ផ្សាយដំណឹងល្អតាមរបៀបដ៏សាមញ្ញ
ដោយPatricia Raybon
March 22, 2022
នោះភីលីពបើកមាត់សំដែងប្រាប់ដំណឹងល្អពីព្រះយេស៊ូវ ចាប់តាំងពីបទគម្ពីរនោះរៀងទៅ។ កិច្ចការ ៨:៣៥ សារដែលគាត់បានផ្ញើមកនោះខ្លីទេ តែមានលក្ខណៈបន្ទាន់។ គាត់គ្រាន់តែសរសេរថា គាត់ត្រូវការសេចក្តីសង្រ្គោះ ហើយគាត់ចង់ស្គាល់ព្រះយេស៊ូវ។ នេះជាការស្នើសុំដែលគួរឲ្យភ្ញាក់ផ្អើល។ ខុសពីមិត្តភក្តិ និងសមាជិកគ្រួសារខ្ញុំដែលមានការស្ទាក់ស្ទើរ នៅក្នុងការទទួលជឿព្រះគ្រីស្ទ បុរសម្នាក់នេះមិនត្រូវការឲ្យខ្ញុំខំបញ្ចុះបញ្ចូលគាត់នោះទេ។ កិច្ចការដែលខ្ញុំត្រូវធ្វើនោះ គឺត្រូវឈប់មានការសង្ស័យ អំពីរបៀបដែលខ្ញុំផ្សាយដំណឹងល្អ ហើយគ្រាន់តែចែកចាយ អំពីការបង្រៀនជាគន្លឹះ និងខគម្ពីរ ដែលឆ្លើយតប ចំពោះសំណើរបស់គាត់។ ហើយទន្ទឹមនឹងនោះ ខ្ញុំត្រូវអធិស្ឋានដោយជំនឿ សូមព្រះទ្រង់ធ្វើការក្នុងចិត្តគាត់ ហើយដឹកនាំគាត់ចូលក្នុងការធ្វើដំណើរខាងវិញ្ញាណ។ សាវ័កភីលីពបានបង្ហាញនូវការផ្សាយដំណឹងល្អ តាមរបៀបដ៏សាមញ្ញនេះ នៅតាមផ្លូវ ក្នុងវាលរហោស្ថាន ពេលគាត់ជួបជនជាតិអេធីយ៉ូពីម្នាក់ ដែលកំពុងអានបទគម្ពីរអេសាយឮៗ។ សាវ័កភីលីពក៏បានសួរថា “តើលោកមើលយល់ឬទេ?”(កិច្ចការ ៨:៣០)។ បុរសនោះឆ្លើយថា “បើគ្មានអ្នកណាដឹកនាំខ្ញុំ នោះធ្វើដូចម្តេចឲ្យយល់បាន?”(ខ.៣១)។ ពេលដែលបុរសនោះសុំឲ្យគាត់ជួយពន្យល់ “លោកភីលីពបើកមាត់សំដែងប្រាប់ដំណឹងល្អពីព្រះយេស៊ូវ ចាប់តាំងពីបទគម្ពីរនោះរៀងទៅ”(ខ.៣៥)។ ការចាប់ផ្តើមផ្សាយដំណឹងល្អ ដោយស្ទង់មើលការយល់ដឹង និងបំណងចិត្តរបស់គេ ហើយផ្សាយដំណឹងល្អ តាមរបៀបដ៏សាមញ្ញ តាមគំរូរបស់សាវ័កភីលីព អាចជាវិធីសាស្រ្តផ្សាយដំណឹងល្អអំពីព្រះគ្រីស្ទ។ តាមពិត ខណៈពេលដែលអ្នកទាំងពីរធ្វើដំណើរជាមួយគ្នា នៅតាមផ្លូវ នោះឃើញមានទីទឹក ហើយអ្នកកំរៀវនិយាយថា “មើល នុ៎ះន៏ទឹក តើមានអ្វីឃាត់មិនឲ្យខ្ញុំទទួលបុណ្យជ្រមុជទឹកបាន”(ខ.៣៦)។ លោកភីលីពក៏បានបំពេញបំណងគាត់ ហើយបុរសនោះក៏បាន “ទៅតាមផ្លូវទៅដោយអរសប្បាយ” (ខ.៣៩)។ ខ្ញុំក៏មានការអរសប្បាយផងដែរ ពេលដែលអ្នកផ្ញើអ៊ីមែលមកនោះ បានឆ្លើយតបថា គាត់បានប្រែចិត្តចេញពីអំពើបាប ហើយក៏បានសារភាពអំពើបាបនៅចំពោះព្រះគ្រីស្ទ ដោយទទួលជឿព្រះអង្គ។ គាត់រកបានព្រះវិហារមួយ ហើយជឿថា គាត់បានកើតជាថ្មីហើយ។ គាត់បានចាប់ផ្តើមការធ្វើដំណើរដ៏ប្រសើរ ក្នុងជីវិតថ្មី! សូមព្រះអង្គជួយគាត់ឲ្យកាន់តែចម្រើនឡើងក្នុងជំនឿ!—Patricia Raybon តើអ្នកឆ្លើយតបដូចម្តេច ពេលដែលអ្នកមានឱកាសផ្សាយដំណឹងល្អ? តើអ្នកមានចម្លើយដ៏សាមញ្ញអ្វីខ្លះ សម្រាប់អ្នកដែលចង់ស្គាល់ព្រះយេស៊ូវ? ឱព្រះវរបិតា ដែលគង់នៅស្ថានសួគ៌ សូមព្រះអង្គបង្ហាញទូលបង្គំ នូវរបៀបផ្សាយដំណឹងល្អដ៏សាមញ្ញ តែមានប្រសិទ្ធភាព ដើម្បីឲ្យគេបានស្គាល់ និងទទួលជឿព្រះគ្រីស្ទ។ Learn more about leading others to Christ at OurDailyBread.org/resources/leading-others-to-christ/. គម្រោងអានព្រះគម្ពីររយៈពេល១ឆ្នាំ : យ៉ូស្វេ ១០-១២ និង លូកា ១:៣៩-៥៦