ក្សត្រដែលគង់នៅលើខ្នងសត្វលា
ដោយodbm
April 10, 2022
មើល ស្តេចនៃនាង ទ្រង់យាងមកឯនាង ទ្រង់សុភាព ហើយគង់លើសត្វលា។ ម៉ាថាយ ២១:៥ ព្រះយេស៊ូវយាងចូលទីក្រុងយេរូសាឡិម នៅថ្ងៃអាទិត្យ ដែលសព្វថ្ងៃនេះ ព្រះវិហារមួយចំនួនបានហៅថ្ងៃនោះថា ថ្ងៃអាទិត្យនៃស្លឹកចាក។ ជាការពិតណាស់ ពេលនោះមិនមែនជាលើកទី១ ដែលព្រះយេស៊ូវបានយាងចូលទីក្រុងយេរូសាឡិមឡើយ។ ក្នុងនាមព្រះអង្គជាជនជាតិយូដា ព្រះអង្គប្រាកដជាបានយាងចូលទីក្រុងនេះជារៀងរាល់ឆ្នាំ ដើម្បីប្រារព្ធពិធីបុណ្យធំៗទាំងបី(លូកា ២:៤១-៤២ យ៉ូហាន ២:១៣ ៥:១)។ កាលពី៣ឆ្នាំមុន ព្រះគ្រីស្ទក៏បានបំពេញព្រះរាជកិច្ច និងបង្រៀនក្នុងទីក្រុងយេរូសាឡិម។ តែនៅថ្ងៃអាទិត្យនោះ ព្រះអង្គយាងចូលមកក្នុងទីក្រុងនោះ ដោយហេតុផលផ្សេងពីនេះ។ ព្រះអង្គបានយាងចូលទីក្រុងយេរូសាឡិម ដោយគង់នៅលើខ្នងសត្វលា នៅពេលដែលមនុស្សរាប់ពាន់នាក់កំពុងធ្វើដំណើរចូលទីក្រុងនេះ ដូចនេះ មនុស្សជាច្រើនបានងាកមកផ្ដោតអារម្មណ៍ ទៅលើព្រះអង្គ(ម៉ាថាយ ២១:៩-១១)។ ហេតុអ្វីទ្រង់បង្ហាញអង្គទ្រង់ នៅចំពោះមុខមនុស្សរាប់ពាន់នាក់ បន្ទាប់ពីទ្រង់មិនបានស្វែងរកប្រជាប្រិយភាព កាលពី៣ឆ្នាំមុន? ហេតុអ្វីព្រះអង្គព្រមឲ្យគេប្រកាសថា ព្រះអង្គជាស្តេច ពេលដែលព្រះអង្គសល់ពេលតែ៥ថ្ងៃប៉ុណ្ណោះ ព្រះអង្គនឹងសុគតហើយ? កណ្ឌគម្ពីរបានចែងថា រឿងនេះបានកើតឡើង ដើម្បីសម្រេចតាមបទទំនាយ មានអាយុកាល៥០០ឆ្នាំ(ម៉ាថាយ ២១:៤-៥) ដែលបានប្រកាសថា ក្សត្រដែលព្រះទ្រង់បានជ្រើសតាំង នឹងយាងចូលទីក្រុងយេរូសាឡិម “ទ្រង់ជាអ្នកសុចរិត ហើយមានជ័យជំនះ ទ្រង់ក៏សុភាព ទ្រង់គង់លើសត្វលា”(សាការី ៩:៩ និង លោកុប្បត្តិ ៤៩:១០-១១)។ ការដែលក្សត្រយាងចូលទីក្រុង តាមរបៀបនេះ គឺពិតជាចម្លែកណាស់។ តាមធម្មតា ស្តេចដ៏ខ្លាំងពូកែគង់នៅលើខ្នងសេះដ៏រឹងមាំ ពេលទ្រង់យាងចូលទីក្រុងណាមួយ។ តែព្រះយេស៊ូវមិនបានយាងចូលក្រុង ដោយគង់នៅលើខ្នងសត្វសេះសង្រ្គាមនោះទេ។ ការនេះបានបង្ហាញថា ព្រះយេស៊ូវជាក្សត្រប្រភេទណា។ ព្រះអង្គបានយាងមកដោយការបន្ទាបព្រះកាយ និងភាពតូចទាប។ ព្រះអង្គមិនបានមកធ្វើសង្រ្គាមនោះទេ តែដើម្បីបង្កើតសន្តិភាព ដោយផ្សះផ្សាទំនាក់ទំនងរវាងព្រះ និងមនុស្ស(កិច្ចការ ១០:៣៦ និង កូល៉ុស ១:២០)។—K. T. Sim តើអ្នកយល់ថា ព្រះយេស៊ូវជាក្សត្រប្រភេទណា? តើអ្នកអាចថ្វាយព្រះកិត្តិនាមព្រះអង្គ ធ្វើជាក្សត្ររបស់អ្នក ដោយរបៀបណា? ឱព្រះយេស៊ូវ ទូលបង្គំសូមអរព្រះគុណព្រះអង្គ សម្រាប់ការយាងចូលទីក្រុងយេរូសាឡិម ដើម្បីបង្ហាញរបៀបនៃការបន្ទាបព្រះកាយ និងព្រះចេស្ដារបស់ព្រះអង្គ។ សូមព្រះអង្គបំពេញចិត្តទូលបង្គំ ដោយសន្តិភាពរបស់ព្រះអង្គ។ To learn more about Jesus’ life in the area of Judea, visit ODBU.org/courses/NT221. គម្រោងអានព្រះគម្ពីររយៈពេល១ឆ្នាំ : ១សាំយ៉ូអែល ១៥-១៦ និង លូកា ១០:២៥-៤២