ចូរត្រាប់តាមខ្ញុំ ដូចជាខ្ញុំបានត្រាប់តាមព្រះគ្រីស្ទដែរ។ ១កូរិនថូស ១១:១
ពួកគេមិនបានប្រើពាក្យសម្តី ក្នុងការទំនាក់ទំនង តែប្រើតែតន្រ្តី និងកាយវិការប៉ុណ្ណោះ។ ក្នុងអំឡុងពេលនៃកម្មវិធីរាំចង្វាក់ហ្ស៊ូមបា ដែលមានរយៈពេល២៤ម៉ោង ក្នុងអំឡុងពេលដែលជំងឺកូវីត១៩កំពុងរាតត្បាតពិភពលោក មនុស្សរាប់ពាន់នាក់ នៅតាមតំបន់ផ្សេងគ្នា នៅលើពិភពលោក បានហាត់ប្រាណជាមួយគ្នា តាមអនឡាញ ដោយរៀនរាំតាមគ្រូបង្វឹកនៅប្រទេសឥណ្ឌា ចិន មិចស៊ីកូ អាមេរិក អាហ្វ្រិកខាងត្បូង ផ្នែកខ្លះនៃប្រទេសអឺរ៉ុប និងប្រទេសជាច្រើនទៀត។ មនុស្សចម្រុះសាសន៍ទាំងនោះអាចធ្វើកាយវិការរាំជាមួយគ្នា ដោយគ្មានរនាំងនៃភាសា។ តើហេតុអ្វី? ចង្វាក់ហ្ស៊ូមបា ត្រូវបានគ្រូបង្វឹកកូឡំប៊ីបង្កើតឡើង នៅពាក់កណ្តាលទសវត្សរ៍ឆ្នាំ១៩៩០។ ព្រោះគ្រូបង្រៀនហាត់ប្រាណ តាមចង្វាក់នេះ បានប្រើកាយវិការ ដើម្បីទំនាក់ទំនង។ គ្រូបង្វឹកធ្វើចលនា សិស្សក៏បានធ្វើតាម។ ពួកគេធ្វើតាម ដោយគ្មានពាក្យនិយាយ ឬសម្លេងស្រែកសោះឡើយ។
ជួនកាល ពាក្យសម្តីអាចក្លាយជារនាំង និងនាំឲ្យមានបញ្ហាផ្សេងៗ។ ពាក្យសម្តីអាចបណ្តាលឲ្យមានការភ័ន្តច្រឡំ គឺដូចដែលពួកជំនុំនៅទីក្រុងកូរិនថូសបានជួបប្រទះ ហើយសាវ័កប៉ុលបានកត់សំគាល់រឿងនេះ នៅក្នុងកណ្ឌគម្ពីរសំបុត្រទី១ ដែលគាត់បានសរសេរផ្ញើទៅពួកគេ។ វាជាការភ័ន្តច្រឡំ ដែលកើតឡើងពីការប្រកែកគ្នា អំពីប្រភេទនៃអាហារដែលពួកគេបរិភោគ(១កូរិនថូស ១០:២៧-៣០)។ ប៉ុន្តែ ការប្រព្រឹត្តរបស់យើងអាចឆ្លងកាត់រនាំងទាំងឡាយ ហើយសូម្បីតែការភ័ន្តច្រឡំក៏ដោយ។ គឺដូចដែលសាវ័កប៉ុលបានមានប្រសាសន៍នៅក្នុងបទគម្ពីរសម្រាប់ថ្ងៃនេះ យើងគួរតែបង្ហាញអ្នកដទៃ អំពីរបៀបដើរតាមព្រះយេស៊ូវ តាមរយៈការប្រព្រឹត្តរបស់យើង ដោយគិត “ប្រយោជន៍មនុស្សជាច្រើន”(១០:៣២-៣៣)។ ការដែលយើង“ដើរតាមគំរូព្រះគ្រីស្ទ” ក៏ជាការអញ្ជើញលោកិយឲ្យជឿព្រះអង្គផងដែរ(១១:១)។
គឺដូចមានមតិមួយបានពោលថា “យើងត្រូវផ្សាយដំណឹងល្អគ្រប់ពេលវេលា ដោយការប្រព្រឹត្តរបស់យើង ហើយត្រូវប្រើពាក្យសម្តី នៅពេលដែលចំាបាច់”។ ខណៈពេលដែលយើងដើរតាមការដឹកនាំរបស់ព្រះយេស៊ូវ សូមព្រះអង្គដឹកនាំសកម្មភាពរបស់យើង ជាសញ្ញាបង្ហាញអ្នកដទៃ ឲ្យស្គាល់សេចក្តីជំនឿរបស់យើង។ ហើយសូមឲ្យពាក្យសម្តី និងការប្រព្រឹត្តរបស់យើង បានធ្វើឡើង “សុទ្ធតែដើម្បីថ្វាយសិរីល្អដល់ព្រះ”(១០:៣១)។—Katara Patton
តើអ្នកកំពុងបង្ហាញអ្នកដទៃ ឲ្យស្គាល់ព្រះយេស៊ូវ តាមរយៈការប្រព្រឹត្តអ្វីខ្លះ? តើធ្វើដូចម្តេចឲ្យអ្នកដទៃ អាចមើលឃើញព្រះគ្រីស្ទ នៅក្នុងពាក្យសម្តី និងការប្រព្រឹត្តរបស់អ្នក?
ឱព្រះវរបិតា ទូលបង្គំសូមអរព្រះគុណ សម្រាប់ការប្រទានគំរូ ឲ្យទូលបង្គំប្រព្រឹត្តតាមព្រះយេស៊ូវ ។ សូមព្រះអង្គបង្ហាញទូលបង្គំ នូវរបៀបដើរតាមព្រះអង្គ ក្នុងការប្រព្រឹត្ត និងពាក្យសម្តីជារៀងរាល់ថ្ងៃ។
Father God, thank You for the example of Jesus. Show me how to follow Him in actions and in words every day.
គម្រោងអានព្រះគម្ពីររយៈពេល១ឆ្នាំ: ជនគណនា ៩-១១ និង ម៉ាកុស ៥:១-២០
