ដូច្នេះ អ្នក​រាល់​គ្នា​មិន​មែន​ជា​អ្នក​ដទៃ ឬ​ជា​អ្នក​គ្រាន់​តែ​សំណាក់​នៅ​ទៀត​ទេ គឺ​ជា​ជាតិ​តែ​១​នឹង​ពួក​បរិសុទ្ធ ជា​ពួក​ដំណាក់​ព្រះ​វិញ។ អេភេសូរ ២:១៩

​ដោនថុន អាប៊ី(Downton Abbey)  គឺ​ជា​រឿង​ភាគ​អង់គ្លេស បែប​ប្រឌិត​ដ៏​ពេញ​និយម ដែល​គេ​បាន​ចាក់​បញ្ចាំង​នៅ​ក្នុង​កម្ម​វិធី​ទូរទស្សន៍។ រឿង​នេះ​និយាយ​អំពី​ក្រុម​គ្រួសារ​ត្រកូល​ក្រលេយ(Crawley) ដែល​បាន​រស់​នៅ​ដោយ​ឆ្លង​កាត់​រចនា​សម្ព័ន្ធ​សង្គម​ដែល​កំពុង​មាន​ការ​ផ្លាស់​ប្តូរ នៅ​ដើម​ទសវត្សរ៍​ឆ្នាំ​១៩០០ នៅ​ប្រទេស​អង់​គ្លេស។ ពី​ដំបូង លោកថម ប្រ៊ែនសិន(Tom Branson) ដែល​ជា​តួអង្គ​ដ៏​សំខាន់ បាន​ធ្វើ​ការ​ជា​អ្នក​បើក​ឡាន ឲ្យ​គ្រួសារ​នេះ ហើយ​ក៏​បាន​ធ្វើ​ឲ្យ​គេ​រាល់​គ្នា​មាន​ការ​ភ្ញាក់​ផ្អើល ពេល​ដែល​គាត់​បាន​រៀបការ​ជា​មួយ​កូន​ស្រី​ពៅ​របស់​គ្រួសារ​នេះ។ បន្ទាប់​ពី​គូរ​ស្នេហ៍​វ័យ​ក្មេង​មួយ​គូរ​នេះ​ត្រូវ​គេ​និរទេស​មួយ​រយៈ ពួក​គេ​ក៏​បាន​វិល​ត្រឡប់​មក​តំបន់​ដោនថុន អាប៊ីវិញ ហើយ​លោក​ថម ក៏​បាន​ក្លាយ​ជា​ផ្នែក​មួយ​នៃ​គ្រួសារ​នេះ ដោយ​បាន​ទទួល​សិទ្ធិ និង​ឯក​សិទ្ធិ ដែល​កាល​ពី​មុន គេ​​​មិន​ព្រម​ផ្តល់​ឲ្យ​គាត់ ដោយសារ​គាត់​ជា​អ្នកបើកឡាន។

កាល​ពី​មុន យើង​ជា “អ្នក​ដទៃ និង​អ្នក​មក​សំណាក់​នៅ”(អេភេសូរ ២:១៩) ហើយ​មិន​មាន​សិទ្ធិ ដូច​អ្នក​ដែល​ជា​ផ្នែក​មួយ​នៃ​គ្រួសារ​ព្រះ​ឡើយ។ តែ​ដោយសារ​ព្រះ​យេស៊ូវ នោះ​អ្នក​ជឿ​ព្រះ​អង្គ​ទាំង​អស់ ទោះ​មាន​ប្រវត្តិ​ដូច​ម្តេច​ក៏​ដោយ នឹង​បាន​ទទួល​ការ​ផ្សះផ្សា​ឲ្យ​ជា​​នឹង​ព្រះ ហើយ​ត្រូវ​បាន​ហៅ​ថា “សមាជិក​នៃ​មហា​គ្រួសារ​នៃ​ព្រះ​វិញ”(ខ.១៩)។

ក្នុង​នាម​យើង​ជា​សមាជិក​នៃ​មហា​គ្រួសារ​របស់​ព្រះ យើង​មាន​សិទ្ធិ និង​ឯកសិទ្ធិ​ដ៏​អស្ចារ្យ។ យើង​អាច​ចូល​ទៅ​ជិត​ព្រះ​អង្គ ដោយ​សេរី និង​ដោយ​ទំនុក​ចិត្ត (៣:១២) ហើយ​អរ​សប្បាយ​នឹង​សិទ្ធិ​ចូល​ទៅ​រក​ព្រះ​អង្គ ដោយ​គ្មាន​ដែន​កំណត់ និង​គ្មាន​រនាំង។ យើង​ក្លាយ​ជា​ផ្នែក​មួយ នៃ​មហា​គ្រួសារ និង​សហគមន៍​នៃ​ជំនឿ ដែល​គាំ​ទ្រ និង​លើក​ទឹក​ចិត្ត​យើង(២:១៩-២២)។ សមាជិក​គ្រួសារ​នៃ​ព្រះ​មាន​ឯកសិទ្ធិ​ជួយ​គ្នា​ទៅ​វិញ​ទៅ​មក ឲ្យ​ទទួល​សេចក្តី​ស្រឡាញ់​ដ៏​ហូរហៀរ​របស់​ព្រះ​(៣:១៨)។

ការ​ភ័យ​ខ្លាច ឬ​ការ​សង្ស័យ ងាយ​នឹង​ធ្វើ​ឲ្យ​យើង​មាន​អារម្មណ៍​ថា យើង​ជា​អ្នក​ក្រៅ ដោយ​រារាំង​យើង មិន​ឲ្យ​ចូល​ទៅ​ទទួល​ផល​ប្រយោជន៍​នៃ​ការ​រស់​នៅ​ជា​ផ្នែក​មួយ​នៃ​គ្រួសារ​របស់​ព្រះ។ ប៉ុន្តែ ចូរ​យើង​ស្តាប់ និង​ឱប​ក្រសោប​យក​ភាព​ពិត​នៃ​អំណោយ​នៃ​ក្តី​ស្រឡាញ់​របស់​ព្រះ ដោយ​ឥត​គិត​ថ្លៃ​(២:៨-១០) ហើយ​អរ​សប្បាយ ដោយ​ដឹង​ថា​យើង​ជា​កូន​ព្រះ​អង្គ។—Lisa M. Samra

តើ​មាន​អត្ថ​ប្រយោជន៍​អ្វី​ខ្លះ​ទៀត ដែល​យើង​ទទួល​បាន ពី​ការ​រស់​នៅ​ជា​សមាជិក​នៃ​មហា​គ្រួសារ​របស់​ព្រះ? ​តើ​អ្នក​អាច​ចូល​មក​ជិត​ព្រះ​យ៉ាង​ដូច​ម្តេច​ខ្លះ នៅ​ថ្ងៃ​នេះ ដោយ​ទំនុក​ចិត្ត ដោយ​ដឹង​ថា អ្នក​ជា​កូន​ព្រះ​អង្គ?

ឱ​ព្រះ​វរបិតា ដែល​គង់​នៅ​ស្ថាន​សួគ៌ ទូល​បង្គំ​សូម​អរ​ព្រះគុណ សម្រាប់​ការ​ស្វាគមន៍​ទូល​បង្គំ ចូល​ទៅ​ក្នុង​មហា​គ្រួសារ​ព្រះអង្គ ហើយ​ប្រទាន​ទូល​បង្គំ​នូវ​សិទ្ធិ និង​ឯក​សិទ្ធិ ដែល​បាន​មក​ពី​ការ​រស់​នៅ​ជា​កូន​ព្រះ។

គម្រោងអានព្រះគម្ពីររយៈពេល១ឆ្នាំ: ជនគណនា ១៥-១៦ និង ម៉ាកុស ៦:១-២៩