ទីបន្ទាល់ សម្រាប់អ្នកដទៃ
ដោយJames Banks
April 1, 2022
ត្រូវឲ្យយើងទាំងអស់គ្នាបំពេញចិត្តអ្នកជិតខាងខ្លួន សំរាប់ជាសេចក្តីល្អ ឲ្យបានស្អាងចិត្តឡើង។ រ៉ូម ១៥:២ ជាងជួសជុលនាឡិកាបានបញ្ចាំងពិលរបស់គាត់ ទៅរកគំនូសតូចមួយ ដែលគេបានដៅចំណាំ នៅក្នុងនាឡិកាចាស់មួយគ្រឿងរបស់ជីតាខ្ញុំ ពេលដែលគាត់កំពុងជួសជុលវា នៅក្នុងផ្ទះរបស់យើង។ គាត់សួរយើងថា “តើឃើញគំនូសហ្នឹងទេ? ជាងជួសជុលនាឡិកានៅសម័យមុន អាចដាក់គំនូសចំណាំនោះ ក្នុងនាឡិកាបញ្ឈរជាប់ជញ្ជាំងនេះ ប្រហែល១សតវត្សរ៍មុន។ គេហៅគំនូសសំគាល់នេះថា “ស្នាមបន្ទាល់”។ វាជួយឲ្យខ្ញុំដឹង ពីរបៀបសារេនាឡិកានេះ ឲ្យដើរឡើងវិញ”។ មុនពេលគេចាប់ផ្តើមប្រើសៀវភៅណែនាំ អំពីបច្ចេកទេស និងរបៀបជួសជុលឧបករណ៍ផ្សេងៗ ដែលមនុស្សសម័យមុន បានប្រើ “ស្នាមបន្ទាល់” ដើម្បីជួយជាងជួសជុលនៅពេលអនាគត ឲ្យអាចសារេស្ពឺនៅក្នុងឧបករណ៍ ឲ្យត្រូវគន្លាក់របស់វាយ៉ាងជាក់លាក់។ គំនូសទាំងនោះមិនគ្រាន់តែបានជួយសន្សំសំចៃពេលវេលាប៉ុណ្ណោះទេ តែជាញឹកញាប់ ពួកវាបានបង្ហាញអំពីភាពសប្បុរស ដែលពួកជាងជំនាន់មុន មានសម្រាប់ពួកជាងជំនាន់ក្រោយ។ ព្រះគម្ពីរបានលើកទឹកចិត្តយើង ឲ្យធ្វើជា “ទីបន្ទាល់ល្អ” ខណៈពេលដែលយើងធ្វើការថ្វាយព្រះ ដោយបម្រើអ្នកដទៃ ក្នុងលោកិយដែលប្រេះបែក។ គឺដូចដែលសាវ័កប៉ុលបានសរសេរសំបុត្រផ្ញើទៅពួកជំនុំ នៅទីក្រុងរ៉ូមថា “ត្រូវឲ្យយើងទាំងអស់គ្នាបំពេញចិត្តអ្នកជិតខាងខ្លួន សំរាប់ជាសេចក្តីល្អ ឲ្យបានស្អាងចិត្តឡើង”(រ៉ូម ១៥:២)។ ព្រះនៃយើងបានធ្វើជាគំរូ នៃសេចក្តីអត់ធ្មត់ និងសេចក្តីកម្សាន្តចិត្ត(ខ.៥)។ ការរស់នៅដោយទីបន្ទាល់ល្អ គឺជាការរស់នៅជាពលរដ្ឋល្អនៃផែនដី ក៏ដូចជានគរស្ថានសួគ៌។ ទីបន្ទាល់របស់យើង ប្រហែលជារឿងតូចតាច តែវាអាចនាំមកនូវការផ្លាស់ប្តូរធំមួយ ក្នុងជីវិតនរណាម្នាក់។ ពាក្យលើកទឹកចិត្ត ការបំពេញការខ្វះខាតផ្នែកហិរញ្ញវត្ថុរបស់នរណាម្នាក់ និងការអង្គុយស្តាប់អ្នកដទៃរៀបរាប់ទុក្ខលំបាក គឺសុទ្ធតែជាអំពើសប្បុរសធម៌ ដែលអាចនាំមកនូវការផ្លាស់ប្តូរដ៏ស្ថិតស្ថេរ។ សូមព្រះអង្គជួយអ្នក ឲ្យធ្វើជាទីបន្ទាល់ដ៏ល្អ ក្នុងជីវិតរបស់នរណាម្នាក់ នៅថ្ងៃនេះ!—James Banks តើអ្នកដទៃបានបន្សល់ទុកនូវទីបន្ទាល់អ្វីខ្លះ ក្នុងជីវិតអ្នក ដើម្បីលើកទឹកចិត្តអ្នក? តើមានអំពើសប្បុរសធម៌ដ៏សាមញ្ញណា ដែលអ្នកអាចធ្វើ សម្រាប់អ្នកជឿដទៃទៀត នៅថ្ងៃនេះ? ឱព្រះវរបិតាដ៏មានគ្រប់ចេស្ដា ទូលបង្គំសូមអរព្រះគុណ សម្រាប់សេចក្តីស្រឡាញ់ និងសេចក្តីសប្បុរស ដែលព្រះអង្គបានប្រទានមកទូលបង្គំ តាមរយៈព្រះរាជបុត្រាព្រះអង្គ ព្រះនាម យេស៊ូវ។ សូមព្រះអង្គជួយទូលបង្គំ ឲ្យបង្ហាញចេញសេចក្តីស្រឡាញ់របស់ព្រះអង្គ តាមរយៈការប្រព្រឹត្តតូចបំផុត នៅថ្ងៃនេះ។ គម្រោងអានព្រះគម្ពីររយៈពេល១ឆ្នាំ : ពួកចៅហ្វាយ ១៣-១៥ និង លូកា ៦:២៧-៤៩