អ្នកទទួលព្រះគុណព្រះ
ដោយAlistair Begg
October 19, 2026
«សូមឲ្យអ្នករាល់គ្នា បានប្រកបដោយព្រះគុណនៃព្រះអម្ចាស់យេស៊ូវគ្រីស្ទ នឹងសេចក្ដីស្រឡាញ់របស់ព្រះ ហើយនឹងសេចក្ដីរួបរួមគ្នានឹងព្រះវិញ្ញាណបរិសុទ្ធ» ។ ២កូរិនថូស ១៣:១៤
លោកគ្រូ ចន ញូតុន (John Newton) គឺជាអ្នកនិពន្ធបទទំនុកសកលមានចំណងជើងថា «ព្រះគុណអស្ចារ្យ» ។ គាត់មិនដែលភ្លេចព្រះគុណព្រះមានភាពអស្ចារ្យយ៉ាងណាឡើយ ។ គាត់ជាអតីតអ្នកជួញដូរទាសករ ដូចនេះ គាត់មិនដែលភ្លេចអំពើបាបគ្រងរាជលើជីវិតគាត់ មុនពេលគាត់ទទួលជឿព្រះគ្រីស្ទ ហើយគាត់ក៏បានដឹងអំពីបាប ដែលនៅមានក្នុងជីវិតគាត់ បន្ទាប់ពីគាត់បានប្រែចិត្តជឿព្រះហើយ ។ ហេតុនេះហើយ នៅចុងបញ្ចប់នៃជីវិតគាត់ គាត់និយាយថា «ខ្ញុំចាំរឿងពីរយ៉ាង ទីមួយ ខ្ញុំជាមនុស្សមានបាបធ្ងន់ណាស់ ហើយទីពីរ ព្រះគ្រីស្ទគឺជាព្រះអង្គសង្គ្រោះដ៏អស្ចារ្យ» ។82 យើងក៏ចាំបាច់ត្រូវចាំសណ្ឋានដែលពេញដោយបាប កាលយើងដាច់ចេញពីព្រះគ្រីស្ទ ដ្បិតបើសិនជាយើងមិនដឹងអំពីជម្រៅនៃបាបរបស់យើងទេ នោះយើងមិនអាចយល់ច្បាស់ អំពីរឿង និងការអស្ចារ្យនៃព្រះគុណរបស់ព្រះអម្ចាស់យេស៊ូវដែរ ។
បញ្ហាប្រឈមនៃជីវិតជាគ្រីស្ទបរិស័ទស្ថិតនៅត្រង់ថា ភាពល្ងង់ខ្លៅរបស់យើងអាចនាំឲ្យយើងជឿថា យើងមិនត្រូវការព្រះគុណព្រះនោះទេ ប៉ុន្តែ យើងមិនដែលអាចជៀសផុសពីព្រះគុណព្រះបានឡើយ ។ ហេតុនេះហើយ បានជាសាវ័កប៉ុលបានបញ្ចប់សំបុត្រទីពីរទៅកាន់ពួកជំនុំនៅទីក្រុងកូរិនថូស ដោយជូនពរពួកគេថា «សូមឲ្យអ្នករាល់គ្នា បានប្រកបដោយព្រះគុណនៃព្រះអម្ចាស់យេស៊ូវគ្រីស្ទ» ។ តើសាវ័កប៉ុលកំពុងនិយាយសំដៅទៅលើព្រះគុណមួយណា? យើងអាចរកឃើញការបកស្រាយអំពីព្រះគុណនេះ ក្នុងសំបុត្រដដែលនោះ នៅត្រង់ចំណុចដែលសាវ័កប៉ុលប្រាប់អ្នកអានសំបុត្រគាត់ថា «ដ្បិតអ្នករាល់គ្នាបានស្គាល់ព្រះគុណនៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាហើយ ថាទោះបើទ្រង់ជាសេដ្ឋីក៏ដោយ គង់តែទ្រង់បានត្រឡប់ជាក្រ ដោយព្រោះអ្នករាល់គ្នា ដើម្បីឲ្យអ្នករាល់គ្នាបានមានឡើង ដោយសារសេចក្ដីកម្ររបស់ទ្រង់» (២កូរិនថូស ៨:៩) ។
ពេលណាព្រះគម្ពីរធ្វើឲ្យយើងបន្ទាបខ្លួន ដោយលើកឡើងអំពីការពិតនៃបាបរបស់យើង ទន្ទឹមនឹងនោះ ព្រះគម្ពីរក៏មិនដែលខាននឹងកម្សាន្តចិត្តយើង ដោយការពិតនៃព្រះគុណព្រះផងដែរ ។ យើងចាំបាច់ត្រូវចងចាំសេចក្តីពិតនៃសេចក្តីសង្គ្រោះក្នុងព្រះគ្រីស្ទ ។ ព្រះអង្គបានយាងចុះពីស្ថានពេញដោយសិរីល្អ ដោយយកកំណើតជាមនុស្ស ហើយដើរក្នុងចំណោមយើង ។ ព្រះអង្គបានយាងមករស់នៅជាមនុស្ស ដោយមិនមានបាប ។ ព្រះអង្គរស់នៅ ដោយភាពល្អឥតខ្ចោះ ហើយស្តាប់បង្គាប់ទាំងស្រុងចំពោះក្រឹត្យវិន័យដ៏បរិសុទ្ធរបស់ព្រះ ។ តែព្រះអង្គមិនបានទទួលការគោរពពីមនុស្សតាមដែលសក្ដិសមនោះទេ ផ្ទុយទៅវិញ ព្រះអង្គ «ទទួលរងភាពអាម៉ាស និងការប្រមាថមើលងាយ ក្នុងការទទួលទោសជំនួសខ្ញុំ» ។83
យើងនឹងយល់ឃើញថា ព្រះដែលបានលះបង់ព្រះជន្មនៅលើឈើឆ្កាង ហាក់ដូចជាមិនសក្តិសមនឹងឲ្យយើងថ្វាយបង្គំឡើយ បើសិនជាយើងមិនទទួលស្គាល់ថា ព្រះអង្គសុគតដោយសារបាបរបស់យើង និងដោយសារព្រះអង្គស្រឡាញ់យើងទេនោះ ។ ព្រះគ្រីស្ទមិនមានបំណុលដែលត្រូវសង ហើយក៏មិនមានទោសដែលត្រូវទទួលដែរ ។ ព្រះអង្គទទួលរងអ្វីដែលយើងសមនឹងទទួល ហើយព្រះអង្គទទួលជំនួសយើង ។ ទាល់តែយើងបានដឹងច្បាស់ អំពីទម្ងន់របស់បាបយើង ទើបយើងមានចិត្តស្ញប់ស្ញែងចំពោះសេចក្តីសង្គ្រោះដែលព្រះអង្គប្រទានយើង ។
ចូរចំណាយពេលបន្តិច ដើម្បីពិចារណាជាថ្មី អំពីបាបដែលអ្នកបានប្រព្រឹត្ត ដែលព្រះអង្គបានបង់ថ្លៃលោះហើយ មិនមែនបន្តរស់នៅក្នុងបាបនោះទេ ឬស្អប់ខ្ពើមខ្លួនឯងនោះទេ តែរំឭកខ្លួនឯងថា អ្នកមិនដែលសក្តិសមនឹងទទួលព្រះគុណព្រះ ក្នុងព្រះគ្រីស្ទទេ តែព្រះអង្គនៅតែប្រទានមកអ្នក ។ អ្នកគឺជាមនុស្សមានបាបធ្ងន់ណាស់ ហើយព្រះគ្រីស្ទជាព្រះសង្គ្រោះដ៏គួរស្បើម ។ ព្រះគុណរបស់ព្រះអង្គពិតជាអស្ចារ្យ!
ខគម្ពីរជញ្ជឹងគិត៖ អេសាយ ១:១២-១៨
គម្រោងអានព្រះគម្ពីររយៈពេល១ឆ្នាំ៖ ១សាំយូអែល ១៧-១៨ និង ២ពេត្រុស ២