ខណៈនោះអ័ដូនីយ៉ា ជាបុត្រនៃនាងហាគីត ក៏លើកខ្លួនឡើង ដោយពាក្យថា យើងនឹងធ្វើជាស្តេច។ ១ពង្សាវត្សត្រ ១:៥
លោកអើរ៉ុន ប័រ(Aaron Burr) បានទន្ទឹងរង់ចាំ ដោយចិត្តថប់បារម្ភ នូវលទ្ធផលនៃការបោះឆ្នោតរបស់សមាជិករដ្ឋសភាអាមេរិក ជ្រើសរើសប្រធានាធិបតី។ ដោយមានការជាប់គាំង ជាមួយនឹងលោកថូម៉ាស ចេហ្វ័រសិន(Thomas Jefferson) ក្នុងទសវត្សរ៍ឆ្នាំ១៨០០ ក្នុងការបោះឆ្នោតជ្រើសរើសប្រធានាធិបតី លោកប័រមានហេតុផល ដែលត្រូវជឿថា រដ្ឋសភានឹងប្រកាសថា គាត់ជាអ្នកឈ្នះ។ ទោះជាយ៉ាងណាក៏ដោយ គាត់ក៏បានចាញ់ ហើយភាពល្វីងជូរចត់ក៏បានស៊ីបំផ្លាញព្រលឹងគាត់។ គាត់ក៏បានចិញ្ចឹមចិត្តគុំគួនមកលើលោកអ័ឡេក្សានឌ័រ ហាមីលតុន(Alexander Hamilton) ដែលមិនបានបោះឆ្នោតឲ្យគាត់។ ៤ឆ្នាំក្រោយមក ទីបំផុតលោកប័រក៏បានបាញ់សម្លាប់លោកហាមីលតុន ក្នុងការប្រកួតបាញ់គ្នា ។ ប្រទេសជាតិរបស់គាត់មានការខឹងសម្បានឹងគាត់ ដោយសារការសម្លាប់នេះ ហើយក៏បានបោះបង់ចោលគាត់ ដោយទុក្ខឲ្យគាត់ស្លាប់ក្នុងវ័យចាស់ជរាដ៏ជូរចត់។
ការលេងល្បែងនយោបាយ ជាផ្នែកដ៏សោកសៅនៃប្រវត្តិសាស្រ្ត។ ពេលដែលស្តេចដាវីឌជិតដល់ពេលអស់ព្រះជន្ម បុត្រាទ្រង់ព្រះនាមអ័ដូនីយ៉ា បានជ្រើសមេទ័ពរបស់ស្តេចដាវីឌឲ្យបម្រើខ្លួន ហើយក៏បាននាំពួកសង្ឃឲ្យតែងតាំងខ្លួនជាស្តេច(១ពង្សាវតាក្សត្រ ១:៥-៨)។ ប៉ុន្តែ ស្តេចដាវីឌបានជ្រើសរើសព្រះអង្គម្ចាស់សាឡូម៉ូន ឲ្យស្នងរាជ្យហើយ(ខ.១៧)។ ដោយមានជំនួយពីហោរ៉ាណាថាន ទ្រង់អាចទប់ស្កាត់ការបះបោរនេះ ដោយជោគជ័យ(ខ.១១-៥៣)។ ទោះព្រះអង្គម្ចាស់អ័ដូនីយ៉ាបានទទួលការលើកលែងទោសហើយក៏ដោយ ទ្រង់នៅតែរៀបគម្រោងដណ្តើមរាជ ជាលើកទី២ ហើយស្តេចសាឡូម៉ូនក៏បានឲ្យគេប្រហារជីវិតទ្រង់(២:១៣-២៥)។
មនុស្សយើងច្រើនតែចង់បានអ្វីៗ ដែលយើងគ្មានសិទ្ធិកាន់កាប់ ។ ទោះយើងមានការខិតខំខ្លាំងយ៉ាងណា ក្នុងការដេញតាមអំណាច ឥទ្ធិពល ឬទ្រព្យសម្បត្តិ យើងនៅតែមិនចេះឆ្អែតឆ្អន់។ យើងតែងតែចង់បានបន្ថែមទៀត។ យើងខុសពីព្រះយេស៊ូវ ដែល “បន្ទាបព្រះអង្គទ្រង់ ទាំងចុះចូលស្តាប់បង្គាប់ រហូតដល់ទីមរណៈ គឺទ្រង់ទទួលសុគតជាប់ឈើឆ្កាងផង”(ភីលីព ២:៨)។
ការព្យាយាមសម្រេចមហិច្ឆតា ដោយចិត្តអាត្មានិយម មិនដែលនាំឲ្យយើងមានចិត្តស្កប់ស្កល់ពិតប្រាកដ និងជ្រាលជ្រៅបំផុតនោះឡើយ។ ការថ្វាយលទ្ធផលដល់ព្រះ គឺជាផ្លូវតែមួយឆ្ពោះទៅរកសន្តិភាព និងក្តីអំណរ។—Tim Gustafson
តើបំណងចិត្ត និងគោលដៅរបស់អ្នក បានបង្ហាញថា ចិត្តអ្នកមានលក្ខណៈដូចម្តេចខ្លះ? តើមានអ្វីខ្លះដែលអ្នកចាំបាច់ត្រូវថ្វាយដល់ព្រះ នៅថ្ងៃនេះ?
ឱព្រះអម្ចាស់ សូមព្រះអង្គជួយទូលបង្គំ ឲ្យបំពេញតួនាទីដែលព្រះអង្គបានប្រទានទូលបង្គំ ហើយមិនមានចិត្តលោភចង់បានថែមទៀតនោះឡើយ។ សូមព្រះអង្គជួយទូលបង្គំឲ្យទុកចិត្តព្រះអង្គ ក្នុងគ្រប់ការទាំងអស់។
គម្រោងអានព្រះគម្ពីររយៈពេល១ឆ្នាំ: លេវីវិន័យ ១-៣ និង ម៉ាថាយ ២៤:១-២៨
