ជំនួយពីស្ថានសួគ៌
ដោយLisa Samra
August 12, 2018
និមិត្តសញ្ញាសម្ងាត់ អេស អូ អេស (SOS) ត្រូវបានបង្កើតឡើង នៅក្នុងឆ្នាំ ១៩០៥ នៅពេលដែលក្រុមនាវិករិះរកមធ្យោបាយ ដើម្បីបង្ហាញឲ្យគេដឹងថា ខ្លួនកំពុងស្ថិតក្នុងស្ថានភាពដ៏គ្រោះថ្នាក់។ និមិត្តសញ្ញាសម្ងាត់នេះ ត្រូវបានគេទទួលស្គាល់ នៅក្នុងឆ្នាំ ១៩១០ នៅពេលដែលនាវាឈ្មោះ ស្ទីមស៊ីព ខិនថាក់គី កំពុងតែលិចចូលទៅក្នុងទឹក ហើយក៏បានប្រើ និមិត្តសញ្ញានេះ ដែលនាំឲ្យគេមកជួយសង្រ្គោះមនុស្ស៤៦នាក់ នៅលើនាវា ទាន់ពេលវេលា។ និមិត្តសញ្ញា អេស អូ អេស ជានិមិត្តសញ្ញាដែលគេទើបតែឆ្នៃបង្កើត ជាង១០០ឆ្នាំមុន ប៉ុន្តែ ការស្រែករកជំនួយ គឺកើតមានតាំងតែពីដើមដំបូងនៃប្រវត្តិសាស្រ្ត របស់មនុស្សជាតិ។ ជាញឹកញាប់ យើងច្រើនតែឃើញការស្រែករកជំនួយ នៅក្នុង រឿងរបស់លោកយ៉ូស្វេ នៅក្នុងព្រះគម្ពីរសញ្ញាចាស់។ នៅសម័យនោះ លោកយ៉ូស្វេ ប្រឈមមុខនឹងការជំទាស់ពីពួកអ៊ីស្រាអែល (យ៉ូស្វេ ៩:១៨) និងការឆ្លងកាត់ទឹកដីដ៏ពិបាក មុននឹងចូលទៅដល់ទឹកដីសន្យា(៣:១៥-១៧) អស់រយៈពេលជាង១៤ឆ្នាំ។ ក្នុងរយៈពេលនោះ ពួកអ៊ីស្រាអែលបានវាយដណ្ដើមយកឈ្នះពួកខ្មាំងសត្រូវជាបណ្ដើរៗ ហើយក៏បានតាំងទីលំនៅ លើទឹកដីដែលព្រះទ្រង់បានសន្យាប្រទានឲ្យពួកគេ។ ក្នុងអំឡុងពេលនៃការតយុទ្ធនោះ “ព្រះអម្ចាស់ទ្រង់បានគង់នៅជាមួយនឹងលោកយ៉ូស្វេ”(៦:២៧)។ បទគម្ពីរយ៉ូស្វេ ជំពូក១០ បានចែងថា ពួកកូនចៅអ៊ីស្រាអែល បានចេញទៅជួយពួកក្រុងគីបៀន ជាសម្ព័ន្ធមិត្តរបស់ខ្លួន ដែលកំពុងរងការវាយប្រហារពីពួកស្ដេចចំនួនប្រាំអង្គ។ ពេលនោះ លោកយ៉ូស្វេដឹងថា ពួកអ៊ីស្រាអែលពិតជាត្រូវការជំនួយពីព្រះអម្ចាស់ ដើម្បីយកឈ្នះ លើពួកខ្មាំងសត្រូវដែលមានគ្នាច្រើនសណ្ឋឹកយ៉ាងនេះ(ខ.១២)។ ព្រះទ្រង់ក៏បានឆ្លើយតប ដោយបានចាត់ឲ្យមានព្យុះទឹកកក ហើយទ្រង់ថែមទាំងបានធ្វើឲ្យព្រះអាទិត្យឈប់ទ្រឹង នៅពាក់កណ្តាលមេឃ ដើម្បីទុកពេលឲ្យពួកអ៊ីស្រាអែលយកឈ្នះពួកខ្មាំងសត្រូវ។ ព្រះគម្ពីរយ៉ូស្វេ ១០:១៤ បានរំឭកឡើងវិញថា ជាការពិតណាស់ “ព្រះយេហូវ៉ាបានច្បាំងជំនួសសាសន៍អ៊ីស្រាអែល!” ប្រសិនបើអ្នកស្ថិតនៅក្នុងស្ថានភាពដ៏លំបាក អ្នកអាចស្រែករកជំនួយពីព្រះជាម្ចាស់។ ជំនួយដែលយើងទទួលមកពីព្រះជាម្ចាស់ មានលក្ខណៈខុសពីជំនួយដែលលោកយ៉ូស្វេបានទទួល នៅសម័យនោះ ប៉ុន្តែ ជំនួយនោះអាចជា ការទទួលបានការងារ ដែលមិនធ្លាប់នឹកស្មានដល់ ឬការព្យាបាលពីវេជ្ជបណ្ឌិតដែលយល់ច្បាស់អំពីជំងឺ ឬមួយជាសន្តិភាពនៅក្នុងចិត្ត នៅពេលមានជម្ងឺ។ ចូរយើងទទួលការកម្សាន្តចិត្ត ដោយដឹងថា ព្រះទ្រង់នឹងឆ្លើយតបចំពោះយើង តាមមធ្យោបាយជាច្រើនសណ្ឋឹក ពេលដែលយើងស្រែករកទ្រង់។—Lisa Samra
បទគម្ពីរប្រចាំថ្ងៃ
ដ្បិតព្រះយេហូវ៉ាច្បាំងជំនួសសាសន៍អ៊ីស្រាអែល! យ៉ូស្វេ ១០:១៤