គឺនឹងប្រកាសពីអស់ទាំងសេចក្តីសរសើរនៃព្រះយេហូវ៉ា ដល់ដំណមនុស្សជាន់ក្រោយឲ្យបានស្តាប់ ព្រមទាំងឥទ្ធានុភាព និងការអស្ចារ្យ ដែលទ្រង់បានធ្វើផង។-ទំនុកដំកើង ៧៨:៤
ឥដ្ឋការ៉ូពណ៌ខៀវលាយសសម្រាប់តាំងលម្អ ដែលឃើញមានជាធម្មតា ក្នុងផ្ទះរបស់ជនជាតិហូឡង់ មានប្រភពដើម នៅទីក្រុងដេលត៍។ ឥដ្ឋការ៉ូទាំងនោះច្រើនតែពិពណ៌នា អំពីទិដ្ឋភាពដ៏ល្បីល្បាញរបស់ប្រទេសហូឡង់ ដែលមានដូចជា ទេសភាពដ៏ស្រស់ស្អាត ប៉មកង្ហារធំៗដែលឃើញមាននៅទូទាំងប្រទេស និងមនុស្សកំពុងធ្វើការ និងលេងកម្សាន្ត។
នៅសតវត្សរ៍ទី១៩ ក្នុងសៀវភៅ ដែលលោកឆាល ឌីខិន(Charles Dickens) បាននិពន្ធ មានចំណងជើងថា បទចម្រៀងណូអែល គាត់បានសរសេរ អំពីរបៀបដែលគេបានប្រើឥដ្ឋការ៉ូទំាងនេះ ដើម្បីពិពណ៌នាអំពីអត្ថន័យក្នុងព្រះគម្ពីរ។ ក្នុងការរៀបរាប់ អំពីឡកម្តៅចាស់មួយ ដែលជនជាតិហូឡង់បានសង់ឡើង ដោយប្រើឥដ្ឋការ៉ូទាំងនោះ ធ្វើជាកម្រាលឥដ្ឋ គាត់បានសរសេរថា : “ឥដ្ឋការ៉ូនោះមានរូបលោកកាអ៊ីន និងអេបិល កូនស្រីស្តេចផារ៉ោន ក្សត្រីនៃស្រុកសេបា … និងពួកសាវ័កធ្វើដំណើរតាមសមុទ្រ ជាដើម”។ ក្រុមគ្រួសារជាច្រើនបានប្រើឥដ្ឋការ៉ូទាំងនេះ ធ្វើជាឧបករណ៍សម្រាប់បង្រៀន នៅពេលដែលពួកគេជួបជុំគ្នា ក្នុងភាពកក់ក្តៅ នៅជុំវិញឡកម្តៅ ហើយចែកចាយរឿងក្នុងព្រះគម្ពីរ។ ពួកគេបានរៀនអំពីចរិយាសម្បត្តិរបស់ព្រះ ដែលមានដូចជាសេចក្តីយុត្តិធម៌ សេចក្តីអាណិត និងសេចក្តីមេត្តារបស់ព្រះអង្គ។
សេចក្តីពិតនៃព្រះគម្ពីរ នៅតែមានសារៈសំខាន់ចំពោះយើង ក្នុងពេលបច្ចុប្បន្ន។ បទគម្ពីរទំនុកដំកើង ជំពូក៧៨ បានលើកទឹកចិត្តយើង ឲ្យបង្រៀន “សេចក្តីអាថ៌កំបាំងពីចាស់បូរាណ ជាសេចក្តីដែលពួកយើងធ្លាប់បានឮបានដឹងហើយដែលឪពុកយើងបានប្រាប់តៗមក”(ខ.២-៣)។ បទគម្ពីរនេះក៏បានបង្គាប់យើងឲ្យ “ប្រកាសពីអស់ទាំងសេចក្តីសរសើរនៃព្រះយេហូវ៉ា ដល់ដំណមនុស្សជាន់ក្រោយឲ្យបានស្តាប់ ព្រមទាំងឥទ្ធានុភាព និងការអស្ចារ្យ ដែលទ្រង់បានធ្វើផង…ដើម្បីឲ្យដំណមនុស្សជាន់ក្រោយបានស្គាល់ … ហើយប្រាប់ដល់កូនចៅគេតទៅទៀត(ខ.៤,៦)។
ដោយជំនួយមកពីព្រះ យើងអាចរកឃើញមធ្យោបាយដ៏ប៉ិនប្រសប់ និងមានប្រសិទ្ធភាព ដើម្បីពន្យល់សេចក្តីពិតនៃព្រះគម្ពីរ ដល់មនុស្សនៅជំនាន់នីមួយៗ ខណៈពេលដែលយើងព្យាយាមថ្វាយដល់ព្រះ នូវព្រះកិត្តិនាម និងការសរសើរគ្រប់យ៉ាង ដែលព្រះអង្គសក្តិសមនឹងទទួល។—Cindy Hess Kasper
តើមានវីធីណាខ្លះ ដែលមានប្រសិទ្ធភាព នៅក្នុងការពន្យល់សេចក្តីពិតនៃព្រះគម្ពីរ ដល់អ្នកដទៃ? តើនរណាខ្លះ ចាំបាច់ត្រូវស្គាល់ “កិច្ចការរបស់ព្រះអម្ចាស់ ដែលសក្តិសមនឹងទទួលការសរសើរ”?
ឱព្រះនៃសេចក្តីស្រឡាញ់ សូមព្រះអង្គបង្ហាញទូលបង្គំ នូវវិធីពន្យល់ អំពីអ្វីដែលទូលបង្គំបានរៀនពីព្រះគម្ពីរ ដើម្បីឲ្យអ្នកដទៃបានស្គាល់កិច្ចការដ៏អស្ចារ្យដែលព្រះអង្គបានធ្វើ។
To learn more about the central meaning of the Bible, visit ChristianUniversity.org/HR110.
គម្រោងអានព្រះគម្ពីររយៈពេល១ឆ្នាំ: ដានីយ៉ែល ១-២ និង ១យ៉ូហាន ៤
