មិនមែនតាមរយៈភាពសុខស្រួល
ដោយMarvin Williams
February 5, 2022
យើងនៅតែអួតក្នុងកាលដែលមានទុក្ខលំបាកដែរ ដោយដឹងថា សេចក្តីទុក្ខលំបាកបង្កើតឲ្យមានសេចក្តីទ្រាំទ្រ សេចក្តីទ្រាំទ្របង្កើតឲ្យមានសេចក្តីស៊ាំថ្នឹក សេចក្តីស៊ាំថ្នឹកបង្កើតឲ្យមានសេចក្តីសង្ឃឹម។ រ៉ូម ៥:៣-៤ ពេលដែលលោកឌែន(Dan)កំពុងបើកម៉ូតូតាមផ្លូវ មានឡានមួយគ្រឿងបានវ៉ាម៉ូតូគាត់ ចូលទៅក្នុងចំណែកផ្លូវរបស់គាត់ បណ្តាលឲ្យម៉ូតូគាត់ជួបគ្រោះថ្នាក់ចរាចរណ៍។ ពេលដែលគាត់ដឹងខ្លួន បន្ទាប់ពីសន្លប់អស់ពីរសប្តាហ៍នៅមជ្ឈមណ្ឌលព្យាបាលអ្នករបួស គាត់ស្ថិតក្នុងសភាពធ្ងន់ធ្ងរ។ ដែលអាក្រក់បំផុតនោះ គឺគាត់មានរបួសឆ្អឹងខ្នង ដែលបណ្តាលឲ្យគាត់ធ្លាក់ខ្លួនពិការ។ លោកឌែនបានអធិស្ឋានសូមការប្រោសឲ្យជា តែមិនទាន់ឃើញព្រះទ្រង់ឆ្លើយតប។ ផ្ទុយទៅវិញ គាត់ជឿថា ព្រះទ្រង់បានបង្រៀនគាត់ដោយក្តីអាណិតថា “គោលបំណងនៃជីវិតនេះ គឺដើម្បីផ្លាស់ប្រែឲ្យមានលក្ខណៈដូចព្រះគ្រីស្ទ។ គួរឲ្យស្តាយណាស់ ការផ្លាស់ប្រែនោះមិនកើតមាន ក្នុងពេលដែលយើងមានក្តីសុខនោះទេ…តែកើតឡើង នៅពេលដែលជីវិតមានការលំបាក។ គឺនៅពេលដែលយើងគ្មានជម្រើសអ្វីក្រៅពីត្រូវពឹងផ្អែកលើព្រះ ដោយការអធិស្ឋាន ដើម្បីឲ្យអាចឆ្លងផុតថ្ងៃនីមួយៗ”។ សាវ័កប៉ុលបានពន្យល់ អំពីអត្ថប្រយោជន៍ពីរយ៉ាង នៃការមានភាពសុចរិតនោះចំពោះព្រះ ដែលមានដូចជា ការស៊ូទ្រាំ និងការអរសប្បាយ ក្នុងទុក្ខលំបាក(រ៉ូម ៥:៣-៤)។ អត្ថប្រយោជន៍ទាំងពីរនេះ គឺមិនមែនជាការត្រាស់ហៅឲ្យមានការអត់ធ្មត់ ដោយគ្មានការត្អូញត្អែរ ឬស្វែងរកការសប្បាយក្នុងការឈឺចាប់នោះទេ។ វាជាការអញ្ជើញឲ្យទុកចិត្តព្រះ ដោយគ្មានការរង្គោះរង្គើ។ ការរងទុក្ខ ដោយពឹងអាងព្រះគ្រីស្ទ នាំឲ្យយើងមាន “សេចក្តីទ្រាំទ្រ សេចក្តីស៊ាំថ្នឹក និងសេចក្តីសង្ឃឹម”(ខ.៣-៤)។ សេចក្តីទាំងនេះសុទ្ធតែកើតចេញពីការមានជំនឿថា ព្រះវរបិតានឹងមិនបោះបង់យើងចោល តែនៅតែដើរជាមួយយើង កាត់ភ្លើង ចូលទៅក្នុងពេលអនាគត។ ព្រះទ្រង់ជួយយើង ក្នុងទុក្ខលំបាករបស់យើង ហើយជួយយើងឲ្យលូតលាស់ក្នុងព្រះអង្គ។ ចូរយើងកុំគិតថា ទុក្ខលំបាកបានកើតឡើង ដោយសារព្រះអង្គមិនសព្វព្រះទ័យនឹងយើងនោះឡើយ ផ្ទុយទៅវិញ ចូរយើងស្វែងយល់អំពីរបៀបដែលព្រះទ្រង់កំពុងប្រើទុក្ខលំបាកទាំងនោះ ដើម្បីសំលៀង និងបង្កើតចារិកលក្ខណៈរបស់យើង ខណៈពេលដែលយើងពិសោធន៍នឹងសេចក្តីស្រឡាញ់របស់ព្រះអង្គ ដែលបាន “បង្ហូរចូលក្នុងចិត្តយើង”(ខ.៥)។—Marvin Williams តើអ្នកត្រូវមានការផ្លាស់ប្តូរយ៉ាងណាខ្លះ ក្នុងចិត្ត និងគំនិតរបស់អ្នក ដើម្បីឲ្យអ្នកអាចស៊ូទ្រាំនឹងទុក្ខលំបាក ដោយពឹងអាងកម្លាំងព្រះយេស៊ូវ? តើអ្នកអាចស៊ូទ្រាំ និងអរសប្បាយ ក្នុងបញ្ហាប្រឈម ដោយរបៀបណា ក្នុងសប្តាហ៍នេះ? ឱព្រះយេស៊ូវ សូមព្រះអង្គប្រទានពរឲ្យទូលបង្គំ មានក្តីសង្ឃឹម និងក្តីអំណរ ក្នុងព្រះអង្គ ខណៈពេលដែលព្រះអង្គប្រទានអ្វីដែលទូលបង្គំត្រូវការ ដើម្បីស៊ូទ្រាំ ក្នុងជីវិតនេះ។ Learn more about comforting others who are suffering at DiscoverySeries.org/Q0729. គម្រោងអានព្រះគម្ពីររយៈពេល១ឆ្នាំ: និក្ខមនំ ៣៦-៣៨ និង ម៉ាថាយ ២៣:១-២២