គ្មានអ្វីដែលសាមញ្ញនោះទេ
ដោយKaren Huang
October 8, 2021
ពេលដែលអ្នកស្រីអានីតា(Anita) បានលាចាកលោក ក្នុងអាយុ៩០ឆ្នាំ ក្នុងដំណេករបស់គាត់ ភាពស្ងាត់ស្ងៀមនៃការស្លាប់របស់គាត់ បានឆ្លុះបញ្ចាំង អំពីភាពស្ងាត់ស្ងៀមនៃជីវិតគាត់ផងដែរ។ គាត់ជាស្រ្តីមេម៉ាយម្នាក់ ដែលបានធ្វើការលះបង់សម្រាប់កូនចៅរបស់គាត់ ហើយក៏បានធ្វើជាមិត្តសំឡាញ់របស់យុវនារីជាច្រើន ក្នុងពួកជំនុំ។ អ្នកស្រីអានីតា មិនមានឈ្មោះល្បី ជាអ្នកមានប្រាជ្ញា ឬមានស្នាដៃនោះទេ។ ប៉ុន្តែ ជំនឿដ៏ជ្រាលជ្រៅ ដែលគាត់មានចំពោះព្រះ បានបណ្តាលចិត្តអ្នកដែលស្គាល់គាត់។ មិត្តភក្តិរបស់ខ្ញុំម្នាក់បាននិយាយថា “ពេលដែលខ្ញុំមិនដឹងថា ត្រូវដោះស្រាយបញ្ហាដោយរបៀបណា ខ្ញុំមិនបានរំឭកខ្លួនឯង អំពីពាក្យសម្តីរបស់គ្រូអធិប្បាយ ឬអ្នកនិពន្ធដ៏ល្បីល្បាញនោះទេ។ គឺខ្ញុំគិត អំពីពាក្យអ្វីដែលអ្នកស្រីអានីតានិយាយ”។ មនុស្សជាច្រើនមានលក្ខណៈដូចអ្នកស្រីអានីតា ជាមនុស្សសាមញ្ញ កំពុងរស់នៅក្នុងជីវិតសាមញ្ញ។ ឈ្មោះយើងនឹងមិនឮគេនិយាយ ក្នុងព័ត៌មាននោះទេ ហើយគេក៏នឹងមិនសង់រូបសំណាក់ ដើម្បីផ្តល់កិត្តិយសដល់យើងដែរ។ តែជីវិតដែលរស់នៅ ដោយជំនឿ ក្នុងព្រះយេស៊ូវ មិនមែនជាជីវិតធម្មតាឡើយ។ បទគម្ពីរហេព្រើរ ជំពូក១១ បាននិយាយអំពីមនុស្សមួយចំនួន ដោយមិនបញ្ចេញឈ្មោះពួកគេ (ខ.៣៥-៣៨) ។ ពួកគេបានដើរ តាមផ្លូវដ៏លំបាកវេទនា ហើយក៏មិនបានទទួលរង្វាន់ ក្នុងជីវិតនេះដែរ(ខ.៣៩)។ តែដោយសារពួកគេស្តាប់បង្គាប់ព្រះ នោះសេចក្តីជំនឿរបស់ពួកគេមិនអសារឥតការឡើយ។ ព្រះទ្រង់ប្រើជីវិតពួកគេ ទោះពួកគេមិនល្អឥតខ្ចោះក៏ដោយ(ខ.៤០)។ តើអ្នកមានអារម្មណ៍បាក់ទឹកចិត្ត ដោយសារជីវិតអ្នកហាក់ដូចជាសាមញ្ញពេក នោះចូរចាំថា ជីវិតដែលរស់នៅ ដោយជំនឿ លើព្រះ មានឥទ្ធិពលអស់កល្បជានិច្ច។ ទោះយើងជាមនុស្សសាមញ្ញ យើងអាចមានជំនឿដ៏អស្ចារ្យ។—Karen Huang
បទគម្ពីរប្រចាំថ្ងៃ
ពួកអ្នកទាំងនោះ ទោះបើមានសេចក្តីបន្ទាល់ពីគេថា គេមានសេចក្តីជំនឿក៏ដោយ គង់តែគេមិនបានទទួលសេចក្តី ដែលបានសន្យានោះទេ។ ហេព្រើរ ១១:៣៩