ជំនួយសម្រាប់ដៃដ៏ទន់ខ្សោយរបស់យើង
ដោយElisa Morgan
December 27, 2021
ដ្បិតអញនេះ គឺយេហូវ៉ាជាព្រះនៃឯង អញនឹងកាន់ដៃស្តាំឯង ដោយពោលនឹងឯងថា កុំឲ្យភ័យខ្លាចឡើយ អញនឹងជួយឯង។ អេសាយ ៤១:១៣ ខ្ញុំបានជួយឆ្កែចាស់ជរារបស់ខ្ញុំ ឈ្មោះវីលសិន(Wilson) ចេញទៅលេងនៅវាលស្មៅ ហើយទន្ទឹមនឹងនោះ ខ្ញុំក៏បានប្រលែងឆ្កែមួយក្បាលទៀត ដែលនៅក្មេងជាង ឈ្មោះ ខូច(Coach) តែមួយនាទី។ ពេលខ្ញុំឱនរើសខ្សែរបស់វា វាក៏បានឃើញសត្វទន្សាយ។ វាក៏បានស្ទុះរត់ពេញមួយទំហឹង ដោយកញ្ឆក់ខ្សែចេញពីដៃខាងស្តាំរបស់ខ្ញុំ ហើយក៏បានរមួលម្រាមដៃនាង ធ្វើឲ្យខ្ញុំដួលនៅលើស្មៅ ហើយស្រែកយំដោយការឈឺចាប់។ បន្ទាប់ពីខ្ញុំវិលត្រឡប់មកពីពិនិត្យសុខភាពបន្ទាន់ ហើយដឹងថា ខ្ញុំត្រូវការការវះកាត់ ខ្ញុំក៏បានទូលអង្វរដល់ព្រះ ដើម្បីសូមជំនួយ។ “ខ្ញុំជាអ្នកនិពន្ធ! តើខ្ញុំនឹងប្រើក្ដារចុចរបស់កុំព្យូទ័រ ដើម្បីវាយអក្សរដោយរបៀបណា? ចុះចំណែកឯតួនាទីដែលខ្ញុំត្រូវធ្វើប្រចាំថ្ងៃ? ព្រះទ្រង់ក៏បានមានបន្ទូលមកកាន់ខ្ញុំ នៅក្នុងការអានព្រះគម្ពីរប្រចាំថ្ងៃ។ គឺក្នុងបទគម្ពីរដែលចែងថា “ដ្បិតអញនេះ គឺយេហូវ៉ាជាព្រះនៃឯង អញនឹងកាន់ដៃស្តាំឯង ដោយពោលនឹងឯងថា កុំឲ្យភ័យខ្លាចឡើយ អញនឹងជួយឯង”(អេសាយ ៤១:១៣)។ ខ្ញុំបានពិនិត្យមើលបរិបទនៃខគម្ពីរនេះ ដែលបង្ហាញថា រាស្រ្តរបស់ព្រះក្នុងនគរយូដា ដែលបានទទួលការប្រកាសព្រះរាជសារ ពីហោរាអេសាយ បានអរសប្បាយនឹងទំនាក់ទំនងដ៏ពិសេស ជាមួយព្រះអង្គ។ ព្រះអង្គបានសន្យាថា នឹងនៅតែគង់ជាមួយ ប្រទានកម្លាំង និងជួយពួកគេ ដោយព្រះហស្តស្តាំដ៏សុចរិតរបស់ទ្រង់(ខ.១០)។ ក្នុងខគម្ពីរផ្សេងទៀត ព្រះទ្រង់បានប្រើព្រះហស្តស្តាំរបស់ទ្រង់ ដើម្បីប្រទានជ័យជម្នះដល់រាស្រ្តទ្រង់(ទំនុកដំកើង ១៧:៧ ៩៨:១)។ ក្នុងអំឡុងពេលប៉ុន្មានសប្តាហ៍ ដែលខ្ញុំកំពុងជាសះស្បើយឡើងវិញ ខ្ញុំបានទទួលការលើកទឹកចិត្តពីព្រះ ខណៈពេលដែលខ្ញុំរៀនប្រើកម្មវិធីសរសេរតាមអាន ក្នុងកុំព្យូទ័រ ហើយរៀនប្រើដៃឆ្វេង ធ្វើការងារក្នុងផ្ទះ និងសួនដំណាំ។ ពេលដែលដៃស្តាំខ្ញុំបាក់ ត្រូវការជំនួយ ព្រះទ្រង់បានសន្យាថា គង់នៅជាមួយ និងជួយខ្ញុំ ដោយព្រះហស្តស្តាំដ៏សុចរិតរបស់ទ្រង់។—Elisa Morgan តើអ្នកត្រូវការជំនួយមកពីព្រះ នៅត្រង់ផ្នែកណាខ្លះ ក្នុងជីវិតអ្នក? តើអ្នកបានទទួលជំនួយយ៉ាងណាខ្លះ ពីព្រះអង្គ កាលពីមុន? ឱព្រះដ៏ប្រោសឲ្យជា ទូលបង្គំត្រូវការជំនួយមកពីព្រះអង្គ! សូមព្រះអង្គប្រើព្រះហស្តស្តាំដ៏សុចរិតរបស់ព្រះអង្គ ដើម្បីជួយដៃដ៏ទន់ខ្សោយ និងហត់នឿយរបស់ទូលបង្គំផង។ គម្រោងអានព្រះគម្ពីររយៈពេល១ឆ្នាំ : សាការី ១-៤ និង វិវរណៈ ១៨