ដើម្បីសម្រេចគោលបំណងធំ
ដោយAlistair Begg
October 24, 2026
«តែយើងដឹងថា គ្រប់ការទាំងអស់ផ្សំគ្នា សំរាប់សេចក្ដីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះដំរិះទ្រង់» ។ រ៉ូម ៨:២៨
របៀបដែលយើងឆ្លើយតប ចំពោះកាលៈទេសៈនៃជីវិត បើកបង្ហាញឲ្យយើងដឹងថា យើងជាមនុស្សប្រភេទណា ។ អ្នកខ្លះមើលទៅជីវិត ហើយគិតថា «ខ្ញុំបានធ្វើការងារនៅកន្លែងដដែល ដោយងាប់ក្រឡា មិនអាចរកការងារថ្មីធ្វើ ។ ខ្ញុំញាំអាហារថ្ងៃត្រង់ដដែលៗ ស្ទើររាល់ថ្ងៃ ។ ទំនាក់ទំនងរបស់ខ្ញុំច្រើនតែទាញខ្ញុំទម្លាក់ ជាជាងស្អាងខ្ញុំឡើង ។ តើធ្វើដូចម្តេចឲ្យខ្ញុំអាចជឿថា នេះជារឿងល្អ ជាអំណោយមកពីព្រះ? ខ្ញុំមើលមិនឃើញអញ្ចឹងសោះ» ។
ប៉ុន្តែ បើយើងនៅក្នុងព្រះគ្រីស្ទ នោះយើងមានការធានាថា ផែនការល្អឥតខ្ចោះរបស់ព្រះ កំពុងតែបើកបង្ហាញ តាមបំណងព្រះទ័យទ្រង់ ។ ហើយយើងបានទទួលការបង្រៀនថា យើងបានកើតមក ដើម្បីគោលបំណងដែលធំជាងការរស់នៅ ដែល «គ្រាន់តែ» បើកឡានក្រុង ធ្វើការជាគ្រូបង្រៀន ឬធ្វើជាឪពុកម្តាយល្អ ។ ការងារមិនមែនសម្រាប់តែស្វែងរកប្រាក់បង់ថ្លៃចំណាយប្រចាំថ្ងៃនោះទេ ។ សកម្មភាពកម្សាន្តសប្បាយក៏មិនមែនគ្រាន់សម្រាប់តែឲ្យយើងលំហែអារម្មណ៍ ឬដើម្បីកុំឲ្យអផ្សុកនោះទេ ។ វីដេអូដែលភ្នែកយើងមើល ហើយត្រចៀកយើងស្តាប់ មិនមែនសម្រាប់បង្វែរអារម្មណ៍របស់យើងចេញពីស្ត្រេសក្នុងជីវិតនោះទេ ។ អ្វីៗដែលយើងធ្វើ គឺជាឱកាសដើម្បីថ្វាយព្រះកិត្តិនាមដល់ព្រះ បានផ្លាស់ប្រែកាន់តែដូចព្រះរាជបុត្រាទ្រង់ ហើយចង្អុលបង្ហាញអ្នកដទៃទៅរកព្រះអង្គ ។ នៅពេលណាយើងភ្លេចសេចក្តីពិតនេះ យើងនឹងមានអារម្មណ៍ចន្លោះប្រហោងក្នុងចិត្តនៅទីបំផុត សូម្បីក្នុងពេលដែលយើងពេញចិត្តនឹងជីវិតយើងយ៉ាងខ្លាំងក៏ដោយ ហើយពេលដែលពិបាកបំផុត នឹងបណ្តាលឲ្យយើងចោទសួរអំពីព្រះវត្តមាន ឬសេចក្តីល្អរបស់ព្រះអង្គ ។ ពេលណាយើងមើលទៅជីវិត ដោយទស្សនៈស្របតាមបទគម្ពីររ៉ូម ៨:២៨ អ្វីៗនឹងមានការផ្លាស់ប្តូរ ។ ជាការពិតណាស់ កាលៈទេសៈជាច្រើននៃជីវិតយើងនឹងនៅតែដដែល ។ យើងជួបប្រទះបញ្ហាប្រឈមជាច្រើន តែយើងប្រឈមមុខដាក់ពួកវា ដោយចិត្តកែប្រែជាថ្មី និងដោយក្តីសង្ឃឹមដ៏ធំថា យើងនឹងមានជីវិតអស់កល្ប ។ ព្រះទ្រង់ប្រហែលទតឃើញហេតុផលល្អបំផុត ដែលអ្នកត្រូវបន្តជាប់នៅក្នុងស្ថានភាពដដែលនោះជាច្រើនឆ្នាំ តែព្រះអង្គមិនដែលទុកអ្នកចោលម្នាក់ឯងឡើយ ។ ព្រះអង្គបានសន្យាថា នឹងប្រទានព្រះដ៏ជាជំនួយ១អង្គ (យ៉ូហាន ១៤:១៦-១៧) ហើយព្រះអង្គមិនដែលបោះបង់ចោលផែនការរបស់ទ្រង់ឡើយ ។ ព្រះអង្គមិនដែលបោះបង់ចោលកូនណាម្នាក់ឡើយ ។ អ្នកកំពុងរស់នៅក្នុងការថែរក្សា តាមផែនការរបស់ព្រះអង្គ ដែលមិនចេះអាក់ខាន ។
ពេលណាព្រះបន្ទូលព្រះក្រើនរំឭកអ្នកថា «គ្រប់ការទាំងអស់ផ្សំគ្នា សំរាប់សេចក្ដីល្អដល់ពួកអ្នកដែលស្រឡាញ់ព្រះ» គឺព្រះបន្ទូលព្រះអង្គកំពុងចង្អុលបង្ហាញអ្នក ឲ្យងាកចេញពីទស្សនៈផ្ទាល់ខ្លួន ចេញពីទស្សនៈរបស់លោកិយ ហើយបែរទៅរកព្រះហស្តព្រះដែលយើងមើលមិនឃើញ ដែលកំពុងផ្សំហេតុការណ៍ទាំងអស់នៃជីវិតអ្នក ដើម្បីប្រយោជន៍អ្នក ពោលគឺរាប់បញ្ចូលទាំងរឿងដែលអ្នកមិនបានជ្រើសរើសផងដែរ ។ តើប្រយោជន៍អ្វី? គឺដើម្បី «ឲ្យបានត្រឡប់ដូចជារូបអង្គនៃព្រះរាជបុត្រាទ្រង់» (រ៉ូម ៨:២៩) ។ ក្នុងគ្រប់ការទាំងអស់ ព្រះទ្រង់កំពុងកែប្រែអ្នក ឲ្យមានលក្ខណៈកាន់តែដូចព្រះយេស៊ូវ ដោយត្រៀមជាស្រេច សម្រាប់ថ្ងៃដែលអ្នកនឹងមានអំណរ ពេលដែលបានឃើញព្រះយេស៊ូវ ។
ចូរចាំថា កាលៈទេសៈទាំងអស់នៃជីវិតអ្នក រាប់ចាប់តាំងពីកាលៈទេសៈខ្ពស់បំផុត ទៅកាលៈទេសៈទាបបំផុត គឺជាឧបករណ៍នៃសេចក្តីមេត្តា ដែលព្រះទ្រង់ប្រើ ដើម្បីសម្រេចគោលបំណងដ៏អស់កល្បរបស់ព្រះអង្គ ។ នេះជាការកម្សាន្តចិត្តដ៏ប្រសើរ ដើម្បីឲ្យយើងទុកចិត្តព្រះអង្គជារៀងរាល់ថ្ងៃ! នេះជាហេតុផលដ៏ល្អដែលជំរុញចិត្តយើងឲ្យចង់បម្រើព្រះអង្គនៅថ្ងៃនេះ!
ខគម្ពីរជញ្ជឹងគិត៖ យ៉ូហាន ១៤:១៥-២៧
គម្រោងអានព្រះគម្ពីររយៈពេល១ឆ្នាំ៖ ១សាំយ៉ូអែល ៣០-៣១ និង ១ធីម៉ូថេ ៤