ឡានក្រុងជជែកកម្សាន្ត
ដោយLisa Samra
April 9, 2022
ចូរឲ្យពាក្យសំដីរបស់អ្នករាល់គ្នា បានប្រកបដោយព្រះគុណជានិច្ច។ កូល៉ុស ៤:៦ កាលពីឆ្នាំ២០១៩ ក្រុមហ៊ុនឡានក្រុងអក់ស្វឺត បានចាប់ផ្តើមប្រើកម្មវិធី “ឡានក្រុងជជែកកម្សាន្ត” ដែលបានក្លាយជាកម្មវិធីដ៏ពេញនិយមក្នុងរយៈពេលដ៏ខ្លី។ គេបានរៀបចំឡានក្រុងមួយគ្រឿង ដោយជ្រើសរើសមនុស្ស ឲ្យឡើងជិះឡានក្រុងនោះ ដោយស្ម័គ្រចិត្តជជែកកម្សាន្តជាមួយអ្នកដំណើរដែលមានលក្ខណៈគួរឲ្យចាប់អារម្មណ៍។ គេបានបង្កើតកម្មវិធីនេះឡើង ដើម្បីឆ្លើយតប ចំពោះការស្រាវជ្រាវរបស់រាជរដ្ឋាភិបាល ដែលបានរកឃើញថា ៣០ភាគរយនៃជនជាតិអង់គ្លេស កំពុងរស់នៅ ដោយគ្មានការសន្ទនាដ៏មានន័យ យ៉ាងហោចណាស់ មួយថ្ងៃ ក្នុងមួយសប្តាហ៍។ មនុស្សជាច្រើនទំនងជាមានភាពឯកោ ដោយសារគ្មាននរណាម្នាក់ ជជែកជាមួយ នៅពេលដែលពួកគេត្រូវការអ្នកនិយាយជាមួយ។ ខណៈពេលដែលខ្ញុំពិចារណា អំពីសារៈសំខាន់នៃការសន្ទនា ក្នុងជីវិតខ្ញុំ ខ្ញុំក៏បាននឹកចាំអំពីការជជែកគ្នា ដែលមានពេញដោយព្រះគុណព្រះ។ ពេលនោះ ខ្ញុំមានពេញដោយអំណរ និងការលើកទឹកចិត្ត ហើយក៏បានជួយឲ្យខ្ញុំមានទំនាក់ទំនងកាន់តែជ្រាលជ្រៅផងដែរ។ នៅចុងបញ្ចប់នៃសំបុត្រដែលសាវ័កប៉ុលបានសរសេរផ្ញើទៅពួកជំនុំ នៅទីក្រុងកូល៉ុស គាត់បានលើកទឹកចិត្តអ្នកអានរបស់គាត់ ដោយបង្រៀនពួកគេអំពីគោលការណ៍នៃការរស់នៅជាគ្រីស្ទានពិតប្រាកដ ដែលក្នុងនោះ គាត់ក៏បានបង្រៀនផងដែរថា របៀបយើងសន្ទនាគ្នា អាចបង្ហាញចេញសេចក្តីស្រឡាញ់ ដល់មនុស្សគ្រប់គ្នាដែលយើងជួប។ សាវ័កប៉ុលបានសរសេរថា “ចូរឲ្យពាក្យសំដីរបស់អ្នករាល់គ្នា បានប្រកបដោយព្រះគុណជានិច្ច”(៤:៦)។ ត្រង់ចំណុចនេះ គាត់បានរំឭកអ្នកអានរបស់គាត់ថា គុណភាពនៃពាក្យសម្តីទាំងនោះ “ដែលប្រកបដោយព្រះគុណ” នាំមកនូវការលើកទឹកចិត្តពិតប្រាកដ សម្រាប់អ្នកដទៃ។ ពេលណាអ្នកមានឱកាសមានការសន្ទនាដ៏ល្អ ជាមួយមិត្តភក្តិ មិត្តរួមការងារ ឬសូម្បីតែមនុស្សដែលអ្នកមិនស្គាល់ ដែលកំពុងអង្គុយនៅលើឡានក្រុង ឬបន្ទប់រង់ចាំជាមួយអ្នកក្តី ចូរស្វែងរកវិធីនាំពួកគេទទួលព្រះពរ តាមរយៈការចំណាយពេលជាមួយគ្នា នៅពេលនោះ។—Lisa M. Samra តើអ្នកបានពិសោធនឹងពេលដែលគេនិយាយពាក្យប្រកបដោយព្រះគុណ មកកាន់អ្នក នៅពេលណាខ្លះ? តើអ្នកអាចលើកទឹកចិត្តនរណាម្នាក់ តាមរយៈពាក្យសម្តីរបស់អ្នក យ៉ាងដូចម្តេចខ្លះ? ឱព្រះវរបិតា ដែលគង់នៅស្ថានសួគ៌ សូមព្រះអង្គជួយទូលបង្គំ ឲ្យធ្វើជាព្រះពរដល់អ្នកដែលទូលបង្គំជជែកជាមួយ នៅថ្ងៃនេះ ដោយបំពេញការសន្ទនានោះ ដោយព្រះគុណព្រះអង្គ។ គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ១៣-១៤ និង លូកា ១០:១-២៤