បើកាលណាភាជនៈដែលគាត់កំពុងធ្វើពីដីឥដ្ឋបានខូចនៅដៃគាត់ នោះក៏ធ្វើឡើងជាភាជនៈផ្សេងទៀតវិញ តាមដែលគាត់យល់ឃើញថាគួរ។ យេរេមា ១៨:៤
កាលពីឆ្នាំ១៩៥២ ដើម្បីជៀសវាងការបែកបាក់ទំនិញផុយស្រួយ ដោយសារអ្នកទិញដែលគ្មានការប្រុងប្រយ័ត្ន ម្ចាស់ហាងទំនិញ នៅឆ្នេរម៉ៃអាមី ក៏បានបិទផ្លាក ដែលមានអក្សរសរសេរពីលើថា “លោកអ្នកត្រូវបង់ថ្លៃ សម្រាប់ទំនិញដែលលោកអ្នកបានធ្វើឲ្យបែកឬខូច”។ ពាក្យដែលងាយស្រួលយល់នេះ បានផ្តល់ឲ្យនូវការដាស់តឿន ដល់អ្នកមកទិញទំនិញទាំងឡាយ។ សព្វថ្ងៃនេះ គេអាចឃើញផ្លាកប្រភេទនេះ នៅតាមហាងលក់របស់ថ្លៃៗជាច្រើន នៅអាមេរិក។
អ្វីដែលគេមិននឹកស្មានដល់នោះគឺ គេអាចដាក់ផ្លាកផ្សេងមួយទៀត នៅក្នុងហាងរបស់ជាងស្មូន ដោយសរសេរអក្សរពីលើថា “បើលោកអ្នកធ្វើឲ្យវាបែក យើងខ្ញុំនឹងធ្វើឲ្យវាក្លាយជាវត្ថុដែលល្អជាងនេះទៀត”។ ហើយនេះជាអ្វីដែលបានបើកសម្តែងនៅក្នុងបទគម្ពីរ យេរេមា ជំពូក ១៨។
លោកយេរេមាបានទៅផ្ទះរបស់ជាងស្មូន ហើយក៏បានឃើញជាងស្មូនសូនឆ្នាំងដី ពីដីឥដ្ឋ ដោយផ្ទាល់ដៃ យ៉ាងប្រុងប្រយ័ត្ន(ខ.៤)។ លោកហោរាក៏បានរំឭកយើងថា ព្រះទ្រង់ពិតជាជាងស្មូនដ៏ជំនាញ ហើយយើងជាដីឥដ្ឋ។ ព្រះអង្គមានអំណាចគ្រប់គ្រងលើអ្វីៗទាំងអស់ ហើយអាចប្រើអ្វីដែលព្រះអង្គបានបង្កើត ដើម្បីបំផ្លាញការអាក្រក់ ក៏ដូចជាបង្កើតភាពស្រស់ស្អាត ក្នុងយើង។
ព្រះទ្រង់អាចកែឆ្នៃយើង ពេលណាយើងមានភាពប្រេះបែក ឬខូចសភាពដើម។ ព្រះអង្គជាជាងស្មូនដ៏ជំនាញបំផុត ដែលអាច និងស្ម័គ្រព្រះទ័យបង្កើតភាជនៈថ្មី ដ៏មានតម្លៃ ដោយប្រើបំណែករបស់យើងដែលបានប្រេះបែក។ យើងមានជីវិតដែលប្រេះបែក កំហុស និងអំពើបាបពីអតីតកាល តែព្រះអង្គមិនបានទតឃើញបញ្ហាទាំងនេះ ថាជាអ្វីដែលខុសប្រក្រតីនោះទេ។ ផ្ទុយទៅវិញ ព្រះអង្គរើសយកបំណែកនីមួយៗ មកផ្គុំបង្កើតជាវត្ថុថ្មីមួយ ឲ្យស្អាតបំផុត តាមបំណងព្រះទ័យទ្រង់។
សូម្បីតែនៅក្នុងភាពប្រេះបែករបស់យើង យើងមានតម្លៃដ៏លើសលប់ ចំពោះជាងស្មូន ដែលជាព្រះអម្ចាស់របស់យើង។ នៅក្នុងព្រះហស្តព្រះអង្គ បំណែកដែលបានបែក ក្នុងជីវិតយើង អាចមានរូបរាងថ្មី ជាភាជនៈដ៏ស្រស់ស្អាត ដែលព្រះអង្គអាចប្រើ(ខ.៤) តាមផែនការព្រះអង្គ។—Katara Patton
តើអ្នកមានការកម្សាន្តចិត្តយ៉ាងណា ពេលដែលបានដឹងថា ព្រះទ្រង់ជាជាងស្មូន ដែលអាចបង្កើតវត្ថុថ្មី ចេញពីសំណល់បាក់បែករបស់អ្នក? តើអ្នកអាចសម្រាកយ៉ាងណា ពេលដែលព្រះដ៏ជាជាងស្មូន ស្អាងអ្នកឡើងវិញ ឲ្យក្លាយជាភាជនៈដ៏ស្រស់ស្អាត?
ឱព្រះអម្ចាស់ ព្រះអង្គជាជាងស្មូន ហើយទូលបង្គំជាដីឥដ្ឋ។ សូមព្រះអង្គសូនទូលបង្គំតាមបំណងព្រះទ័យព្រះអង្គ។ សូមព្រះអង្គជួយទូលបង្គំឲ្យនឹកចាំថា ទូលបង្គំកំពុងតែស្ថិតក្នុងព្រះហស្តដ៏ប៉ិនប្រសប់ និងយកព្រះទ័យទុកដាក់។
គម្រោងអានព្រះគម្ពីររយៈពេល១ឆ្នាំ : និក្ខមនំ ៩-១១ និង ម៉ាថាយ ១៥:២១-៣៩
