ពួកជំនុំដំណឹងល្អ
ដោយAlistair Begg
October 21, 2026
«កាលទ្រង់បានយាងចុះទូក នោះអ្នកដែលអារក្សចូលពីដើម គាត់ក៏សូមទៅជាមួយនឹងទ្រង់ តែទ្រង់មិនអនុញ្ញាតទេ ដោយបន្ទូលថា ចូរទៅផ្ទះទៅ ហើយប្រាប់បងប្អូនឯងពីការធំទាំងម្ល៉េះ ដែលព្រះអម្ចាស់បានមេត្តាប្រោសដល់ឯងវិញ» ។ ម៉ាកុស ៥:១៨-១៩
តើ «ព្រះវិហារដំណឹងល្អ» មានលក្ខណៈដូចម្តេចខ្លះ? តើព្រះគ្រីស្ទបានត្រាស់ហៅពួកជំនុំឲ្យក្លាយទៅជាអ្វី? តើយើងត្រូវធ្វើដូចម្តេច ដើម្បីឲ្យប្រាកដថា ពួកជំនុំរបស់យើងបានធ្វើតាម ហើយមិនវង្វេងចេញពីការត្រាស់ហៅនោះ?
នៅពេលដែលពួកជំនុំរសាត់អណ្ដែត តាមធម្មតា គឺនៅពេលដែលពួកគេក្រឡេកមកក្រោយ ហើយក៏បានដឹងខ្លួនថា ពួកគេបានឈប់ផ្ដោតទៅលើដំណឹងល្អ ដោយមិនដឹងខ្លួន ។ បន្ទាប់ពីមួយរយៈពេលក្រោយមក ពួកជំនុំនោះបានផ្ដោតទៅលើខ្លួនឯងប្រហែលភ្លាមៗ ឬប្រហែលបន្តិចម្តងៗដោយមិនដឹងខ្លួន ។ ពួកជំនុំមានភាពសុខស្រួល និងពេញចិត្តចំពោះកៅអីមួយចំនួនដែលនៅទទេ ឬកៅអីដែលមានមនុស្សអង្គុយពេញអស់ ដោយហេតុផលមិនត្រឹមត្រូវ ។ ពួកជំនុំនោះអាចរសាត់អណ្ដែតយឺតៗ មានការពេញចិត្តនឹងខ្លួនឯង ហើយទីបំផុតក៏បានវង្វេងផ្លូវ ។
ពួកជំនុំនីមួយៗនៅបន្តប្ដេជ្ញាចិត្តចំពោះបេសកកម្មរបស់ខ្លួន នៅពេលដែលសមាជិករបស់ខ្លួន នៅតែផ្ដោតទៅខាងក្រៅ ។ ព្រះយេស៊ូវបានលើកទឹកចិត្តឲ្យមានផ្នត់គំនិតដូចនេះ បន្ទាប់ពីព្រះអង្គបានប្រោសបុរសអ្នក ដែលត្រូវអារក្សចូល ក្នុងបទគម្ពីរម៉ាកុស ៥ ។ នៅពេលដែលបុរសនោះបានសួរព្រះយេស៊ូវថា គាត់អាចដើរតាមព្រះអង្គបានឬអត់ ព្រះអង្គក៏បានបដិសេធ ដែលអាចធ្វើឲ្យអ្នកខ្លះមានការភ្ញាក់ផ្អើល ព្រោះព្រះបន្ទូលដំបូងរបស់ព្រះយេស៊ូវ ដែលបានកត់ទុកក្នុងបទគម្ពីរដំណឹងល្អម៉ាកុសគឺ ពាក្យ «ចូរមកតាមខ្ញុំ» (ម៉ាកុស ១:១៧) ។ ប៉ុន្តែ ព្រះអង្គកំពុងតែប្រាប់បុរសនោះថា ការដើរតាមព្រះអង្គ ក៏រាប់បញ្ចូលការចេញទៅ គឺទៅផ្ទះប្រាប់ញាតិមិត្តអំពី «ការធំទាំងម្ល៉េះ ដែលព្រះអម្ចាស់បានមេត្តាប្រោសដល់»គាត់ ។ ព្រះយេស៊ូវមិនសព្វព្រះទ័យឲ្យគាត់គ្រាន់តែស្កប់ចិត្តនឹងការយល់ដឹងអំពីព្រះគ្រីស្ទ ដែលគាត់បានទទួលប៉ុណ្ណោះទេ ។ ព្រះអង្គសព្វព្រះទ័យឲ្យគាត់ ចេញទៅប្រកាសដំណឹងល្អអំពីព្រះគ្រីស្ទ ទៅដល់អ្នកដទៃ ។
ព្រះទ្រង់បានត្រាស់ហៅយើងឲ្យទៅរកព្រះរាជបុត្រាព្រះអង្គ ដូចដែលព្រះអង្គបានត្រាស់ហៅបុរសនោះជាយ៉ាងណា នោះព្រះអង្គក៏ត្រាស់ហៅយើងឲ្យធ្វើជាអ្នកដើរតាមព្រះរាជបុត្រាព្រះអង្គ ដែលរាប់បញ្ចូលការចេញទៅផ្សាយដំណឹងល្អអំពីព្រះរាជបុត្រាទ្រង់ ។ ព្រោះព្រះយេស៊ូវមិនដែលត្រាស់ហៅនរណាម្នាក់ឲ្យដើរតាមព្រះអង្គ ដោយមិនបានធ្វើឲ្យពួកគេក្លាយជា «អ្នកនេសាទមនុស្ស»នោះទេ (ម៉ាកុស ១:១៧) ។ បើយើងពិតជាចូលមករកព្រះអង្គ នោះយើងត្រូវតែចេញទៅផ្សាយអំពីព្រះអង្គ ។
កាលព្រះយេស៊ូវជាប់នៅលើឈើឆ្កាង ព្រះអង្គបានប្រកាសថា «ការស្រេចហើយ» (យ៉ូហាន ១៩:៣០) ។ ព្រះរាជកិច្ចនៃការប្រោសលោះបាប គឺជាកិច្ចការដែលបានបញ្ចប់ និងនៅតែសម្រេចដោយព្រះគ្រីស្ទតែប៉ុណ្ណោះ ។ ប៉ុន្តែ ព្រះគ្រីស្ទក៏បានរាប់បញ្ចូលអ្នកដើរតាមទ្រង់ ក្នុងព្រះរាជកិច្ចដែលមិនទាន់ចប់ គឺជាការនាំដំណឹង អំពីរឿងដ៏អស្ចារ្យនេះ ទៅកាន់លោកិយ ។ ជីវិតពួកជំនុំមានធាតុផ្សំជាច្រើន ដែលគេមិនគួរមើលរំលងឡើយ ប៉ុន្តែ ពេលណាយើងមិនអើពើចំពោះការផ្សាយដំណឹងល្អ ដោយដេញតាមរឿងផ្សេង ដែលប្រៀបដូចជាការរៀបចំគ្រឿងសង្ហារិម ក្នុងផ្ទះដែលកំពុងឆេះ ។
តើអ្នកបានទទួលសេចក្តីមេត្តា ដែលអាចរកបាន ក្នុងព្រះគ្រីស្ទឬ? តើអ្នកស្គាល់អ្នកផ្សេងទៀត ដែលមិនទាន់ជឿដំណឹងល្អឬទេ? ព្រះគ្រីស្ទបានត្រាស់ហៅអ្នកផងដែរ ឲ្យប្រាប់ «ការធំទាំងម្ល៉េះ ដែលព្រះអម្ចាស់បានមេត្តាប្រោសដល់»អ្នក ។ ព្រះអង្គត្រាស់ហៅពួកជំនុំរបស់អ្នក ឲ្យធ្វើជាកន្លែងស្វាគមន៍មនុស្សទាំងអស់ ដែលចង់ជួបព្រះដែលបាននាំមកនូវការផ្លាស់ប្រែក្នុងជីវិតអ្នក និងជីវិតអ្នកដទៃក្នុងពួកជំនុំរបស់អ្នក ។ តើអ្នកនឹងទទួលយកការត្រាស់ហៅរបស់ទ្រង់ទេ?
នៅសប្តាហ៍នេះ តើអ្នកនឹងចែកចាយដល់នរណាខ្លះ អំពីការអ្វីដែលព្រះអង្គបានធ្វើច្រើនយ៉ាងនេះ សម្រាប់អ្នក?
ខគម្ពីរជញ្ជឹងគិត៖ កិច្ចការ ១១:១៩-២៦
គម្រោងអានព្រះគម្ពីររយៈពេល១ឆ្នាំ៖ ១សាំយូអែល ២២-២៤ និង ១ធីម៉ូថេ ១