ក្តីអំណរដែលបានមកពីដំណឹងល្អ
ដោយWinn Collier
February 27, 2022
ព្រះយេហូវ៉ាទ្រង់បានចាក់ប្រេងតាំងខ្ញុំឲ្យផ្សាយដំណឹងល្អដល់មនុស្សទាល់ក្រ។ អេសាយ ៦១:១ កាលពីពេលល្ងាច ឆ្នាំ១៩៦៤ គ្រោះរញ្ជួយដីដ៏ធំមួយបានកើតឡើងនៅរដ្ឋអាឡាស្កា ដែលនាំឲ្យមានការកក្រើក រង្គើរមានរយៈពេលជាង៤នាទី ដោយកម្លាំងរញ្ជួយ ៩.២ រិចទ័រ។ នៅតំបន់អ៊ែងខូរេក បណ្ដុំអគារទាំងមូលបានដួលរលំរាបដល់ដី ដោយបន្សល់ទុកតែស្នាមក្រហូងដី និងកម្ទេចអគារបាក់បែក។ នៅពេលយប់ដ៏ងងឹត និងតក់ស្លត់ អ្នកស្រីជេនី ឈែន(Genie Chance) ដែលជាអ្នកយកព័ត៌មាន បានឈរកាន់ក្បាលមីក្រូហ្វូន ផ្សាយព័ត៌មានទៅកាន់មនុស្សជាច្រើនកំពុងអន្ទះសារចាំស្តាប់ព័ត៌មាន តាមវិទ្យុដែលមានដូចជា បុរសជាប្តីម្នាក់ដែលកំពុងធ្វើការក្នុងព្រៃ បានទទួលដំណឹងថា ភរិយាខ្លួននៅមានជីវិត ក្រុមគ្រួសារដែលកំពុងមានការព្រួយបារម្ភ បានទទួលដំណឹងថា កូនប្រុសរបស់ពួកគេសុខសប្បាយ នៅកន្លែងបោះជំរុំ របស់ក្រុមកាយរឹទ្ធិ ប្តីប្រពន្ធមួយគូរបានទទួលដំណឹងថា គេបានរកឃើញកូនៗរបស់ពួកគាត់ហើយ។ វិទ្យុក៏បានបន្តផ្សព្វផ្សាយអំពីដំណឹងល្អដូចនេះទៀត ដោយនំាមកនូវក្តីអំណរ ក្នុងពេលដែលមានវិនាសកម្ម។ ពួកអ៊ីស្រាអែលប្រាកដជាមានអារម្មណ៍ដូចនេះផងដែរ ពេលដែលពួកគេបានឮហោរាអេសាយថ្លែងថា “ព្រះយេហូវ៉ាទ្រង់បានចាក់ប្រេងតាំងខ្ញុំឲ្យផ្សាយដំណឹងល្អដល់មនុស្សទាល់ក្រ”(អេសាយ ៦១:១)។ ខណៈពេលដែលពួកគេមើលទៅជីវិតប្រេះបែក និងក្រៀមក្រោះរបស់ពួកគេ និងមើលទៅពេលអនាគតដ៏គួរឲ្យថប់បារម្ភ សម្លេងដែលឮច្បាស់ របស់ហោរាអេសាយ បាននាំមកនូវដំណឹងល្អ ចំពេលនោះ នៅពេលដែលអ្វីៗហាក់ដូចជាបានបាត់បង់។ ព្រះទ្រង់សព្វព្រះទ័យនឹង “ប្រោសមនុស្សដែលមានចិត្តសង្រេង និងប្រកាសប្រាប់ពីសេចក្តីប្រោសលោះដល់ពួកឈ្លើយ …នឹងសង់អស់ទាំងទី ដែលខូចបង់ពីដើមឡើងវិញ ហើយរៀបកន្លែងចោលស្ងាត់ពីកាលមុនឡើងជាថ្មី”(ខ.១,៤)។ ក្នុងពេលដែលមានពេញដោយការភ័យខ្លាច ពួកបណ្តាជនក៏បានឮព្រះបន្ទូលសន្យារបស់ព្រះ ដែលបានផ្តល់ការធានា និងជាដំណឹងល្អរបស់ព្រះអង្គ។ សព្វថ្ងៃនេះ យើងបានឮដំណឹងល្អរបស់ព្រះ នៅក្នុងព្រះយេស៊ូវ ហើយក៏បាននាំឲ្យយើងយល់អត្ថន័យរបស់ដំណឹងល្អ។ នៅក្នុងការភ័យខ្លាច ការឈឺចាប់ និងបរាជ័យរបស់យើង ព្រះអង្គបានប្រទាននូវដំណឹងល្អ។ ហើយទុក្ខព្រួយរបស់យើង ក៏បានប្រែក្លាយជាអំណរ។—Winn Collier តើដំណឹងល្អរបស់ព្រះ បានជំនួសការភ័យខ្លាច និងការព្រួយបារម្ភរបស់អ្នក ដោយក្តីអំណរ នៅពេលណា? ឱព្រះអម្ចាស់ ទូលបង្គំត្រូវការដំណឹងល្អ។ ទូលបង្គំឮដំណឹងអាក្រក់គ្រប់ពេលវេលា។ ទូលបង្គំត្រូវការឮព្រះបន្ទូលព្រះអង្គ។ ទូលបង្គំត្រូវការក្តីអំណរដែលព្រះអង្គប្រទាន។ គម្រោងអានព្រះគម្ពីររយៈពេល១ឆ្នាំ: ជនគណនា ១៧-១៩ និង ម៉ាកុស ៦:៣០-៥៦