តើឪពុកម្តាយកំពុងព្យាយាមខ្លាំងពេក ដើម្បីធ្វើឲ្យកូនៗរបស់ខ្លួនសប្បាយចិត្តឬ? ហើយតើពួកគេទទួលលទ្ធផលផ្ទុយពីអ្វីដែលពួកគេចង់បានឬ? សំណួរទាំងនោះត្រូវបានលើកឡើង នៅក្នុងការសម្ភាសអ្នកស្រីឡូរី ហ្គូលេប(Lori Gottlieb) ដែលជាអ្នកនិពន្ធអត្ថបទមួយ លើប្រធានបទ “យុវជនវ័យក្មេងដែលមិនសប្បាយចិត្ត”។ ពេលនោះ គាត់បានឆ្លើយថា “ចាស ឪពុកម្តាយដែលមិនព្រមអនុញ្ញាតឲ្យកូនមានការដកពិសោធន៍នឹងបរាជ័យ ឬការមិនសប្បាយចិត្ត គឺកំពុងតែធ្វើឲ្យកូនរបស់ខ្លួន មានការយល់ខុសអំពីពិភលោក ហើយមិនបានឲ្យពួកគេត្រៀមខ្លួន ដើម្បីប្រឈមមុខនឹងការអាក្រក់ ដែលពិតជានឹងកើតមានក្នុងជីវិតយុវវ័យឡើយ។ និយាយរួម ឪពុកម្តាយទាំងនោះបានបណ្តាលឲ្យកូនមានអារម្មណ៍ទទេ ហើយថប់បារម្ភអំពីពេលអនាគត”។
គ្រីស្ទបរិស័ទខ្លះចង់ឲ្យព្រះអម្ចាស់ ក្លាយជាឪពុកដែលការពារពួកគេ ឲ្យរួចផុតពីទុក្ខព្រួយ និងការខកចិត្តគ្រប់យ៉ាង។ ប៉ុន្តែ ទ្រង់មិនមែនជាឪពុកប្រភេទនេះឡើយ។ ផ្ទុយទៅវិញ ទ្រង់សព្វព្រះទ័យឲ្យកូនៗរបស់ទ្រង់ ឆ្លងកាត់ការលំបាក(អេសាយ ៤៣:២ ១ថែស្សាឡូនិច ៣:៣)។
ពេលយើងចាប់ផ្តើមដំណើរជីវិត ដោយជំនឿ ដែលយល់ច្រឡំថា ជីវិតមានភាពងាយស្រួល ដែលនឹងធ្វើឲ្យយើងមានការសប្បាយចិត្តដ៏ពិត នោះយើងនឹងមានភាពនឿយណាយ នៅក្នុងការព្យាយាមរស់នៅ តាមជំនឿដែលយល់ច្រឡំនោះ។ តែពេលយើងបានស្គាល់ការពិត ដែលចែងថា ជីវិតមានការលំបាក នោះយើងអាចលះបង់ជីវិតរបស់យើង ដើម្បីទទួលបាននូវជីវិតដែលល្អ និងកោតខ្លាចព្រះវិញ។ ជីវិតដែលមានការលំបាក ធ្វើឲ្យយើងមានភាពរឹងមាំ សម្រាប់ឆ្លងកាត់ពេលដែលមានការលំបាក ក្នុងជីវិត។
ព្រះទ្រង់សព្វព្រះទ័យនឹងធ្វើឲ្យយើងមានភាពបរិសុទ្ធ គឺមិនគ្រាន់តែធ្វើឲ្យយើងមានអំណរប៉ុណ្ណោះឡើយ(១ថែស្សាឡូនិច ៣:១៣)។ ហើយកាលណាយើងមានភាពបរិសុទ្ធ នោះយើងក៏ងាយនឹងមានអំណរ និងភាពស្កប់ចិត្តដ៏ពិតផងដែរ។-Julie Ackrman Link
