ការអធិស្ឋានដែលផ្ដោតទៅលើនគរព្រះ
ដោយAlistair Begg
October 6, 2026
«ចូរអធិស្ឋានឥតឈប់ឈរ» ។ ១ថែស្សាឡូនិច ៥:១៧
បើគ្មានព្រះទេ យើងគ្មានអ្វីដែលល្អទេ ។ កណ្ឌគម្ពីរយ៉ាកុបបានចែងថា «គ្រប់ទាំងរបស់ដ៏ល្អ ដែលព្រះប្រទានមក នឹងអស់ទាំងអំណោយទានដ៏គ្រប់លក្ខណ៍ នោះសុទ្ធតែមកពីស្ថានលើ គឺមកពីព្រះវរបិតានៃពន្លឺ» (១:១៧) ។ ស្រដៀងគ្នានេះដែរ សាវ័កប៉ុលបានសួរថា «តើអ្នកមានអ្វីខ្លះ ដែលអ្នកមិនបានទទួល?» (១កូរិនថូស ៤:៧) ។ ជាការពិតណាស់ អ្វីៗទាំងអស់ដែលយើងមានសុទ្ធតែមកពីព្រះ ។
បើនេះជាការពិតមែន ហើយយើងមិនអាចធ្វើអ្វីដែលមានតម្លៃស្ថិតស្ថេរ បើយើងដាច់ចេញពីព្រះគ្រីស្ទ (យ៉ូហាន ១៥:៥) ហេតុអ្វីយើងគិតថា យើងអាចឆ្លងកាត់ថ្ងៃនីមួយៗ ដោយមិនអធិស្ឋានទៅកាន់ព្រះ ជាប្រភពនៃកម្លាំង និងការទ្រទ្រង់ ដែលយើងត្រូវការដោយមិនអាចអាក់ខានបាន? ការនេះមិនមានន័យថា យើងត្រូវតែរៀបចំឲ្យមានការជួបជុំគ្នាអធិស្ឋាន ពេញមួយថ្ងៃ ពេញមួយសប្តាហ៍នោះទេ (ទោះការចំណាយពេលអធិស្ឋានកាន់តែច្រើន មានអត្ថប្រយោជន៍ចំពោះយើងរាល់គ្នាក៏ដោយ) ។ តែមិនមានន័យថា យើងមិនគួរព្យាយាមឆ្លងកាត់ថ្ងៃនីមួយៗ ដោយមិនបានបង្ហាញចេញនូវការពឹងផ្អែកទៅលើព្រះវរបិតានៃយើងដែលគង់នៅស្ថានសួគ៌ ដោយការអធិស្ឋាននោះឡើយ ។
តាមពិត យើងងាយនឹងជិនណាយ ក្នុងការអធិស្ឋាន ។ ប៉ុន្តែ ភាគច្រើន ពេលយើងអធិស្ឋាន យើងមានផ្នត់គំនិតដូចការដើរផ្សារ ដោយយើងផ្ដោតទៅលើអ្វីដែលយើងចង់បាន ច្រើនជាងអ្វីដែលយើង និងពិភពលោកជុំវិញយើងពិតជាត្រូវការ ។ យើងគួរតែ «ទូលដល់ព្រះ ឲ្យជ្រាបពីសេចក្ដីសំណូម» របស់យើងក្នុងគ្រប់ការទាំងអស់ (ភីលីព ៤:៦) ទោះសេចក្តីសំណូមរបស់យើងតូចឬធំ ឬជាអ្វីក៏ដោយ ។ សេចក្តីសំណូមធំបំផុតរបស់រាស្រ្តរបស់ព្រះ គួរតែជាការយកចិត្តទុកដាក់ខ្លាំងបំផុតអំពីនគរព្រះ ។
ឧទាហរណ៍ យើងអាចអធិស្ឋានសូមអំពី៖
សូមឲ្យយើងចាត់បញ្ជូនមនុស្សចេញពីពួកជំនុំយើង ទៅទូទាំងពិភពលោក ។
ការបង្រៀនព្រះគម្ពីរប៊ីបនៅទីជិតឆ្ងាយ
បុព្វហេតុនៃព្រះគ្រីស្ទ បានតាំងនៅក្នុងពិភពលោក
ព្រះទ្រង់មានសេចក្តីមេត្តាចំពោះយើង ហើយប្រទានពរដល់យើង
ភាពស្មោះត្រង់ និងការរីកលូតលាស់នៃពួកជំនុំ និងការធ្វើបន្ទាល់របស់យើងទូទាំងពិភពលោក
រដ្ឋាភិបាលរបស់យើង និងអ្នកដឹកនាំរដ្ឋាភិបាល ចាប់តាំងពីថ្នាក់មូលដ្ឋាន
ជនអនាថា ទុរគត និងជនអត់ឃ្លាន
បញ្ចេញពន្លឺក្នុងទីក្រុងរបស់អ្នក ធ្វើជាបន្ទាល់អំពីដំណឹងល្អនៃព្រះយេស៊ូវគ្រីស្ទ
ជាការពិតណាស់ នេះគ្រាន់តែជាគំរូនៃសេចក្តីអធិស្ឋាន ។ ការអធិស្ឋានផ្ដោតទៅលើនគរព្រះ អាចមានច្រើនចំណុចទៀត ។ ទោះអ្នកកំពុងអធិស្ឋានឲ្យអ្វីក៏ដោយនៅថ្ងៃនេះ ក្នុងថ្ងៃបន្ទាប់ ចូរទូលសូមឲ្យរាជទ្រង់បានមកដល់ ។ ចូលទូលសូមព្រះហឫទ័យទ្រង់បានសម្រេច ។ អ្នកមានអំណរណាស់ ដែលព្រះអង្គបានត្រាស់ហៅអ្នកឲ្យអធិស្ឋាន ហើយឆ្លើយតបការអធិស្ឋានរបស់អ្នក ដើម្បីតាំងនគរទ្រង់!
ខគម្ពីរជញ្ជឹងគិត៖ ម៉ាថាយ ៦:៩-១១
គម្រោងអានព្រះគម្ពីររយៈពេល១ឆ្នាំ៖ អេសេគាល ៤០-៤១ និង យ៉ូហាន ១៨:១៩-៤០