បុរស ដែលនៅកណ្តាល
ដោយAlistair Begg
October 14, 2026
«ដូច្នេះ ដាវីឌបានឈ្នះសាសន៍ភីលីស្ទីនម្នាក់នោះ ដោយសារតែខ្សែដង្ហក់នឹងក្រួស១គ្រាប់ប៉ុណ្ណោះ គឺបានប្រហារសាសន៍ភីលីស្ទីននោះឲ្យស្លាប់ទៅ ដោយឥតមានកាន់ដាវនៅដៃឡើយ» ។ ១សាំយ៉ូអែល ១៧:៥០
ការពិពណ៌នានេះស្ថិតក្នុងចំណោមការពិពណ៌នា ដែលគេបានស្គាល់ច្រើនបំផុត ក្នុងព្រះគម្ពីរប៊ីប ប៉ុន្តែ ចូរយើងកុំមើលរំលងលក្ខណៈដ៏អស្ចារ្យនៃជ័យជម្នះ នៅក្នុងការពិពណ៌នានេះ ។ ក្មេងគង្វាលចៀមម្នាក់ មានតែដំបង និងគ្រាប់គ្រួស៥ដុំ និងដង្ហក់មួយ បានផ្តួលយក្ស ដែលជាអ្នកប្រយុទ្ធដែលមានបទពិសោធន៍ ដែលបានចូលមករកគាត់ ដោយអាវុធដែលគួរស្ញែង ។ ជ័យជម្នះនេះនាំមកនូវកេរ្តិ៍ឈ្មោះល្បីល្បាញ ដែលមិនបានសាបរលាប អស់ជាច្រើនសតវត្សរ៍ ។
អនាគតនៃជាតិសាសន៍អ៊ីស្រាអែលបានជួបហានិភ័យខ្លាំងបំផុត នៅក្នុងការប្រយុទ្ធគួរឲ្យភ្ញាក់ផ្អើល រវាងដាវីឌនិងកូលីយ៉ាត ។ កងទ័ពទាំងសងខាងមិនបានប្រយុទ្ធគ្នាទេ នៅថ្ងៃនេះ ។ ហើយស្តេចសូល ជាស្តេចបរាជ័យក៏មិនចេញប្រយុទ្ធដែរ ។ ពួកគេគ្រាន់តែឈរមើល ខណៈពេលដែលអនាគតនៃជាតិសាសន៍របស់ពួកគេស្ថិតនៅលើស្មារបស់ដាវីឌតែម្នាក់ឯង ដែលព្រះបានជ្រើសរើស ធ្វើជា «បុគ្គលដែលឈរនៅកណ្តាល» ។ ដាវីឌបានទទួលការចាក់ប្រេងតាំង ជាអ្នកបម្រើព្រះ ហើយគាត់បានបំពេញតួនាទីមានលក្ខណៈដូចជាស្រមោលរបស់ព្រះយេស៊ូវ ។
អនាគតរបស់បុរសស្ត្រីទាំងអស់ កំពុងស្ថិតក្នុងហានិភ័យ ដូចកងទ័ពអ៊ីស្រាអែលនៅសម័យនោះ ។ បរាជ័យធំបំផុតរបស់យើង គឺជាសេចក្តីស្លាប់ នៅពេលជីវិតដែលយើងស្រមៃចង់បាន និងកសាងសម្រាប់ខ្លួនឯងបានជាប់គាំង ។ សេចក្តីស្លាប់ធ្វើឲ្យយើងខ្លាច ព្រោះវាជាការដាក់ទោសមកលើបាប (រ៉ូម ៦:២៣) ហើយគ្មាននរណាម្នាក់ដែលមិនមានបាបនោះឡើយ (៣:២៣) ។ ក្រឹត្យវិន័យរបស់ព្រះតម្រូវឲ្យយើងល្អឥតខ្ចោះ ទើបយើងអាចរួចខ្លួន តែគ្មាននរណាម្នាក់ល្អឥតខ្ចោះ (ខ.១០) ។ ដូចនេះ សេចក្តីស្លាប់គឺជាយក្សដែលយើងមិនអាចប្រយុទ្ធឈ្នះ ហើយយើងឈរញ័រនៅចំពោះមុខវា ។ យើងត្រូវការនរណាម្នាក់ឈរនៅចន្លោះយើង និងសេចក្តីស្លាប់ ។ យើងត្រូវការនរណាម្នាក់ចូលមកជួយយើង ។
អ្នកនោះក៏បានចូលមកជួយយើងមែន ។ គឺដូចដែលដាវីឌបានឈរនៅចន្លោះកងទ័ពអ៊ីស្រាអែល និងបរាជ័យរបស់ពួកគេជាយ៉ាងណា នោះព្រះយេស៊ូវក៏បានឈរនៅចន្លោះយើង និងសេចក្តីស្លាប់របស់យើងយ៉ាងនោះដែរ ។ ជ័យជម្នះរបស់ព្រះអង្គគឺជាដំណឹងល្អបំផុត ដែលលោកិយបានឮ ។ ការតម្រូវរបស់ក្រឹត្យវិន័យ ត្រូវបានបំពេញដោយព្រះជន្មដ៏ល្អឥតខ្ចោះរបស់ព្រះអង្គ ។ទោសរបស់ក្រឹត្យវិន័យ បានធ្លាក់មកលើព្រះអង្គ ក្នុងការសុគតរបស់ទ្រង់ ជំនួសយើងដែលសមនឹងស្លាប់ ។ ហើយអំណាចរបស់សេចក្តីស្លាប់បានបរាជ័យ ដោយសារការមានព្រះជន្មរស់ឡើងវិញរបស់ព្រះអង្គ ព្រោះព្រះអង្គបានឈ្នះវាហើយ ។ ដែលដាវីឌបានប្រយុទ្ធឈ្នះក្នុងជ្រលងអេឡា មិនមែនសម្រាប់ខ្លួនឯង តែសម្រាប់ជាតិសាសន៍អ៊ីស្រាអែលទាំងមូលជាយ៉ាងណា នោះព្រះយេស៊ូវក៏បានឈ្នះសេចក្តីស្លាប់ នៅភ្នំកាល់វ៉ារី និងក្នុងផ្នូរទទេ ដើម្បីអស់អ្នកដែលរួបរួមជាមួយព្រះអង្គ ដោយជំនឿយ៉ាងនោះដែរ ។ ហេតុនេះហើយ បានជាសាវ័កប៉ុលបានប្រកាសថា «អរព្រះគុណដល់ព្រះអង្គ ពីព្រោះទ្រង់ប្រទានឲ្យយើងរាល់គ្នាមានជ័យជំនះ ដោយសារព្រះយេស៊ូវគ្រីស្ទ ជាព្រះអម្ចាស់នៃយើង» (១កូរិនថូស ១៥:៥៧) ។
នៅពេលដែលអ្នកមើលទៅឈើឆ្កាងរបស់ព្រះគ្រីស្ទ និងជ័យជម្នះនៃការមានព្រះជន្មឡើងវិញរបស់ព្រះអង្គ នៅថ្ងៃនេះ គឺអ្នកកំពុងតែមើលទៅជ័យជម្នះ ដែលព្រះអង្គសម្រេចបានដើម្បីអ្នក ។ ចូរឈប់បង្អង់សិន ដើម្បីអរសប្បាយ ច្រៀងសរសើរព្រះ និងអរព្រះគុណព្រះអង្គ ព្រោះអ្នកមានជ័យជម្នះតាមរយៈព្រះអង្គ ។ បន្ទាប់មក ចូរយើងចេញទៅក្នុងលោកិយ ដែលកំពុងប្រេះបែក និងខ្លាចសេចក្តីស្លាប់ ហើយប្រកាសថា គេមិនត្រូវភ័យខ្លាចទេ ព្រោះពួកគេក៏អាចមានព្រះយេស៊ូវជាជើងឯកដ៏មានជ័យជម្នះក្នុងជីវិត ដោយសេចក្តីជំនឿ ។
ខគម្ពីរជញ្ជឹងគិត៖ ២ធីម៉ូថេ ១:៨-១៣
គម្រោងអានព្រះគម្ពីររយៈពេល១ឆ្នាំ៖ ១សាំយូអែល ៤-៦ និង អេភេសូរ ៤