តើព្រះទ្រង់គង់នៅឯណា?
ដោយXochitl Dixon
March 25, 2022
ឯងរាល់គ្នានឹងស្វែងរកអញ ហើយនឹងឃើញផង គឺកាលណាឯងស្វែងរកអញឲ្យអស់អំពីចិត្ត។ យេរេមា ២៩:១៣ ក្នុងសៀវភៅរូបភាពសម្រាប់កុមារ ដែលលោកម៉ាធីន ហ៊ែនហ្វ៊ត(Martin Handford) បាននិពន្ធ មានចំណងជើងថា តើវ៉លដូ(Waldo) នៅកន្លែងណា? គេពិបាកស្វែងរករូបរបស់តួរអង្គមួយនេះ ដែលពាក់អាវ និងស្រោមជើងពណ៌ក្រហមឆ្នូត លាយស និងមួកដែលសមនឹងអាវ ខោខោវប៊យពណ៌លឿង ស្បែកជើងកវែងពណ៌ត្នោត និងវ៉ែនតា។ លោកហ៊ែនហ៊្វតបានលាក់រូបរបស់វ៉លដូយ៉ាងប៉ិនប្រសប់ នៅក្នុងចំណោមរូបមនុស្សមួយហ្វូង នៅតំបន់ផ្សេងៗនៃពិភពលោក។ គេមិនតែងតែងាយរកឃើញវ៉លដូនោះឡើយ ប៉ុន្តែ អ្នកបង្កើតសៀវភៅនេះបានសន្យាអ្នកអានថា ពួកគេអាចស្វែងរកវ៉លដូជានិច្ច។ ការស្វែងរកព្រះ ខុសពីការស្វែងរកវ៉លដូ ក្នុងសៀវភៅរូបភាព តែព្រះអាទិករនៃយើង បានសន្យាថា យើងអាចស្វែងរកព្រះអង្គឃើញផងដែរ។ តាមរយៈហោរាយេរេមា ព្រះទ្រង់បានបង្រៀនរាស្រ្តព្រះអង្គ តាមរយៈហោរាយេរេមា អំពីរបៀបរស់នៅ ជាជនបរទេស នៅក្នុងការនិរទេស(យេរេមា ២៩:៤-៩)។ ព្រះអង្គបានសន្យាថានឹងការពារពួកគេ ហើយស្អាងពួកគេឡើងវិញ តាមផែនការដ៏ឥតខ្ចោះរបស់ទ្រង់(ខ.១០-១១)។ ព្រះទ្រង់បានធានាដល់ពួកអ៊ីស្រាអែលថា ការសម្រេចផែនការរបស់ព្រះអង្គ នឹងនាំឲ្យពួកគេប្តេជ្ញាចិត្តកាន់តែខ្លាំង នៅក្នុងការស្រែករកព្រះអង្គ ដោយការអធិស្ឋាន(ខ.១២)។ សព្វថ្ងៃនេះ ទោះព្រះទ្រង់បានបើកបង្ហាញព្រះអង្គទ្រង់ នៅក្នុងរឿងក្នុងព្រះគម្ពីរ និងតាមព្រះវិញ្ញាណរបស់ព្រះយេស៊ូវក៏ដោយ ក៏យើងនៅតែងាយបែកអារម្មណ៍ ដោយសារភាពមមាញឹកក្នុងលោកិយនេះ។ ការល្បួងថែមទាំងអាចនាំឲ្យយើងចោទសួរថា “តើព្រះទ្រង់នៅឯណា? ហេតុអ្វីមិនឃើញជួយខ្ញុំ?” ទោះជាយ៉ាងណាក៏ដោយ ព្រះអាទិករ និងព្រះដែលទ្រទ្រង់អ្វីៗទាំងអស់ បានប្រកាសថា អ្នកដែលជាកម្មសិទ្ធិរបស់ទ្រង់ នឹងរកឃើញព្រះអង្គ បើពួកគេស្វែងរកព្រះអង្គអស់ពីចិត្ត(ខ.១៣-១៤)។—Xochitl Dixon តើមានការរំខានអ្វីខ្លះ ដែលបានរារាំងអ្នក មិនឲ្យចំណាយពេលស្វែងរកព្រះ តាមរយៈការអានព្រះគម្ពីរ និងការអធិស្ឋាន? តើព្រះទ្រង់បានជួយអ្នកដូចម្តេចខ្លះ ដើម្បីឲ្យអ្នកផ្តោតទៅលើព្រះអង្គ ពេលដែលការរវល់បាននាំអ្នកចេញឆ្ងាយពីព្រះអង្គ? ឱព្រះអាទិករនៃក្តីស្រឡាញ់ និងព្រះដែលទ្រទ្រង់អ្វីៗទាំងអស់ សូមព្រះអង្គជួយទូលបង្គំ ឲ្យស្វែងរកព្រះអង្គជារៀងរាល់ថ្ងៃ អស់ពីចិត្ត ហើយទុកចិត្តថា ព្រះអង្គនឹងធ្វើតាមព្រះបន្ទូលសន្យារបស់ព្រះអង្គ។ គម្រោងអានព្រះគម្ពីររយៈពេល១ឆ្នាំ : យ៉ូស្វេ ១៩-២១ និង លូកា ២:២៥-៥២