ដែលទ្រង់កំសាន្តចិត្តយើងរាល់គ្នា ក្នុងគ្រប់ទាំងសេចក្តីវេទនា ប្រយោជន៍ឲ្យយើងអាចនឹងកំសាន្តចិត្តអ្នកឯទៀត ក្នុងអស់ទាំងសេចក្តីវេទនារបស់គេបានដែរ។ ២កូរិនថូស ១:៤
ពេលដែលកូនស្រីរបស់ខ្ញុំ ឈ្មោះ ហេយលី(Hayley) មកលេងខ្ញុំ ខ្ញុំបានឃើញកូនប្រុសរបស់គាត់ អាយុ៣ឆ្នាំ ឈ្មោះ ខាលុម(Callum) មានដៃអាវចម្លែក។ ដៃអាវនោះវែង មានស្រោមដៃជាប់នៅខាងចុង។ ចៅប្រុសខ្ញុំមានជំងឺត្រអក ម្យ៉ាងដែលធ្វើឲ្យស្បែករមាស់ គ្រើម និងឈឺ។ ហេយលីក៏បានពន្យល់ខ្ញុំថា ដៃអាវនោះជួយបង្ការ ខាលុម កុំឲ្យអេះ និងធ្វើឲ្យស្បែករបស់គាត់ដាច់រលាត់។
៧ខែក្រោយមក ស្បែករបស់ហេយលីក៏បានកើតរមាស់ ហើយនាងក៏បានអេះមិនឈប់។ នាងក៏បានសារភាពថា ឥឡូវនេះ នាងយល់អំពីការលំបាកដែលខាលុមបានស៊ូទ្រាំ ហើយនាងប្រហែលគួរតែពាក់ដៃអាវ និងស្រោមដៃនោះដែរ។
ស្ថានភាពរបស់ហេយលី បានធ្វើឲ្យខ្ញុំនឹកចាំ អំពីបទគម្ពីរ ២កូរិនថូស ១:៣-៥ ដែលក្នុងនោះ សាវ័កប៉ុលបានមានប្រសាសន៍ថា ព្រះនៃយើងជា “ជាព្រះដ៏កំសាន្តចិត្តគ្រប់ជំពូក ដែលទ្រង់កំសាន្តចិត្តយើងរាល់គ្នា ក្នុងគ្រប់ទាំងសេចក្តីវេទនា ប្រយោជន៍ឲ្យយើងអាចនឹងកំសាន្តចិត្តអ្នកឯទៀត ក្នុងអស់ទាំងសេចក្តីវេទនារបស់គេបានដែរ គឺដោយសារសេចក្តីក្សាន្តនោះឯង ដែលព្រះបានកំសាន្តចិត្តយើងស្រេចហើយ ដ្បិតដូចជាសេចក្តីទុក្ខលំបាករបស់ព្រះគ្រីស្ទ បានចំរើនឡើងដល់យើងរាល់គ្នាយ៉ាងណា នោះសេចក្តីក្សាន្តចិត្តនៃយើងរាល់គ្នា ក៏ចំរើនដោយសារព្រះគ្រីស្ទបែបដូច្នោះដែរ”។
ជួនកាល ព្រះទ្រង់អនុញ្ញាតឲ្យយើង ឆ្លងកាត់ពេលដ៏លំបាក ដែលមានជំងឺ ការបាត់បង់ ឬវិបត្តិ។ ព្រះអង្គបង្រៀនយើង តាមរយៈទុក្ខលំបាករបស់យើង ដើម្បីឲ្យយើងស្គាល់តម្លៃនៃទុក្ខវេទនាដ៏លំបាកបំផុត ដែលព្រះគ្រីស្ទបានឆ្លងកាត់ ជំនួសយើង នៅលើឈើឆ្កាង។ ពេលណាយើងពឹងផ្អែកលើព្រះអង្គ ដើម្បីទទួលការកម្សាន្តចិត្ត និងកម្លាំង យើងអាចកម្សាន្តចិត្ត នឹងលើកទឹកចិត្តអ្នកដទៃ ក្នុងទុក្ខលំបាករបស់ពួកគេផងដែរ។ ចូរយើងពិចារណា អំពីអ្នក ដែលយើងអាចកម្សាន្តចិត្ត ដោយសារការកម្សាន្តចិត្ត ដែលយើងបានទទួលពីព្រះអង្គ។—Goh Bee Lee
តើព្រះទ្រង់បានជួយអ្នក ឲ្យកម្សាន្តចិត្តនរណាខ្លះ តាមរយៈបទពិសោធន៍នៃទុក្ខលំបាកដែលអ្នកបានឆ្លងកាត់? តើអ្នកអាចធ្វើការអ្វីខ្លះ ដើម្បីជួយពួកគេ ឲ្យស្គាល់តម្លៃនៃការរងទុក្ខរបស់ព្រះគ្រីស្ទ នៅលើឈើឆ្កាង តាមរយៈការឈឺចាប់របស់ពួកគេ?
ឱព្រះអម្ចាស់ សូមព្រះអង្គជួយទូលបង្គំ ឲ្យពិសោធន៍នឹងការកម្សាន្តចិត្តរបស់ព្រះអង្គ ក្នុងពេលដែលទូលបង្គំជួបទុក្ខលំបាក និងក្លាយជាប្រភពនៃការកម្សាន្តចិត្តដល់អ្នកដទៃ។
Read more about comforting others at DiscoverySeries.org/Q0729.
គម្រោងអានព្រះគម្ពីររយៈពេល១ឆ្នាំ : យេរេមា ៣០-៣១ និង ភីលេម៉ូន
