សូមឲ្យទូលបង្គំបានឮសេចក្តីសប្បុរសរបស់ទ្រង់ នៅពេលព្រឹក។ ទំនុកដំកើង ១៤៣:៨
នៅឆ្នាំ២០១៩ លោកឃែប ដាសវូឌ(Cap Dashwood) និងឆ្កែពូជឡាប្រាដូរបស់គាត់ ឈ្មោះ ឆេឡា(Chaela) បានសម្រេចបាននូវរឿងដ៏គួរឲ្យកត់សំគាល់ ដោយឡើងទៅដល់កំពូលភ្នំជារៀងរាល់ថ្ងៃ ជាមួយគ្នា បាន៣៦៥ថ្ងៃ។
លោកដាសវូឌមានរឿងមួយ សម្រាប់និយាយប្រាប់យើង ដែលធ្វើឲ្យប៉ះពាល់ចិត្ត។ គាត់បានរត់ចោលផ្ទះ ពេលគាត់មានអាយុ១៦ឆ្នាំ។ គាត់គ្រាន់តែពន្យល់ថា មូលហេតុ គឺដោយសារគាត់ជួបរឿងអាក្រក់ជាច្រើន ក្នុងគ្រួសារ។ ប៉ុន្តែ ស្នាមរបួសពីអតីតកាលនេះ បាននាំឲ្យគាត់ស្វែងរកការព្យាបាល នៅកន្លែងផ្សេង។ គាត់ថា ជួនកាល ពេលយើងមានការខកចិត្ត ដោយសារអ្នកដទៃ យើងត្រូវងាកទៅរកអ្វីផ្សេងទៀត។ សម្រាប់លោកដាសវូឌ ការឡើងភ្នំ និងសេចក្តីស្រឡាញ់ឥតលក្ខខណ្ឌរបស់ឆ្កែគាត់ បានក្លាយជាផ្នែកមួយនៃការព្យាបាលចិត្តគាត់។
សម្រាប់អ្នកដែលមានក្តីស្រឡាញ់ជ្រាលជ្រៅ ចំពោះសត្វចិញ្ចឹម ដូចខ្ញុំដែរ មូលហេតុដែលយើងស្រឡាញ់ពួកវា គឺដោយសារពួកវាស្រឡាញ់យើង ដោយភាពផ្អែមល្ហែម និងគ្មានលក្ខខ័ណ្ឌ ជាក្តីស្រឡាញ់ដ៏កំរ។ តែខ្ញុំចូលចិត្តគិតថា ក្តីស្រឡាញ់ដែលពួកគេមានចំពោះយើង ដោយគ្មានការហត់នឿយ គឺបានចង្អុលបង្ហាញយើង ឲ្យងាកទៅរកការពិតដែលធំប្រសើរជាង និងជ្រាលជ្រៅជាងក្តីស្រឡាញ់របស់មនុស្សដែលមិនស្ថិតស្ថេរ ពោលគឺងាកទៅរកក្តីស្រឡាញ់របស់ព្រះ ដែលមិនចេះរង្គោះរង្គើ និងគ្មានព្រំដែន ជាព្រះទ្រទ្រង់ចក្រវាលទាំងមូល។
ក្នុងបទគម្ពីរទំនុកដំកើង ១៤៣ និងក្នុងការអធិស្ឋានជាច្រើនទៀតរបស់ស្តេចដាវីឌ ទ្រង់មានជំនឿលើសេចក្តីស្រឡាញ់ដ៏ស្ថិតស្ថេរបស់ព្រះ(ខ.១២) ដែលនាំឲ្យគាត់មានសង្ឃឹម ក្នុងពេលដែលគាត់មានអារម្មណ៍ថា ឯកោយ៉ាងខ្លាំង។ តែការដើរជាមួយព្រះពេញមួយជីវិត បានធ្វើឲ្យទ្រង់មានកម្លាំងល្មម នឹងទុកចិត្តថា ទ្រង់នឹងបានឮសេចក្តីសប្បុរសរបស់ព្រះអម្ចាស់ នៅពេលព្រឹក(ខ.៨)។
គឺមានក្តីសង្ឃឹមល្មម នឹងទុកចិត្តព្រះអង្គជាថ្មី ហើយអនុញ្ញាតឲ្យព្រះអង្គដឹកនាំតាមផ្លូវ ដែលយើងមិនស្គាល់(ខ.៨)។—Monica La Rose
តើអ្នកបានឃើញសញ្ញានៃសេចក្តីស្រឡាញ់របស់ព្រះ ដ៏ស្ថិតស្ថេរ គ្មានទីបញ្ចប់ ក្នុងពិភពលោកយ៉ាងណាខ្លះ? តើអ្នកបានពិសោធន៍នឹងសេចក្តីស្រឡាញ់របស់ព្រះ តាមរយៈអ្នកដទៃយ៉ាងណាខ្លះ ដែលនាំឲ្យអ្នកមានក្តីសង្ឃឹមជាថ្មី និងចិត្តក្លាហានឡើង?
ឱព្រះនៃសេចក្តីស្រឡាញ់ ទូលបង្គំសូមអរព្រះគុណព្រះអង្គ ដែលទោះជាមានរបួស និងការឈឺចាប់យ៉ាងណាក៏ដោយ ព្រះអង្គនៅតែអាចប្រោសទូលបង្គំឲ្យជា។ ទូលបង្គំសូមអរព្រះគុណព្រះអង្គ សម្រាប់ការជួយទូលបង្គំឲ្យជឿលើក្តីស្រឡាញ់ និងមានអំណរឡើងវិញ។ សូមព្រះអង្គជួយទូលបង្គំឲ្យនាំអ្នកដទៃ ឲ្យស្គាល់សេចក្តីស្រឡាញ់ផងដែរ។
គម្រោងអានព្រះគម្ពីររយៈពេល១ឆ្នាំ : អេសេគាល ១៦-១៧ និង យ៉ាកុប ៣
