អ្នកឲ្យដោយអំណរ
ដោយEster Aescobar
December 6, 2021
ចូរឲ្យគ្រប់គ្នាធ្វើតាមដែលសំរេចក្នុងចិត្តចុះ មិនមែនដោយស្តាយ ឬដោយបង្ខំឡើយ ដ្បិតព្រះទ្រង់ស្រឡាញ់ដល់អ្នកណាដែលថ្វាយដោយអំណរ។ ២កូរិនថូស ៩:៧ លោកនីកូឡាស បានកើតនៅសតវត្សរ៍ទី៣។ កាលនោះ គាត់មិនបានដឹងថា បន្ទាប់ពីគាត់បានលាចាកលោកទៅ ជាច្រើនសតវត្សរ៍ក្រោយមក គេនឹងហៅគាត់ថា សាន់តា ក្លូស(Santa Claus)។ គាត់គ្រាន់តែជាបុរសម្នាក់ ដែលស្រឡាញ់ព្រះ និងពិតជាយកចិត្តទុកដាក់ចំពោះអ្នកដទៃ ហើយមានឈ្មោះល្បីថា បានលះបង់របស់ទ្រព្យឲ្យអ្នកដទៃ ដោយអំណរ ព្រមទាំងបានធ្វើការល្អជាច្រើន។ មានរឿងមួយដំណាលថា បន្ទាប់ពីគាត់បានដឹងថា មានគ្រួសារមួយជួបការខ្វះខាតធ្ងន់ធ្ងរ គាត់ក៏បានទៅផ្ទះរបស់ពួកគេនៅពេលយប់ ហើយក៏បានបោះមាសមួយកញ្ចប់ ចូលតាមបង្អួច ធ្លាក់ចូលទៅក្នុងស្បែកជើង ឬស្រោមជើង ដែលគេសំដិលនៅក្បែរឡកម្តៅ។ តួអង្គសាន់តា ក្លូស ដែលមានក្នុងរឿងនិទាន គ្រាន់តែជាតួអង្គនៃរឿងប្រឌិតប៉ុណ្ណោះ តែនៅមុនសម័យលោកនីកូឡាស ដែលជាមនុស្សពិត សាវ័កប៉ុលបានជំរុញអ្នកជឿ នៅទីក្រុងកូរិនថូស ឲ្យធ្វើជាអ្នកឲ្យ ឬថ្វាយដោយអំណរ។ គាត់បានសរសេរសំបុត្រផ្ញើទៅពួកគេ ដោយរៀបរាប់អំពីការខ្វះខាតធ្ងន់ធ្ងរ ដែលបងប្អូនរួមជំនឿរបស់ពួកគេ នៅទីក្រុងយេរូសាឡិមកំពុងជួបប្រទះ ហើយក៏បានលើកទឹកចិត្តពួកគេ ឲ្យជួយឧបត្ថម្ភ ដោយចិត្តសប្បុរស។ សាវ័កប៉ុលក៏បានពន្យល់ប្រាប់ពួកគេ អំពីអត្ថប្រយោជន៍ និងព្រះពរដែលកើតមាន ដល់អ្នកដែលបានឲ្យ ឬថ្វាយ ដោយចិត្តជ្រះថ្លា។ គាត់បានរំឭកពួកគេថា “អ្នកណាដែលព្រោះដោយកំណាញ់ នោះនឹងច្រូតបានតិច ហើយអ្នកណាដែលព្រោះដោយសទ្ធា នោះនឹងច្រូតបានច្រើនវិញ”(២កូរិនថូស ៩:៦)។ ដោយសារពួកគេបានជួយឧបត្ថម្ភ ដោយចិត្តសប្បុរស នោះពួកគេនឹង “ចម្រើនឡើងគ្រប់ជំពូក”(ខ១១) ហើយព្រះនាមរបស់ព្រះនឹងបានដំកើងឡើង។ ឱព្រះវរបិតា សូមព្រះអង្គជួយទូលបង្គំ ឲ្យធ្វើជាអ្នកឲ្យ ឬថ្វាយ ដោយអំណរ មិនគ្រាន់តែក្នុងរដូវកាលបុណ្យណូអែលប៉ុណ្ណោះ តែពេញមួយឆ្នាំ។ ទូលបង្គំសូមអរព្រះគុណ សម្រាប់ព្រះទ័យសប្បុរស ក្នុងការប្រទានព្រះរាជបុត្រាព្រះអង្គ ព្រះនាមយេស៊ូវ ធ្វើជាអំណោយ ដែលមិនអាចកាត់ថ្លៃបាន(ខ.១៥)។—Estera Pirosca Escobar តើអ្នកឃើញអ្នកដទៃមានតម្រូវការអ្វីខ្លះ ដែលអ្នកអាចជួយបាន នៅសប្តាហ៍នេះ? តើអ្នកអាចលះបង់ពេលវេលា ឬធនធាន ដោយរបៀបណាខ្លះ? ឱព្រះដ៏សប្បុរស ទូលបង្គំសូមអរព្រះគុណ សម្រាប់ការលើកទឹកចិត្តទូលបង្គំ ឲ្យមានចិត្តសប្បុរស ព្រោះអំពើសប្បុរសធម៌ នឹងនាំមកនូវព្រះពរបរិបូរ ដល់អ្នកឲ្យ និងអ្នកទទួល ។ Read more about God’s generosity at Go.ODB.org/313kwyT. គម្រោងអានព្រះគម្ពីររយៈពេល១ឆ្នាំ: ដានីយ៉ែល ៣-៤ និង ១យ៉ូហាន ៥