ចូរហាមដល់អើរ៉ុនបងឯង កុំឲ្យចូលជារាល់ពេលមកក្នុងទីបរិសុទ្ធខាងក្នុងវាំងនន នៅមុខទីសន្តោសប្រោសដែលនៅលើហិបនោះឡើយ។ លេវីវិន័យ ១៦:២
ក្នុងពេលដែលវីរុសកូរ៉ូណាកំពុងរាតត្បាត ការទៅធនាគារ ដើម្បីបើកយករបស់មានតម្លៃដែលខ្ញុំបានរក្សាទុក មានការតម្រូវកាន់តែច្រើនជាងមុន។ ខ្ញុំត្រូវធ្វើការណាត់ជួប ត្រូវទូរស័ព្ទទៅគេ មុនគេអនុញ្ញាតឲ្យខ្ញុំចូលធនាគារ រួចត្រូវបង្ហាញអត្តសញ្ញាណប័ណ្ណ ហើយចុះហត្ថលេខា បន្ទាប់មក ខ្ញុំត្រូវរង់ចាំឲ្យគេនាំផ្លូវខ្ញុំ ទៅទូរសុវត្ថិភាព ក្នុងបន្ទប់ក្រោមដី។ ពេលបានចូលខាងក្នុងហើយ ទ្វារដែកធ្ងន់ៗបានចាក់សោជាប់ពីខាងក្រៅ ទាល់តែខ្ញុំបានរកឃើញអ្វីដែលខ្ញុំត្រូវការ នៅក្នុងទូដែកនោះ។ បើខ្ញុំមិនធ្វើតាមការណែនាំរបស់គេទេ នោះខ្ញុំមិនអាចចូលខាងក្នុងបានឡើយ។
នៅគ្រាសញ្ញាចាស់ ព្រះទ្រង់បានប្រទានសេចក្តីបង្គាប់ជាក់លាក់ សម្រាប់ការចូលកន្លែងបរិសុទ្ធបំផុត ក្នុងរោងឧបោសថ(និក្ខមនំ ២៦:៣៣)។ នៅពីក្រោយវាំងននពិសេសមួយ ដែលខណ្ឌចែកកន្លែងបរិសុទ្ធ ចេញពីកន្លែងបរិសុទ្ធបំផុត មានតែសម្តេចសង្ឃទេ ដែលអាចចូលមួយឆ្នាំម្តង(ហេព្រើរ ៩:៧)។ លោកអើរ៉ុន និងសម្តេចសង្ឃ ដែលចូលតាមពីក្រោយគាត់ ត្រូវនាំយកដង្វាយ ត្រូវងូតទឹក ហើយត្រូវពាក់អាវខ្លូតទេសបរិសុទ្ធ មុននឹងចូលក្នុង(លេវីវិន័យ ១៦:៣-៤)។ ការណែនាំរបស់ព្រះ មិនមែន ដោយសារមូលហេតុសុខភាព ឬសុវត្ថិភាពនោះឡើយ តែគឺដើម្បីបង្រៀនពួកអ៊ីស្រាអែល អំពីសេចក្តីបរិសុទ្ធរបស់ព្រះ និងអំពីការដែលយើងត្រូវការការអត់ទោសបាបពីព្រះអង្គ។
នៅពេលព្រះយេស៊ូវសុគត វាំងននពិសេសនោះក៏បានរហែកជាពីរ(ម៉ាថាយ ២៧:៥១) ជានិមិត្តរូបបង្ហាញថា អស់អ្នកដែលជឿថា ព្រះអង្គបានលះបង់ព្រះជន្ម ដើម្បីអត់ទោសបាបឲ្យពួកគេ អាចចូលទៅក្នុងព្រះវត្តមានរបស់ព្រះ។ ការរហែកវាំងនននោះ គឺជាមូលហេតុដែលយើងអាចមានក្តីអំណរគ្មានទីបញ្ចប់ ដោយព្រះយេស៊ូវបានជួយឲ្យយើងអាចចូលទៅជិតព្រះ នៅពេលណាក៏បាន។—Kirsten Holmberg
តើធ្វើដូចម្តេច ឲ្យអ្នកអាចដឹងថា ព្រះទ្រង់កំពុងតែនាំអ្នកចូលទៅជិតព្រះអង្គ? តើសេចក្តីពិតនេះបាននាំឲ្យអ្នកមានក្តីអំណរយ៉ាងណាខ្លះ?
ឱព្រះយេស៊ូវ ទូលបង្គំសូមអរព្រះគុណ សម្រាប់ការបើកផ្លូវ ឲ្យទូលបង្គំចូលទៅជិតព្រះអង្គគ្រប់ពេល។
To learn how to draw nearer to God this year, visit ChristianUniversity.org/SF104.
គម្រោងអានព្រះគម្ពីររយៈពេល១ឆ្នាំ : លោកុប្បត្តិ ២០-២២ និង ម៉ាថាយ ៦:១៩-៣៤
