ព្រះទ្រង់តែងតែស្តាប់ឮយើងពីស្ថានសួគ៌
ដោយPatricia Raybon
January 12, 2022
សូមទ្រង់ប្រោសស្តាប់ពីលើស្ថានសួគ៌ ចំពោះពាក្យដែលគេអធិស្ឋាន ហើយទូលអង្វរ ព្រមទាំងសំរេចតាមសេចក្តីយុត្តិធម៌ឲ្យគេផង។ ១ពង្សាវតាក្សត្រ ៨:៤៥ ក្មេងតូចម៉ៃសិន(Maison) មានអាយុ១៨ខែ មិនដែលបានឮសម្លេងម្តាយរបស់គាត់សោះ។ គ្រូពេទ្យក៏បានយកឧបករណ៍ជំនួយការស្តាប់ ដាក់ក្នុងត្រចៀកគាត់ ហើយអ្នកស្រីឡូរីន(Lauryn) ដែលជាម្តាយរបស់គាត់ក៏បានសួរគាត់ថា “កូនស្តាប់ម៉ាក់ឮទេ?” ក្មេងតូចម្នាក់នេះក៏មានទឹកមុខរីករាយ។ អ្នកស្រីឡូរីនក៏បាននិយាយទៀតថា “សួស្តី កូនតូច!”។ ម៉ៃសិនក៏បានឆ្លើយតប ដោយទឹកមុខញញឹម និងបញ្ចេញសម្លេងអិអឹយ៉ាងស្រទន់។ អ្នកស្រីឡួរីនក៏បានស្រក់ទឹកភ្នែក ដោយដឹងថា នាងបានឃើញការអស្ចារ្យកើតឡើង។ ម៉ៃសិនបានកើតមិនគ្រប់ខែ ដោយសារកាលនាងមានទម្ងន់ ពួកចោរបានបាញ់នាងត្រូវបីគ្រាប់ ក្នុងអំឡុងពេលពួកវាប្លន់ផ្ទះរបស់នាង។ ម៉ៃសិនបានកើត ដោយមានទម្ងន់តែកន្លះគីឡូ ហើយត្រូវទទួលការចិញ្ចឹមក្នុងកែវរយៈពេល១៥៨ថ្ងៃ ដោយគេមិនសង្ឃឹមថា គាត់អាចរស់បានយូរនោះទេ។ រឿងដ៏កម្សាន្តចិត្តនេះ បានរំឭកខ្ញុំថា ព្រះទ្រង់តែងតែស្តាប់យើងអធិស្ឋានជានិច្ច។ ស្តេចសាឡូម៉ូនបានអធិស្ឋាន ដោយព្រះទ័យឆេះឆួល ទៅកាន់ព្រះកាណ៌ព្រះអម្ចាស់ ដែលកំពុងផ្ទៀងស្តាប់ ជាពិសេសក្នុងអំឡុងពេលដែលមានទុក្ខលំបាក។ ស្តេចសាឡូម៉ូនបានអធិស្ឋានថា “សូមទ្រង់ប្រោសស្តាប់ពីលើស្ថានសួគ៌ ចំពោះពាក្យដែលគេអធិស្ឋាន ហើយទូលអង្វរ ព្រមទាំងសំរេចតាមសេចក្តីយុត្តិធម៌ឲ្យគេផង”(១ពង្សាវតាក្សត្រ ៨:៤៥) នៅពេលដែល “គ្មានទឹកភ្លៀង”(ខ.៣៥) ក្នុងអំឡុងពេល “មានគ្រោះអត់ឃ្លាន ឬជំងឺរាតត្បាត”(ខ.៣៧) និងសង្គ្រាមជាដើម(ខ.៤៤)។ ព្រះទ្រង់ក៏បានឆ្លើយតប ក្នុងសេចក្តីល្អរបស់ទ្រង់ ដោយព្រះបន្ទូលសន្យាថា “នោះបើរាស្ត្រអញ ដែលបានហៅ តាមឈ្មោះអញ គេបន្ទាបខ្លួន ហើយអធិស្ឋានរកមុខអញ ព្រមទាំងងាកបែរចេញពីផ្លូវអាក្រក់របស់គេ នោះអញនឹងស្តាប់ពីលើស្ថានសួគ៌ ហើយនឹងអត់ទោសអំពើបាបរបស់គេ ទាំងមើលស្រុកគេឲ្យជាផង”(២របាក្សត្រ ៧:១៤)។ ស្ថានសួគ៌ហាក់ដូចជានៅឆ្ងាយណាស់ តែព្រះយេស៊ូវគង់នៅជាមួយអ្នកដែលជឿព្រះអង្គ។ ព្រះអង្គស្តាប់ឮ ហើយឆ្លើយតបការអធិស្ឋានរបស់យើង។—Patricia Raybon តើមានបញ្ហាអ្វីដែលអ្នកអាចអធិស្ឋាន នៅថ្ងៃនេះ ដោយជឿថា ព្រះទ្រង់នឹងឮអ្នកពីស្ថានសួគ៌? តើអ្នកចង់អរព្រះគុណព្រះអង្គ សម្រាប់ជំនួយអ្វីខ្លះ ដោយសារព្រះអង្គបានឮការទូលអង្វររបស់អ្នក? ឱព្រះវរបិតា ដែលគង់នៅស្ថានសួគ៌ ទូលបង្គំសូមអរព្រះគុណព្រះអង្គ សម្រាប់ការស្តាប់ឮសម្លេងទូលអង្វររបស់ទូលបង្គំ ក្នុងអំឡុងពេលដ៏ពិបាកបំផុត។ គម្រោងអានព្រះគម្ពីររយៈពេល១ឆ្នាំ : លោកុប្បត្តិ ២៩-៣០ និង ម៉ាថាយ ៩:១-១៧