ស្នាមអង្គុលីរបស់ព្រះ
ដោយDennis Fisher
May 6, 2018
កញ្ញាលីហ្គុន ស្ទីវិន(Lygon Stevens) ចូលចិត្តឡើងភ្នំ ជាមួយបងប្រុសរបស់នាង ឈ្មោះនីក(Nick)។ អ្នកទាំងពីរជាអ្នកឡើងភ្នំដែលមានបទពិសោធន៍ ហើយក៏បានឡើងដល់កំពូលភ្នំ មែកឃីនលេយ(ដេណាលី) ដែលជាភ្នំខ្ពស់ជាងគេ នៅតំបន់អាមេរិកខាងជើង។ បន្ទាប់មក ក្នុងខែមករា ឆ្នាំ២០០៨ ពួកគេបានជួបហេតុការផ្ទាំងទឹកកករអឹលចុះពីលើភ្នំ ដែលបាននាំទៅជាមួយ បណ្តាលឲ្យលោកនីករងរបួស ហើយកញ្ញាលីហ្គុនក៏បានបាត់បង់ជីវិត ក្នុងវ័យ២០ឆ្នំា។ ក្រោយមក លោកនីកក៏បានរកឃើញសៀវភៅកំណត់ហេតុរបស់ប្អូនស្រីខ្លួន នៅក្នុងការបូបស្ពាយរបស់នាង។ ពេលនោះ គាត់មានការលើកទឹកចិត្តយ៉ាងខ្លាំង ដោយសារអ្វីដែលនាងបានសរសេរក្នុងសៀវភៅនោះ។ សៀវភៅនោះ មានពេញទៅដោយការជញ្ជឹងគិតព្រះបន្ទូល ការអធិស្ឋាន និងការសរសើរដំកើងព្រះ គឺដូចដែលនាងបានសរសេរថា “ខ្ញុំជាស្នាដៃសីល្បៈ ដែលព្រះទ្រង់បានរចនាមក ដោយមានហត្ថលេខារបស់ទ្រង់។ ប៉ុន្តែ ទ្រង់មិនមែនធ្វើតែប៉ុណ្ណេះឡើយ។ តាមពិត ទ្រង់ទើបតែចាប់ផ្តើម … ខ្ញុំមានស្នាមអង្គុលីរបស់ទ្រង់ នៅលើជីវិតខ្ញុំ។ ទ្រង់មិនបានបង្កើតមនុស្សម្នាក់ទៀត ឲ្យដូចខ្ញុំឡើយ... ខ្ញុំមានកិច្ចការមួយដែលត្រូវធ្វើក្នុងជីវិតនេះ ដែលមានតែខ្ញុំទេ ដែលសក្តិសមនឹងធ្វើវា”។ ទោះកញ្ញាលីហ្គុន មិនមានជីវិតខាងសាច់ឈាម នៅលើផែនដីនេះទៀតក៏ដោយ ក៏កេរដំណែល នៃជីវិត និងសៀវភៅកត់ត្រារបស់នាង បានលើកទឹកចិត្ត ហើយជំរុញចិត្តអ្នក ដែលនាងបានឃ្លាតចាកចេញទៅ។ ដោយសារព្រះទ្រង់បានបង្កើតយើងមក ឲ្យមានរូបភាពដូចទ្រង់(លោកុប្បត្តិ ១:២៦) នោះមនុស្សម្នាក់ៗ ជា “ស្នាដៃសីល្បៈ ដែលព្រះទ្រង់បានចុះហត្ថលេខា”។ គឺដូចដែលសាវ័កប៉ុលបានមានប្រសាសន៍ថា “ដ្បិតយើងរាល់គ្នាជាស្នាដៃ ដែលទ្រង់បង្កើតក្នុងព្រះគ្រីស្ទយេស៊ូវសំរាប់ការល្អ ដែលព្រះបានរៀបចំជាមុន ឲ្យយើងរាល់គ្នាប្រព្រឹត្តតាម”(អេភេសូរ ២:១០)។ សូមសរសើរដល់ព្រះ ដែលទ្រង់បានប្រើយើងម្នាក់ៗ តាមពេលវេលា និងមធ្យោបាយរបស់ទ្រង់ ដើម្បីជួយអ្នកដទៃ។—DENNIS FISHER
បទគម្ពីរប្រចាំថ្ងៃ
ដ្បិតយើងរាល់គ្នាជាស្នាដៃ ដែលទ្រង់បង្កើតក្នុងព្រះគ្រីស្ទយេស៊ូវសំរាប់ការល្អ ដែលព្រះបានរៀបចំជាមុន ឲ្យយើងរាល់គ្នាប្រព្រឹត្តតាម។ អេភេសូរ ២:១០