ទឹកជាច្រើនយ៉ាងណាក៏មិនអាចនឹងពន្លត់សេចក្តីស្រឡាញ់បានឡើយ។ បទចម្រៀងសាឡូម៉ូន ៨:៧
មានចាស់ទុំពីរនាក់ មានអាយុប្រហែល៨០ឆ្នាំ ម្នាក់រស់នៅក្នុងប្រទេសអាឡឺម៉ង់ ម្នាក់ទៀត នៅប្រទេសដាណឺម៉ាក។ មើលទៅអ្នកទាំងពីរ មិនទំនងអាចធ្វើជាគូរស្នេហ៍ឡើយ។ ពួកគេមានប្តីប្រពន្ធរៀងៗខ្លួន ដោយមានជីវិតដ៏រីករាយ អស់រយៈពេល៦០ឆ្នាំ មុនពេលពួកគេក្លាយជាស្រ្តីមេម៉ាយ និងបុរសពោះម៉ាយ។ ទីលំនៅរបស់ពួកគេស្ថិតនៅចម្ងាយពីគ្នា ដោយធ្វើដំណើរតែ១៥នាទីប៉ុណ្ណោះ តែផ្ទះរបស់ពួកគេស្ថិតនៅប្រទេសពីរផ្សេងគ្នា។ ពួកគេនៅតែធ្លាក់ក្នុងអន្លង់ស្នេហ៍ ដោយចំអិនអាហារ និងចំណាយពេលជាមួយគ្នាជាទៀតទាត់។ គួរឲ្យស្តាយណាស់ នៅឆ្នាំ២០២០ ដោយសារតែការរាលដាលនៃវីរូសកូរ៉ូណា រដ្ឋាភិបាលដាណឺម៉ាកក៏បានបិទច្រកព្រំដែន។ តែពួកគេនៅតែបន្តជួបគ្នា ជារៀងរាល់ថ្ងៃ នៅម៉ោង៣រសៀល នៅព្រំដែន នៅលើផ្លូវជាតិដ៏ស្ងប់ស្ងាត់មួយ ដោយអង្គុយញាំអាហារជាមួយគ្នា នៅម្ខាងព្រំដែនម្នាក់។ បុរសនោះក៏បានពន្យល់ថា “យើងមកទីនេះ ដោយសារយើងស្រឡាញ់គ្នា”។ ក្តីស្រឡាញ់របស់ពួកគេខ្លាំងជាងព្រំដែន និងមានអំណាចខ្លាំងជាងជំងឺរាតត្បាត។
កណ្ឌគម្ពីរបទចម្រៀងសាឡូម៉ូនបានធ្វើការបកស្រាយដ៏គួរឲ្យស្ញប់ស្ញែង អំពីអំណាចដ៏អស្ចារ្យនៃសេចក្តីស្រឡាញ់។ ក្នុងនោះ ស្តេចសាឡូម៉ូនបានមានប្រសាសន៍ថា “ដ្បិតសេចក្តីស្រឡាញ់មានកំឡាំង ដូចជាសេចក្តីស្លាប់”(៨:៦)។ យើងមិនអាចជៀសវាងសេចក្តីស្លាប់បានឡើយ។ វានឹងមកដល់ ដោយការបញ្ចប់ដាច់ខាតដែលយើងមិនអាចរារាំងបាន។ ប៉ុន្តែ សេចក្តីស្រឡាញ់មានកម្លាំងខ្លាំងដូចសេចក្តីស្លាប់។ ជាងនេះទៅទៀត “ជំហួលនៃសេចក្តីស្រឡាញ់ក៏ជាជំហួលនៃភ្លើង ជាអណ្តាតភ្លើងយ៉ាងសហ័សដែលមកព្រះ(ខ.៦)។ តើអ្នកធ្លាប់ឃើញភ្លើងឆាបឆេះទេ? សេចក្តីស្រឡាញ់គឺមិនខុសពីភ្លើង ដែលមិនអាចពន្លត់បាន។ “ទឹកជាច្រើនយ៉ាងណាក៏មិនអាចនឹងពន្លត់សេចក្តីស្រឡាញ់បានឡើយ” ហើយទឹកជំនន់នឹងពន្លិចក៏មិនបានដែរ(ខ.៧)។
សេចក្តីស្រឡាញ់ដែលពិត គ្មានភាពអាត្មានិយម គឺបានឆ្លុះបញ្ចាំងអំពីលក្ខណៈទាំងនេះ។ ទោះជាយ៉ាងណាក៏ដោយ មានតែសេចក្តីស្រឡាញ់របស់ព្រះទេ ដែលមានអំណាច មានភាពជ្រាលជ្រៅ និងមានឥទ្ធិពលខ្លាំងដូចនេះ។ សេចក្តីស្រឡាញ់ដែលព្រះអង្គមានចំពោះយើង ជាសេចក្តីស្រឡាញ់ដែលគ្មានអ្វីអាចពន្លត់បាន។—Winn Collier
តើសេចក្តីស្រឡាញ់របស់អ្នក បានឆ្លុះបញ្ចាំង អំពីសេចក្តីស្រឡាញ់ របស់ព្រះយ៉ាងដូចម្តេចខ្លះ? តើធ្វើដូចម្តេចឲ្យអ្នកអាចដឹងថា ព្រះទ្រង់ស្រឡាញ់អ្នក?
ឱព្រះអម្ចាស់ ទូលបង្គំត្រូវការសេចក្តីស្រឡាញ់ដ៏មានអំណាច និងជ្រាលជ្រៅរបស់ព្រះអង្គ។ ទូលបង្គំត្រូវការសេចក្តីស្រឡាញ់របស់ព្រះអង្គ ដែលគ្មានអ្វីអាចពន្លត់បាន ហើយមិនបោះបង់ចោលទូលបង្គំឡើយ។
គម្រោងអានព្រះគម្ពីររយៈពេល១ឆ្នាំ: លេវីវិន័យ ១៥-១៦ និង ម៉ាថាយ ២៧:១-២៦
Leave A Comment