អត្ថន័យជីវិតនៅក្រោមកម្តៅថ្ងៃ
ដោយAlistair Begg
October 20, 2026
«យើងបានឃើញបណ្ដាការដែលមានធ្វើនៅក្រោមថ្ងៃ ហើយមើល ការទាំងនោះសុទ្ធតែឥតប្រយោជន៍ទទេ ក៏ជាអសារឥតការផង» ។ សាស្តា ១:១៤
កណ្ឌគម្ពីរសាស្តាបានបង្ហាញឲ្យយើងដឹងថា ជីវិតមានលក្ខណៈដូចម្តេច «នៅក្រោមកម្តៅថ្ងៃ» ហើយយើងអាចមានការបាក់ទឹកចិត្ត ពេលដែលបានអានការពិពណ៌នានោះ ។ យើងម្នាក់ៗដេញតាមការស្កប់ចិត្ត ក្នុងលោកិយនេះ ហើយទោះយើងព្យាយាមយ៉ាងណា ឬយើងគិតថា យើងបានជិតទៅដល់ការស្កប់ចិត្តយ៉ាងណាក៏ដោយ ក៏ការស្កប់ចិត្តនោះនៅតែគេចចេញពីយើងជានិច្ច ។ យើងមានការស្រេកឃ្លានពីកំណើត ចង់បានអ្វីដែលថ្មី និងល្អជាង ព្រោះយើងគិតថា វានាំមកនូវការស្កប់ចិត្ត ដែលយើងកំពុងស្វែងរក ប៉ុន្តែ ការប្រឹងប្រែងខ្លាំងបំផុតរបស់យើង តែងតែទទួលបានមកវិញនូវភាពចន្លោះប្រហោង ។ ការដេញតាមភាពស្កប់ស្កល់របស់អ្នក គឺមិនខុសពីការដេញតាមខ្យល់នោះទេ ។
សូមយើងពិចារណាថា យើងបានងាកទៅរកកន្លែងណាខ្លះ ដើម្បីឲ្យមានចិត្តស្កប់ស្កល់ ។ តើអ្នកបានព្យាយាមស្វែងរកអត្ថន័យជីវិត ដោយបំពេញជីវិតអ្នកដោយទំនាក់ទំនងឬ? នោះអ្នកទំនងជារកឃើញថា គ្មានមនុស្សណាម្នាក់នៅលើផែនដីនេះ ដែលអាចចម្អែតការស្រេកឃ្លានជ្រាលជ្រៅបំផុតរបស់អ្នកបានទេ ។ តើអ្នកបានព្យាយាមចម្អែតខ្លួនឯង ដោយការដេញតាមការរៀនសូត្រឬទេ? បើដូច្នោះមែន អ្នកប្រហែលជាបានដឹងហើយថា គ្មានទ្រឹស្ដីណាមួយដែលអ្នកអាចយកមកពិចារណា ដែលនឹងធ្វើឲ្យអ្នកឈប់ចង់ដឹងចង់យល់នោះឡើយ ។ តើអ្នកកំពុងស្វែងរកការស្កប់ចិត្ត ក្នុងការដកពិសោធន៍ និងការធ្វើដំណើរឬទេ? គ្មានការធ្វើដំណើរណាដែលនឹងអាចឆ្លើយតប ចំពោះការស្រេកឃ្លានរបស់អ្នក ក្នុងការរកមើលភាពស្រស់ស្អាត និងភាពគួរស្បើមនោះឡើយ ។ ឬអ្នកកំពុងស្វែងរក តាមរយៈអ្វីផ្សេងទៀត ។ ប៉ុន្តែ ទោះយើងងាកទៅរកអ្វីក៏ដោយ ដើម្បីស្វែងរកការស្កប់ចិត្ត ក៏នៅតែមិនអាចផ្តល់ក្តីសង្ឃឹមដល់យើងដែរ ។ មិនយូរមិនឆាប់ យើងតែងតែមានអារម្មណ៍ថា យើងនៅតែមានចន្លោះប្រហោងដដែល ។ តើនេះជាការមានគំនិតអវិជ្ជមានឬ? ទេ! នេះគឺជាអត្ថន័យរបស់ជីវិតពិត «នៅក្រោមកម្តៅថ្ងៃ» ។ គឺមិនខុសពីដុំគូបរបស់លោក រូប៊ីក (Rubik) ដែលបានបាត់ពណ៌ពីរគ្រាប់ ។ ទោះអ្នកព្យាយាមបង្វិលវាចុះឡើងៗប៉ុន្មានដង ក៏នៅតែមិនអាចតម្រៀបពណ៌ទាំងអស់ឲ្យគ្រប់ ព្រោះវាមានភាពខ្វះចន្លោះស្រាប់ហើយ ។
មានតែដោយសារព្រះគុណព្រះប៉ុណ្ណោះ ដែលអ្នកអាចតម្រៀបពណ៌នៅលើដុំគូបនៃជីវិតរបស់អ្នក បានត្រឹមត្រូវ ដោយអាចដឹងថា ហេតុអ្វីគ្មានរបស់អ្វីនៅលើផែនដីអាចធ្វើឲ្យអ្នកស្កប់ចិត្តបាន ។ មានតែទស្សនៈមួយប៉ុណ្ណោះ ដែលអាចធ្វើឲ្យអ្នកយល់អំពីជីវិតបាន គឺទស្សនៈដែលឆ្លើយតប ចំពោះសំណួរដែលអ្នកមាន ក្នុងគំនិត ពេលដែលអ្នកគេងមិនលក់នៅពេលយប់ ។
មានតែព្រះទេដែលអាចប្រទានការស្កប់ចិត្ត ដល់ការស្វែងរកការស្កប់ចិត្ត ការស្រេកឃ្លាន និងសំណួរស៊ីជម្រៅបំផុតរបស់អ្នកបាន ។ លោកគ្រូ អូគូស្ទីន (Augustine) ជាទេវវិទូសតវត្សរ៍ទី៥ ធ្លាប់បានប្រកាស អំពីព្រះថា «ព្រះអង្គបានបង្កើតយើងខ្ញុំ សម្រាប់អង្គទ្រង់ ហើយចិត្តរបស់យើងខ្ញុំ មិនមានការសម្រាកឡើយ ទាល់តែបានសម្រាកក្នុងព្រះអង្គ» ។84 អ្នកអាចមានការសម្រាកខាងវិញ្ញាណដ៏ជ្រាលជ្រៅនេះ គ្រប់ពេលវេលា ពោលគឺអាចរកឃើញនៅក្នុងព្រះដែលប្រទានការស្កប់ស្កល់គ្រប់យ៉ាង ។ ទោះអ្នកមាន ឬមិនមានអ្វីក៏ដោយ ទោះអ្នកប្រាថ្នាចង់បានអ្វី ឬកំពុងខិតខំធ្វើការដើម្បីឲ្យបានអ្វីក៏ដោយ «នៅក្រោមកម្តៅថ្ងៃ» ចូរប្រាកដថា អ្នកបានរកឃើញការស្កប់ចិត្តជ្រាលជ្រៅបំផុត នៅក្នុងការស្គាល់ និងការបម្រើព្រះអម្ចាស់ប៉ុណ្ណោះ ។ ដោយសារព្រះអង្គ ការហត់នឿយគ្រប់យ៉ាងបានឈប់ ហើយក្នុងព្រះអង្គ ការស្រេកឃ្លានទាំងអស់មានភាពស្កប់ស្កល់ ។
ខគម្ពីរជញ្ជឹងគិត៖ ម៉ាថាយ ១១:២៥-៣០
គម្រោងអានព្រះគម្ពីររយៈពេល១ឆ្នាំ៖ ១សាំយូអែល ១៩-២១ និង ២ពេត្រុស ៣