ទំនុកចិត្តក្នុងទុក្ខលំបាក
ដោយAlistair Begg
October 15, 2026
«ចូរនឹកចាំពីជាន់មុន គឺពីកាលដែលអ្នករាល់គ្នាទើបនឹងបានភ្លឺឡើង នោះក៏ទ្រាំនឹងទុក្ខលំបាក ទាំងតតាំងជាខ្លាំងដែរ ដោយសារគេយកអ្នករាល់គ្នាទុកជាល្បែងមើលលេង ទាំងត្មះតិះដៀល ហើយធ្វើទុក្ខដល់អ្នករាល់គ្នានោះម្យ៉ាង ហើយមួយទៀត ដោយអ្នករាល់គ្នាបានភប់ប្រសព្វនឹងពួកអ្នក ដែលត្រូវទុក្ខលំបាកដូច្នោះម្យ៉ាងផង ដ្បិតអ្នករាល់គ្នាមានចិត្តអាណិតអាសូរ ដល់ពួកអ្នកដែលជាប់ចំណង ក៏ទ្រាំឲ្យមនុស្សប្លន់យករបស់ទ្រព្យខ្លួនដោយអំណរ ដោយដឹងថា ខ្លួនមានទ្រព្យសម្បត្តិ ដែលប្រសើរជាង ហើយក៏នៅជាប់លាប់ផង នៅឯស្ថានសួគ៌ ដូច្នេះ កុំឲ្យបោះបង់ចោលសេចក្ដីក្លាហានរបស់អ្នករាល់គ្នា ដែលមានរង្វាន់ជាធំនោះឡើយ» ។ ហេព្រើរ ១០:៣២-៣៥
ខគម្ពីរទាំងនេះគឺជាពាក្យលើកទឹកចិត្តសម្រាប់អ្នកដែលសោកសង្រេង និងអ្នកដែលព្យាយាមកម្សាន្តចិត្តពួកគេ ។
ប្រហែលជាអ្នក ឬនរណាម្នាក់ដែលអ្នកស្គាល់ បានជួបរឿងសោកសៅផ្ទាល់ខ្លួន កាលពីពេលថ្មីៗនេះ ។ អ្នកប្រហែលជាបាត់បង់មនុស្សជាទីស្រឡាញ់ ហើយការឈឺចាប់នៃការបាត់បង់នោះធំធេងណាស់ បានជាអ្នកចង់បោះបង់ការតស៊ូ ។ អ្នកប្រហែលមានអារម្មណ៍អស់សង្ឃឹម និងមានបន្ទុក នៅពេលដែលអ្នកឃើញបងប្អូនប្រុសស្រី ក្នុងព្រះគ្រីស្ទកំពុងតែដើរក្នុងផ្លូវដ៏ឈឺចាប់នៃទុក្ខវេទនា ។
ការឈឺចាប់ដ៏រ៉ាំរ៉ៃ និងធ្ងន់ធ្ងរ ច្រើនតែបណ្តាលឲ្យយើងចោទសួរអំពីជំនឿ និងការប្ដេជ្ញាចិត្តរបស់យើង ។ ប៉ុន្តែ អ្នកនិពន្ធកណ្ឌគម្ពីរហេព្រើរបានលើកទឹកចិត្តយើង ឲ្យនៅតែខ្ជាប់ខ្ជួន ខណៈពេលដែលយើងនឹកចាំ អំពីការស៊ូទ្រាំចំពោះទុក្ខលំបាកដែលយើងមានកាលពីមុន ។ គាត់បានប្រើពាក្យ «ចូរនឹកចាំពីជាន់មុន គឺពីកាលដែលអ្នករាល់គ្នាទើបនឹងបានភ្លឺឡើង នោះក៏ទ្រាំនឹងទុក្ខលំបាក ទាំងតតាំងជាខ្លាំងដែរ» ។ នៅក្នុងការនឹកចាំនេះ យើងត្រូវតែជៀសវាងការល្បួង ឲ្យ «បោះបង់ចោលសេចក្តីក្លាហាន» ដោយដឹងថា ព្រះទ្រង់នឹងប្រទានរង្វាន់ដោយសារការស៊ូទ្រាំរបស់យើង ។ ពេលណាយើងរស់នៅក្នុងជីវិតជាគ្រីស្ទបរិស័ទកាន់តែយូរ នោះយើងក៏ឆ្លងកាត់ការលំបាកកាន់តែច្រើន ដោយសារព្រះគុណព្រះអង្គ ហើយយើងក៏ក្រឡេកមកក្រោយមើលទៅទុក្ខលំបាកទាំងនោះ ហើយគិតថា «បើខ្ញុំអាចស៊ូទ្រាំនឹងទុក្ខលំបាកទាំងនោះ ខ្ញុំក៏អាចឆ្លងកាត់ទុក្ខលំបាកមួយនេះដែរ» ។
អ្នកប្រហែលកំពុងគិតថា «ទុក្ខលំបាកនេះ ហាក់ដូចជាពិបាកពេក ខ្ញុំមិនអាចស៊ូទ្រាំបានទេ នៅពេលនេះ» ។ បើដូច្នោះមែន ចូរយើងដឹងថា ព្រះវិញ្ញាណនៃព្រះចម្រើនកម្លាំងយើង និងជួយយើង ក្នុងពេលដែលយើងខ្សោយយ៉ាងខ្លាំង (រ៉ូម ៨:២៦-២៨) ។ ទោះនៅពេលដែលយើងមិនដឹងថា ត្រូវអធិស្ឋានអំពីអ្វី ឬត្រូវស៊ូទ្រាំដោយរបៀបណាក៏ដោយ ក៏ព្រះវិញ្ញាណបរិសុទ្ធទូលអង្វរឲ្យយើង ហើយជួយយើងឲ្យអាចធ្វើតាមបំណងព្រះទ័យព្រះ (ខ.២៦) ។
អ្នកនិពន្ធកណ្ឌគម្ពីរហេព្រើរបានលើកទឹកចិត្តយើង ក្នុងនាមយើងជាសមាជិកគ្រួសារព្រះ រួបរួមក្នុងព្រះគ្រីស្ទ ឈរជាមួយគ្នា ហើយធ្វើជាដៃគូជាមួយអ្នកដែលកំពុងជួបទុក្ខលំបាក ។ ជាការពិតណាស់ ព្រះអង្គបានត្រាស់ហៅយើងឲ្យបង្ហាញចេញនូវការអាណិតចំពោះបងប្អូនប្រុសស្រីដែលកំពុងជួបការលំបាកដូចយើង ។ ការធ្វើការជាដៃគូដូចនេះ អាចមានការលះបង់ច្រើន គឺដូចដែលអ្នកជឿសម័យដើម បានស៊ូទ្រាំនឹងការរឹបអូសទ្រព្យសម្បត្តិ ដោយសារតែសេចក្តីអាណិតដែលពួកគេមានចំពោះអ្នកដែលកំពុងជាប់គុក ។ តែយើងមិនត្រូវរួញរា ដោយសារមិនចង់មានការលះបង់នោះទេ ។
ក្នុងការសោកសង្រេង និងក្នុងការអាណិត យើងមានការស៊ូទ្រាំ ព្រោះព្រះអម្ចាស់គង់នៅជាមួយយើង ដើម្បីចម្រើនកម្លាំងយើង ហើយទ្រទ្រង់ហើយ ដោយព្រះហស្តស្តាំដ៏សុចរិត (អេសាយ ៤១:១០) ។ ខណៈពេលដែលអ្នកប្រឈមមុខដាក់ទុក្ខលំបាក និងបញ្ហាក្នុងជីវិត កុំបោះបង់ចោលជំនឿ ឬរាថយទៅរកកន្លែងងងឹតនោះឡើយ ។ ចូរឲ្យភ្នែករបស់អ្នកផ្ចង់ទៅលើ «ទ្រព្យសម្បត្តិ ដែលប្រសើរជាង ហើយក៏នៅជាប់លាប់ផង នៅឯស្ថានសួគ៌» ហើយក៏លើកទឹកចិត្តមនុស្សនៅជុំវិញអ្នកឲ្យផ្ចង់ចិត្តទៅលើទ្រព្យសម្បត្តិនោះ ដែលជាសិរីល្អនៃជីវិតអស់កល្ប ដែលយើងនឹងរស់នៅជាមួយព្រះគ្រីស្ទ ដែលបានឆ្លងកាត់ផ្លូវនៃទុក្ខវេទនាមុនយើង ហើយឥឡូវនេះ ព្រះអង្គកំពុងតែហៅយើងឲ្យទៅរស់នៅជាមួយព្រះអង្គ ។
ខគម្ពីរជញ្ជឹងគិត៖ ហេព្រើរ ១០:៣៦-១១:៣
គម្រោងអានព្រះគម្ពីររយៈពេល១ឆ្នាំ៖ ១សាំយូអែល ៧-៩ និង អេភេសូរ ៥:១-១៦