ដំណឹងល្អ លំនាំABC
ដោយAlistair Begg
November 2, 2026
«ខ្ញុំជានំប៉័ងជីវិត អ្នកណាដែលមកឯខ្ញុំ នោះនឹងមិនឃ្លានទៀតឡើយ ហើយអ្នកណាដែលជឿដល់ខ្ញុំ ក៏មិនត្រូវស្រេកដែរ»។ យ៉ូហាន ៦:៣៥
តើព្រះវិហាររបស់អ្នកធ្លាប់បានធ្វើកម្មវិធីឈោងចាប់សហគមន៍ទេ ? អ្នកប្រហែលជាធ្លាប់បានរួមចំណែក ក្នុងព្រឹត្តិការណ៍ទាំងនោះ ដែលមានការចែកអាហារឥតគិតថ្លៃដល់សហគមន៍ក្រីក្រ អមដោយការលេងល្បែងកម្សាន្តជាមួយក្មេងៗ ។ នេះជាសកម្មភាពដ៏ប្រសើរណាស់ ។ យើងពិតជាចង់ឲ្យមនុស្សក្នុងតំបន់ដែលយើងរស់នៅបានដឹងថា យើងមានភាពរួសរាយ ហើយប្រហែលគួរឲ្យចូលចិត្តផងដែរ ។ ប៉ុន្តែ និយាយដោយស្មោះត្រង់ទៅ ក្រុមណាក៏ដោយ ទោះជាអ្នកជឿឬអត់ សុទ្ធតែអាចធ្វើកម្មវិធីដូចនេះ ។
យើងចង់ឲ្យមិត្តភក្តិ និងអ្នកជិតខាងរបស់យើងទទួលបានលើសពីនេះ ។ យើងត្រូវតែមានចិត្ត ដែលចង់ឲ្យពួកគេបានស្គាល់ព្រះយេស៊ូវ ដែលមានព្រះជន្មរស់ឡើងវិញ ហើយរកឃើញជីវិតនៅក្នុងព្រះអង្គ ។
ហេតុផលល្អបំផុត ដែលពួកជំនុំត្រូវធ្វើកម្មវិធីមនុស្សធម៌ក្នុងសហគមន៍ ក៏ជាហេតុផល ដែលពួកជំនុំត្រូវជួបជុំគ្នា ដើម្បីឲ្យបុរស ស្រ្តី និងកុមារអាចមានការស្គាល់ព្រះដ៏រស់ដោយផ្ទាល់ តាមរយៈដំណឹងល្អរបស់ព្រះយេស៊ូវគ្រីស្ទ ។ និយាយរួម យើងចង់ឲ្យអ្នកមិនជឿនៅជុំវិញយើង ក្លាយជាអ្នកដើរតាមព្រះយេស៊ូវដែលមានការប្ដេជ្ញាចិត្ត ។
វិធីមួយ ដើម្បីឲ្យយើងយល់អំពីការផ្សាយដំណឹងល្អ គឺដោយការសូត្រដំណឹងល្អ តាមគំរូអក្សរកាត់ ABC។
A – Admit : ទទួលស្គាល់ ។ យើងរាល់គ្នាត្រូវទទួលស្គាល់អ្វីមួយ ។ មនុស្សម្នាក់ៗសុទ្ធតែមានបាប ។ យើងខ្វះមិនដល់សិរីល្អរបស់ព្រះ (រ៉ូម ៣:២៣)។ ហើយ «ដ្បិតឈ្នួលរបស់អំពើបាប នោះជាសេចក្ដីស្លាប់ តែអំណោយទាននៃព្រះវិញ គឺជាជីវិតដ៏នៅអស់កល្បជានិច្ច ដោយព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា» (៦:២៣) ។ បើយើងមិនទទួលស្គាល់ថា យើងត្រូវការការអត់ទោសបាបទេ យើងនឹងមិនអាចរួចពីបាបទេ ។
B – Believe : ជឿ ។ មានរឿងដែលយើងត្រូវជឿ ។ ព្រះយេស៊ូវគ្រីស្ទបានសុគតជំនួសមនុស្សមានបាប ដូចយើង ។ ដំណឹងល្អមិនបានប្រាប់យើង អំពីអ្វីដែលយើងអាចធ្វើ ដើម្បីឲ្យព្រះទ្រង់ទទួលយើងនោះទេ តែបានប្រាប់យើងអំពីភាពអស្ចារ្យនៃការអ្វីដែលព្រះទ្រង់បានធ្វើ ក្នុងព្រះយេស៊ូវ ។ ដំណឹងល្អបានប្រាប់យើងថា «ព្រះគ្រីស្ទបានសុគតជំនួសយើងរាល់គ្នា នោះគឺក្នុងកាលដែលយើងនៅមានបាបនៅឡើយផង» (រ៉ូម ៥:៨)។ យើងត្រូវតែជឿដំណឹងល្អ ។
C – Come: ចូលមក ។ យើងត្រូវចូលមករកព្រះយេស៊ូវ ។ យើងអាចដឹងថា ខ្លួនយើងមានបាប ហើយថែមទាំងដឹងថា ព្រះយេស៊ូវបានសុគតជំនួសយើង ប៉ុន្តែ បើយើងមិនបានថ្វាយខ្លួនដល់ព្រះអង្គទេ យើងនៅតែវង្វេងក្នុងបាប ។ ព្រះយេស៊ូវមានបន្ទូលថា «អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សំរាក» (ម៉ាថាយ ១១:២៨)។
ជួនកាល អ្នកខ្លះជាប់គាំងនៅចន្លោះចំណុច B និង C ហើយទោះពួកគេបានដឹងថា ខ្លួនជាមនុស្សមានបាប ហើយយល់អំពីដំណឹងល្អហើយក៏ដោយ ក៏ពួកគេមិនដែលបានចូលមករកព្រះអម្ចាស់យេស៊ូវដែរ ។ ចូរយើងពិនិត្យមើលខ្លួនឯង កុំឲ្យខ្លួនយើងជាប់គាំងត្រង់ចំណុចនេះដូចពួកគេឡើយ។ បើដូច្នោះមែន អ្នកត្រូវសួរខ្លួនឯងថា តើអ្នកកំពុងរង់ចាំ ដល់ពេលណាទៀត ? ព្រះអម្ចាស់យេស៊ូវមានបន្ទូលថា «អ្នកណាដែលមកឯខ្ញុំ នោះនឹងមិនឃ្លានទៀតឡើយ ហើយអ្នកណាដែលជឿដល់ខ្ញុំ ក៏មិនត្រូវស្រេកដែរ»។ បើអ្នកមានអារម្មណ៍ថា អ្នកមានចន្លោះប្រហោង និងការស្រេកឃ្លានក្នុងវិញ្ញាណអ្នក ដែលហាក់ដូចជាគ្មានអ្វីអាចបំពេញ និងចម្អែតបាន ចូរចូលមករកព្រះយេស៊ូវចុះ ។ ការស្កប់ចិត្តដ៏ពេញលេញ និងអស់កល្បជានិច្ចកំពុងតែរង់ចាំអ្នកហើយ ។
បើអ្នកបានចូលមករកព្រះយេស៊ូវ ហើយរកឃើញជីវិតក្នុងព្រះអង្គ នោះចូរកុំស្ងាត់ស្ងៀម ដោយមិននិយាយអំពីព្រះអង្គនោះឡើយ ។ ព្រះអង្គគឺជា«នំប៉័ងជីវិត» សម្រាប់ឲ្យយើងចែកចាយបន្តដល់មនុស្សគ្រប់គ្នា! ដូចនេះ ចូរយើង និងពួកជំនុំរបស់យើងបង្ហាញចេញនូវសេចក្តីសប្បុរសនៃដំណឹងល្អ ក្នុងការប្រព្រឹត្តដោយក្តីស្រឡាញ់ ។ ប៉ុន្តែ ព្រះអង្គក៏បានត្រាស់ហៅឲ្យយើងធ្វើលើសនេះទៀត គឺឲ្យផ្សាយសេចក្តីពិតនៃដំណឹងល្អ ក្នុងពាក្យសម្តីឬការប្រព្រឹត្តរបស់យើង ។ តើអ្នកនឹងនាំនរណាខ្លះ ឲ្យទទួល «នំប៉័ងជីវិត» ក្នុងសប្តាហ៍នេះ ?
ខគម្ពីរជញ្ជឹងគិត៖ យ៉ូហាន ៦:៥៣-៦៩
គម្រោងអានព្រះគម្ពីររយៈពេល១ឆ្នាំ៖ ២សាំយ៉ូអែល ២១-២២ និង ៣យ៉ូហាន