលមានវ័យចាស់ជាង សម្រាប់មនុស្សមានវ័យក្មេងជាងយើង និងស្ថិតក្នុងដំណាក់កាលនៃជីវិតក្មេងជាងយើង ។ ចូរមានចិត្តដែលបើកចំហយ៉ាងដូចនេះ ។ ហើយមនុស្សភាគច្រើន ក៏អាចរកឃើញមនុស្សដែលចាស់ជាង និងមានប្រាជ្ញាជាងយើង ហើយសូមឲ្យពួកគេអធិស្ឋានជាមួយយើង ប្រឹក្សាយោបល់ ហើយត្រៀមជាស្រេចដើម្បីយកអសារយើង ។ ចូរមានចិត្តដែលស្វែងរកមិត្តភាពប្រភេទនេះ ដ្បិតនេះជាព្រះពរធំបំផុត ដែលពួកជំនុំនៃព្រះផ្តល់ឲ្យយើង ។
ខគម្ពីរជញ្ជឹងគិត៖ ទីតុស ២:១-១០
គម្រោងអានព្រះគម្ពីររយៈពេល១ឆ្នាំ៖ អេសេគាល ៣៥-៣៦ និង យ៉ូហាន ១៧