ព្រះអង្គកំពុងធ្វើការដ៏ល្អ
ដោយKenneth Petersen
April 5, 2022
ព្រះអង្គដែលទ្រង់បានចាប់តាំងធ្វើការល្អក្នុងអ្នករាល់គ្នា ទ្រង់នឹងធ្វើឲ្យកាន់តែពេញខ្នាតឡើង ទាល់តែដល់ថ្ងៃនៃព្រះយេស៊ូវគ្រីស្ទ។ ភីលីព ១:៦ កាលលោកឆាល ស្ព័រជិន(Charles Spurgeon) ស្ថិតក្នុងវ័យជំទង់ គាត់បានបះបោរប្រឆាំងនឹងព្រះ។ គាត់បានទៅព្រះវិហារ ខណៈពេលដែលគាត់បានចម្រើនវ័យធំឡើង គាត់យល់ឃើញថា ការអធិប្បាយហាក់ដូចជា គ្មានជាតិ គ្មានន័យអ្វីសោះ។ ដូចនេះ គាត់ពិបាកជឿព្រះ ហើយគាត់ក៏បានបះបោរប្រឆាំងនឹងព្រះអង្គ។ នៅយប់មួយ ខ្យល់ព្យុះដ៏កាចសាហាវមួយ បានបង្ខំឲ្យយុវជនអាយុ១៦ឆ្នាំរូបនេះ ឲ្យរកកន្លែងជ្រក នៅក្នុងព្រះវិហារមេតូឌីសតូចមួយ។ ការអធិប្បាយរបស់គ្រូគង្វាលគាត់ ហាក់ដូចជាសំដៅមកលើខ្លួនគាត់ផ្ទាល់។ នៅពេលនោះ គាត់ក៏បានចុះចាញ់ព្រះ ហើយក៏បានថ្វាយចិត្តរបស់គាត់ ដល់ព្រះយេស៊ូវ។ ក្រោយមក លោកស្ព័រជិនក៏បានសរសេរថា “មុនពេលខ្ញុំទទួលជឿព្រះគ្រីស្ទ ព្រះអង្គបានចាប់ផ្តើមធ្វើការជាមួយខ្ញុំ តាំងពីយូរមកហើយ”។ តាមពិត ជីវិតរបស់យើងមិនបានចាប់ផ្តើម ជាមួយព្រះ នៅវិនាទីដែលយើងបានសង្គ្រោះនោះទេ។ អ្នកនិពន្ធបទគម្ពីរទំនុកដំកើងបានកត់សំគាល់ថា “ដ្បិតគឺទ្រង់ដែលបានបង្កើតចិត្តថ្លើមនៃទូលបង្គំ ហើយបានផ្សំគ្រឿងនៃទូលបង្គំនៅក្នុងផ្ទៃម្តាយ”(ទំនុកដំកើង ១៣៩:១៣)។ សាវ័កប៉ុលក៏បានបង្រៀនផងដែរថា “ព្រះដែលរើសខ្ញុំតាំងពីផ្ទៃម្តាយមក ហើយបានហៅខ្ញុំដោយព្រះគុណទ្រង់”(កាឡាទី ១:១៥)។ ហើយព្រះទ្រង់មិនបានឈប់ធ្វើការជាមួយយើង ពេលដែលយើងបានសង្រ្គោះនោះឡើយ : ពីព្រោះ “ព្រះអង្គដែលទ្រង់បានចាប់តាំងធ្វើការល្អក្នុងអ្នករាល់គ្នា ទ្រង់នឹងធ្វើឲ្យកាន់តែពេញខ្នាតឡើង ទាល់តែដល់ថ្ងៃនៃព្រះយេស៊ូវគ្រីស្ទ”(ភីលីព ១:៦)។ យើងជាស្នាព្រះហស្ត ដែលព្រះនៃសេចក្តីស្រឡាញ់បន្តកែច្នៃ។ ព្រះអង្គដឹកនាំយើង ចេញពីការបះបោរប្រឆាំងព្រះអង្គ ចូលទៅក្នុងការប្រកបស្និទ្ធស្នាលដ៏កក់ក្តៅ។ ប៉ុន្តែ បំណងព្រះទ័យដែលព្រះអង្គមានចំពោះយើង មិនទាន់ដល់ទីបញ្ចប់ឡើយ។ “ដ្បិតគឺជាព្រះហើយ ដែលបណ្តាលចិត្តអ្នករាល់គ្នា ឲ្យមានទាំងចំណងចង់ធ្វើ ហើយឲ្យបានប្រព្រឹត្តតាមបំណងព្រះហឫទ័យទ្រង់ដែរ”(ភីលីព ២:១៣)។ ចូរយើងទុកចិត្តថា យើងជាស្នាព្រះហស្តដ៏ល្អរបស់ព្រះអង្គ ទោះយើងមានវ័យចាស់ប៉ុណ្ណា ឬកំពុងស្ថិតក្នុងដំណាក់កាលមួយណាក៏ដោយ ក្នុងជីវិតនេះ។—Kenneth Petersen តើព្រះទ្រង់កំពុងធ្វើការដូចម្តេចខ្លះ ក្នុងជីវិតអ្នក នៅពេលនេះ? តើព្រះអង្គកំពុងធ្វើអ្វីខ្លះ ដើម្បីសម្រេចបំណងព្រះទ័យព្រះអង្គ? ឱព្រះនៃក្តីស្រឡាញ់ ទូលបង្គំសូមអរព្រះគុណព្រះអង្គខ្លាំងណាស់ ដែលបានថែរក្សាទូលបង្គំដោយក្តីស្រឡាញ់ ចាប់តាំងពីមុនពេលទូលបង្គំចាប់កំណើត។ សូមព្រះអង្គជួយទូលបង្គំ ឲ្យឆ្លើយតប ចំពោះកិច្ចការដែលព្រះអង្គបន្តធ្វើ ក្នុងជីវិតទូលបង្គំ។ គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ១-៣ និង លូកា ៨:២៦-៥៦